ວັນທີ 28 ຕຸລາ 2022 ນີ້ ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ປະຈຳປີ 2022 ຢູ່ທີ່ຫ້ອງປະຊຸມ ສະພາປະຊາຊົນແຂວງ ໂດຍການເປັນປະທານ ຂອງທ່ານ ສົມສັກ ດອນຈານິດ ກຳມະການພັກແຂວງ ຮອງປະທານສະພາປະຊາຊົນແຂວງ ມີຄະນະປະຈຳ, ຄະນະເລຂາທິການ, ຜູ້ຕາງໜ້າຈາກຄະນະຈັດຕັ້ງແຂວງ, ອົງການກວດກາລັດແຂວງ, ພະແນກພາຍໃນແຂວງ, ຕະຫຼອດຮອດ ພະນັກງານ-ລັດຖະກອນ ພາຍໃນສະພາປະຊາຊົນແຂວງເຂົ້າຮ່ວມ.

             ກອງປະຊຸມດັ່ງກ່າວ, ໄດ້ຮັບຟັງຮ່າງບົດສະຫລຸບຕີລາຄາຄືນການຈັດຕັ້ງປະຕິບັດ ວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງສະພາປະຊາຊົນແຂວງ, ພ້ອມທັງເຊື່ອມຊຶມເອກະສານສຳຄັນ ເປັນຕົ້ນ ຄຳແນະນຳ ການຈັດຕັ້ງປະຕິບັດດຳລັດວ່າດ້ວຍ ການປະເມີນຜົນການປະຕິບັດວຽກງານ ຂອງພະນັກງານ – ລັດຖະກອນ ສະບັບເລກທີ 06/ພນ, ລົງວັນທີ 2 ພຶດສະພາ 2018 ແລະ ຄູ່ມືແນະນໍາການຈັດຕັ້ງການປະຕິບັດ ການປະເມີນຜົນການປະຕິບັດ ວຽກງານຂອງພະນັກງານ – ລັດຖະກອນ ສະບັບເລກທີ 01/ປພລ, ລົງວັນທີ 29 ສິງຫາ 2018 .ໃນພິທີຜູ້ເຂົ້້າຮ່ວມກໍໄດ້ພ້ອມກັນປະກອບຄຳຄິດຄຳເຫັນ ໃສ່ຮ່າງບົດສະຫຼຸບດັ່ງກ່າວ ໃຫ້ມີເນື້ອໃນຄົບຖ້ວນ ແລະ ສາມາດຈັດຕັ້ງປະຕິບັດໄດ້. ຈາກນັ້ນ; ພະນັກງານລັດຖະກອນທຸກຄົນ ໄດ້ພ້ອມກັນປະເມີນຕົນເອງ ແລະ ເພື່ອນຮ່ວມງານ ຕາມມາດຖານເງື່ອນໄຂຂອງການປະເມີນ; ເພື່ອເປັນການສັງເກດຕີລາຄາດ້ານດີຜົນງານ, ດ້ານອ່ອນຄົງຄ້າງ ຂອງພະນັກງານ-ລັດຖະກອນ ແຕ່ລະຄົນ, ພ້ອມທັງປະກອບຄຳຄິດຄຳເຫັນ, ຕຳນິສົ່ງຂ່າວ, ກໍ່ສ້າງເຊິ່ງກັນ ແລະ ກັນ. ສະພາປະຊາຊົນແຂວງຫົວພັນ ມີພະນັກງານ – ລັດຖະກອນທັງໝົດ 52 ຄົນ, ຍິງ 19 ຄົນ ໃນນີ້ມີໜ້າ ປະເມີນຕົວຈິງ 41 ຄົນ ຍິງ 17 ຄົນຜ່ານການປະເມີນ ມີປະເພດດີເລີດ ແລະ ດີ; ປະເພດກາງ ແລະ ອ່ອນ ແມ່ນບໍ່ມີ.

           ຕອນທ້າຍ ທ່ານ ສົມສັກ ດອນຈານິດ ໄດ້ມີຄຳຄິດຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວວຽກງານໄລຍະໜຶ່ງປີຜ່ານມາ ຂອງພະນັກງານ – ລັດຖະກອນ ສະພາປະຊາຊົນແຂວງ ຍາດມາໄດ້ ແລະ ເຫນັ້ນຫນັກໃຫ້ບັນດາທ່ານ ຄະນະປະຈຳ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ຈົ່ງຖືເອົາວຽກງານສຶກສາອົບຮົມການເມືອງແນວຄິດໃຫ້ພະນັກງານ – ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນເອງເປັນກົກ ທັງເປັນປົກກະຕິຕໍ່ເນື່ອງ ແລະ ຮຽກຮ້ອງໃຫ້ພະນັກງານ – ລັດຖະກອນເອົາໃຈໃສ່ ຄົ້ນຄວ້າຮ່ຳຮຽນ, ເຊື່ອມຊຶມແນວທາງຂອງພັກ-ລັດ, ຮູ້ຈຳແນກມິດ ແລະ ສັດຕູຢ່າງຈະແຈ້ງ, ມີຄວາມອຸ່ນອຽນທຸ່ນທ່ຽງ, ປຸ້ມລຸມສາມັກຄີ ເປັນເອກະພາບກັນພາຍໃນ, ຮັກແພງຊ່ວຍເຫຼືອເຊິ່ງກັນ ແລະ ກັນສືບຕໍ່ເຝິກຝົນຫລໍ່ຫລອມທາງດ້ານຄຸນສົມບັດ, ສິນທຳປະຕິບັດ, ຕັ້ງຫນ້າປະຕິບັດ ແບບແຜນວິທີການເຮັດວຽກ ປະຕິບັດຫນ້າທີ່ວຽກງານຂອງຕົນໃຫ້ປະສົບຜົນສຳເລັດ ແລະ ພ້ອມກັນຕີຖອຍບັນຫາຈຸດອ່ອນຂໍ້ຄົງຄ້າງໃຫ້ໝົດໄປເທື່ອເທື່ອລະກ້າວ.

ພາບ ແລະ ຂ່າວ: ສພຂ ຫົວພັນ