ໃນລະຫວ່າງວັນທີ 31 ຕຸລາ – 1 ພະຈິກ 2022, ຄະນະທີມງານສະພາແຫ່ງຊາດ ນໍາໂດຍທ່ານ ພົນໂທ ສຸວອນ ເລືອງບຸນມີ ກໍາມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ລົງເຄື່ອນໄຫວຕິດຕາມ ກວດກາ ກ່ຽວກັບການແກ້ໄຂຜົນກະທົບ ຈາກໂຄງການກໍ່ສ້າງເຂື່ອນໄຟຟ້ານໍ້າອູ 4 ທີ່ເມືອງຂວາ ແຂວງຜົ້ງສາລີ. ເປັນກຽດເຂົ້າຮ່ວມ ແລະ ໃຫ້ການຕ້ອນຮັບໂດຍທ່ານ ທອງສີ ເສົາສຸລິພົມ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ພ້ອມດ້ວຍຄະນະ
ວັນທີ 31 ຕຸລາ 2022, ຄະນະທີມງານສະພາແຫ່ງຊາດ, ສະພາປະຊາຊົນແຂວງ ສົມທົບກັບພາກສ່ວນກ່ຽວຂ້ອງຂັ້ນແຂວງ ແລະ ອົງການປົກຄອງເມືອງ ໄດ້ລົງໄປຢ້ຽມຢາມເຂື່ອນໄຟຟ້ານໍ້າອູ 4 ແລະ ລົງພົບປະ, ເບິ່ງພື້ນທີ່ຕົວຈິງ ແລະ ປະຊຸມ ຮ່ວມກັບປະຊາຊົນບ້ານທີ່ຖືກຜົນກະທົບຈາກໂຄງການ ຢູ່ທີ່ບ້ານຫ້ວຍພຸກ ເມືອງຂວາ ແຂວງຜົ້ງສາລີ. ເຂົ້າຮ່ວມມີ ຈໍານວນ 7 ບ້ານຄື: ບ້ານຫາດອາຍ, ບ້ານຫ້ວຍຫຼີກ, ບ້ານຫ້ວຍສອຍ, ບ້ານອົມລຸງ, ບ້ານຫ້ວຍແພອູ ແລະ ບ້ານຫວ້ຍພຸກ ທີ່ຂຶ້ນກັບກຸ່ມຫ້ວຍແອ່ນ ເມືອງຂວາ ແຂວງຜົ້ງສາລີ. ໃນນີ້, ໄດ້ຮັບຟັງ ທ່ານ ເລຂາຄະນະພັກຮາກຖານກຸ່ມຫ້ວຍແອ່ນ ລາຍງານໂດຍຫຍໍ້ກ່ຽວກັບສະພາບລວມການຈັດຕັ້ງປະຕິບັດ ການຈັດສັນ, ຍົກຍ້າຍ ແລະ ການຟື້ນຟູຊີວິດການເປັນຢູ່ຂອງປະຊາຊົນ ພ້ອມທັງຮັບຟັງຄໍາຄິດເຫັນ, ຄໍາສະເໜີ ຂອງປະຊາຊົນຈໍານວນໜຶ່ງ. ຈາກນັ້ນ, ບັນດາທ່ານ ຈາກທີມງານສະພາແຫ່ງຊາດ, ພາກສ່ວນກ່ຽວຂ້ອງຂັ້ນແຂວງ, ຂັ້ນເມືອງ ໂດຍສະເພາະ ໜ່ວຍງານ RMU ໄດ້ປະກອບຄໍາເຫັນ, ອະທິບາຍ ຊີ້ແຈງ ໃຫ້ປະຊາຊົນ ຮັບຮູ້ ແລະ ເຂົ້າໃຈ ຕໍ່ແນວທາງໃນການພັດທະນາຂອງໂຄງການ ກໍ່ຄື ແນວທາງການພັດທະນາຂອງພັກ-ລັດຖະບານ, ຂອງແຂວງ ແລະ ຂອງເມືອງ. ໃນຕອນທ້າຍ, ປະທານກອງປະຊຸມ ໄດ້ມີຄໍາເຫັນໂອ້ລົມຕື່ມ ເຊິ່ງທ່ານ ໄດ້ເນັ້ນໃຫ້ພາກສ່ວນກ່ຽວຂ້ອງຂັ້ນແຂວງ, ຂັ້ນເມືອງ ປະສານສົມທົບກັບຜູ້ພັດທະນາໂຄງການ ພ້ອມກັນປຶກສາຫາລື, ນໍາເອົາບັນຫາທີ່ປະຊາຊົນສະເໜີ ໄປຄົ້ນຄວ້າແກ້ໄຂ ໃຫ້ລະອຽດ ຈະແຈ້ງຕື່ມ ຕາມຂອບເຂດຄວາມຮັບຜິດຊອບຂອງແຕ່ລະຂັ້ນ ແລະ ໃກ້ຊິດຕິດແທດກັບປະຊາຊົນ ໃຫ້ຫຼາຍຂຶ້ນຕື່ມ. ປະຊາຊົນຕ້ອງຮັກສາມູນເຊື້ອ, ມີຄວາມສາມັກຄີ, ເປັນເອກະພາບ ແລະ ປະຕິບັດຕາມແນວທາງຂອງພັກ-ລັດຖະບານ ກໍ່ຄືຂອງແຂວງ ແລະ ຂອງເມືອງ. ນອກຈາກນີ້, ຄະນະທີມງານ ຍັງໄດ້ລົງພົບປະ ແລະ ລົງໄປເບິ່ງຂອບເຂດການຜະລິດຂອງປະຊາຊົນບ້ານຫາດແດນ ທີ່ຖືກຜົນກະທົບໂຄງການກໍ່ສ້າງເຂື່ອນໄຟຟ້ານໍ້າອູ 3
ມາໃນຕອນເຊົ້າວັນທີ 1 ພະຈິກ 2022, ຄະນະທີມງານ ໄດ້ຈັດກອງປະຊຸມປຶກສາຫາລືທິດທາງແກ້ໄຂຜົນກະທົບ ຈາກໂຄງການກໍ່ສ້າງເຂື່ອນໄຟຟ້ານໍ້າອູ 4 ຢູ່ທີ່ສະໂມສອນຂອງເມືອງຂວາ ແຂວງຜົ້ງສາລີ. ທີ່ປະຊຸມ ໄດ້ຮັບຟັງ ທ່ານ ພົມມີ ອິນມະສອນ ຮອງເລຂາພັກເມືອງຂວາ ແລະ ທ່ານ ສຸລິຍາ ແສງດາລາ ຫົວໜ້າໜ່ວຍງານ RMU ຂຶ້ນລາຍງານກ່ຽວກັບການທົດແທນຄ່າເສຍຫາຍ, ຍົກຍ້າຍຈັດສັນ ແລະ ຟື້ນຟູຊີວິດການເປັນຢູ່ໃຫ້ແກ່ປະຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳອູ 4. ຈາກນັ້ນ, ຜູ້ແທນກອງປະຊຸມກໍ່ໄດ້ປະກອບຄໍາຄິດຄໍາເຫັນ ເພື່ອຊອກຫາວີທີການແກ້ໄຂໃນບາງວຽກງານກ່ຽວກັບຟື້ນຟູຊີວິດການເປັນຢູ່ໃຫ້ແກ່ປະຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳອູ 4 ທີ່ຈະສືບຕໍ່ຈັດຕັ້ງປະຕີບັດໃຫ້ສໍາເລັດ, ຮັບປະກັນຄວາມຖືກຕ້ອງສອດຄ່ອງກັບລະບຽບຫຼັກການ ແລະ ເປັນທໍາໃຫ້ແກ່ປະຊາຊົນ.
ພາບ-ຂ່າວ: ສູນທອງ ວິໄລຈິດ