ໃນຕອນເຊົ້າ ວັນທີ 27 ຕຸລາ 2022 ນີ້ສະພາປະຊາຊົນແຂວງໄດ້ຈັດກອງປະຊຸມຕິດຕາມກວດກາ ຜົນການປະເມີນການຈັດຕັ້ງປະຕິບັດກົດໝາຍ ໃນຂົງເຂດຍຸຕິທໍາ ຈໍານວນ 04 ສະບັບຄື: ກົດໝາຍວ່າດ້ວຍສານປະຊາຊົນ, ກົດໝາຍ ວ່າດ້ວຍອົງການໄອຍະການປະຊາຊົນ, ກົດໝາຍ ວ່າດ້ວຍການດຳເນີນຄະດີແພ່ງ, ກົດໝາຍ ວ່າດ້ວຍການດຳເນີນຄະດີອາຍາ ຂຶ້ນທີ່ຫ້ອງປະຊຸມຄະນະປະຈຳສະພາປະຊາຊົນແຂວງຫົວພັນ

             ໂດຍການເປັນປະທານຂອງ ທ່ານ ສົມສັກ ດອນຈານິດ ກໍາມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ, ບັນດາທ່ານຕາງໜ້າຈາກອົງການກວດກາລັດແຂວງ, ກອງບັນຊາການທະຫານແຂວງ, ກອງບັນຊາການ ປ້ອງກັນຄວາມສະຫງົບແຂວງ, ອົງການໄອຍະການແຂວງ, ອົງການໄອຍະການເຂດ1, ສານປະຊາຊົນແຂວງ, ສານເຂດ1, ຫ້ອງວ່າການແຂວງ, ພະແນກຍຸຕິທໍາ ແລະ ພະນັກງານວິຊາການ ຂອງຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບສະພາປະຊາຊົນແຂວງ ເຂົ້າຮ່ວມ.

              ໃນກອງປະຊຸມ, ໄດ້ຮັບຟັງ ການລາຍງານ ຂອງພາກສ່ວນກ່ຽວຂ້ອງເປັນຕົ້ນແມ່ນຮັບຟັງການລາຍງານ ການປະເມີນການຈັດຕັ້ງປະຕິບັດກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດໍາເນີນຄະດີແພ່ງຈາກທ່ານ ພົມແພງ ສີວິໄລທອງ ຮອງປະທານສານປະຊາຊົນແຂວງ ແລະ ຮັບຟັງການລາຍງານການປະເມີນການຈັດຕັ້ງປະຕິບັດກົດໝາຍວ່າດ້ວຍອົງການໄອຍະການປະຊາຊົນ ແລະ ກົດໝາຍ ວ່າດ້ວຍການດໍາເນີນຄະດີອາຍາ ຈາກ ທ່ານ ພິລາວົງ ເພັງພະຈັນ ຮອງຫົວໜ້າອົງການໄອຍະການປະຊາຊົນແຂວງ. ໃນກອງປະຊຸມຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນ ຕາມຄໍາຖາມເຈາະຈີ້ມ ແລະ ຕາມການຈັດຕັ້ງປະຕິບັດບັນດາກົດໝາຍດັ່ງກ່າວໃນໄລຍະຜ່ານມາຢ່າງມີຈຸດສຸມ, ການປະເມີນຄັ້ງນີ້ຈຸດປະສົງເພື່ອເປັນຂໍ້ມູນ ແລະ ເປັນບ່ອນອີງໃນການນໍາສະເໜີຕໍ່ກອງປະຊຸມສະໄໝສາມັນ ເທື່ອທີ 4 ສະພາແຫ່ງຊາດ ເພື່ອປັບປຸງບາງໝວດ, ບາງມາດຕາໃສ່ກົດໝາຍຈຳນວນ 04 ສະບັບ ໃນຂົງເຂດຍຸຕິທໍາໃຫ້ສອດຄ່ອງກັບການຈັດຕັ້ງປະຕິບັດຕົວຈິງຢູ່ຂັ້ນທ້ອງຖິ່ນໃຫ້ນັບມື້ນັບດີຂຶ້ນເລື່ອຍໆ.

ພາບ ແລະ ຂ່າວ: ສພຂ ຫົວພັນ