ວັນທີ 21 ຕຸລາ 2022 ນີ້, ໜ່ວຍສະຫະພັນແມ່ຍິງສະພາປະຊາຊົນ ແຂວງຫົວພັນ ໄດ້ຈັດກອງປະຊຸມ ປະເມີນເນື້ອໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈໍາປີ 2022 ຂຶ້ນ, ຢູ່ທີ່ຫ້ອງປະຊຸມສະພາປະຊາຊົນແຂວງ. ພາຍໃຕ້ການເປັນປະທານ ຂອງສະຫາຍ ນາງ ພອນສີ ໄຊຍະບຸນ ຄະນະບໍລິຫານງານສະຫະພັນແມ່ຍິງແຂວງ, ຫົວໜ້າໜ່ວຍສະຫະພັນແມ່ຍິງສະພາປະຊາຊົນ ແຂວງຫົວພັນ, ເປັນກຽດເຂົ້າຮ່ວມຂອງ ສະຫາຍ ແທັງ ວິໄລພອນ ຄະນະໜ່ວຍພັກຜູ້ຊີ້ນຳວຽກງານອົງການຈັດຕັ້ງມະຫາຊົນ ສະພາປະຊາຊົນແຂວງ ພ້ອມດ້ວຍບັນດາສະມາຊິກແມ່ຍິງພາຍໃນໜ່ວຍເຂົ້າຮ່ວມທັງໝົດ15 ສະຫາຍ.

           ກອງປະຊຸມຄັ້ງນີ້, ໄດ້ຮັບຟັງ ການສະຫລຸບລາຍງານ ດ້ານດີຜົນງານ ແລະ ດ້ານອ່ອນຄົງຄ້າງ ໃນການຈັດຕັ້ງປະຕິບັດໜ້າທີ່ວຽກງານຕາມເນື້ອຂໍ້ແຂ່ງຂັນ 3 ດີ ໃນໄລຍະ 1 ປີ ຜ່ານມາ ແລະ ທິດທາງແຜນການສ້າງໜ່ວຍແມ່ຍິງ 3 ດີ ປະຈຳປີ 2023. ພ້ອມນີ້; ກອງປະຊຸມຍັງໄດ້ປະກອບຄຳຄິດຄຳເຫັນ ຢ່າງກົງໄປກົງມາໃສ່ບົດສະຫລຸບ ແລະ ທິດທາງ ເພື່ອໃຫ້ມີເນື້ອໃນຄົບຖ້ວນ, ສາມາດຈັດຕັ້ງປະຕິບັດໄດ້. ຈາກນັ້ນ; ໄດ້ປະເມີນຜົນເນື້ອໃນການຈັດຕັ້ງປະຕິບັດຂໍ້ແຂ່ງຂັນແມ່ຍິງ 3 ດີ; ພາຍໃນໜ່ວຍສະຫະພັນແມ່ຍິງສະພາປະຊາຊົນແຂວງ ມີສະມາຊິກແມ່ຍິງທັງໝົດ 19 ສະຫາຍ ປະເມີນຕົວຈິງ 18 ສະຫາຍ, ເຊິ່ງແຕ່ລະສະຫາຍໄດ້ຜ່ານໃບສຳຫຼວດຕົນເອງ, ພ້ອມກັນຕີລາຄາແບ່ງປະເພດຕາມເງື່ອນໄຂມາດຖານຂໍ້ແຂ່ງຂັນແມ່ຍິງ 3 ດີ, ຜ່ານການຕີລາຄາແບ່ງປະເພດ ສາມາດຍາດໄດ້ບຸກຄົນ 3 ດີ ຈາກນັ້ນ; ສະມາຊິກພາຍໃນໜ່ວຍໄດ້ລົງປະຊາມະຕິຮັບຮອງເອົາໜ່ວຍແມ່ຍິງຂອງຕົນ ເປັນໜ່ວຍແມ່ຍິງ 3 ດີ, ພ້ອມທັງ; ສະເໜີຂັ້ນເທິງຄົ້ນຄວ້າອອກໃບຢັ້ງຢືນໃຫ້ໜ່ວຍສະຫະພັນແມ່ຍິງ ສະພາປະຊາຊົນແຂວງ ເປັນໜ່ວຍແມ່ຍິງ 3 ດີປີ 2022 .

              ຕອນທ້າຍ; ສະຫາຍ ແທັງ ວິໄລພອນໄດ້ມີຄຳເຫັນໂອ້ລົມ ກ່ອນອື່ນໝົດ ສະຫາຍໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວວຽກງານ ແມ່ຍິງໃນໄລຍະ 1 ປີຜ່ານມາທີ່ໄດ້ ພ້ອມກັນ ເຮັດສຳເລັດໜ້າທີ່ ວຽກງານການເມືອງຂອງຕົນ ແລະ ຮຽກຮ້ອງໃຫ້ສະມາຊິກພາຍໃນໜ່ວຍແມ່ຍິງທັງໝົດ ຈົ່ງພ້ອມກັນເປັນເອກະພາບ; ຮັກສາມູນເຊື້ອຄວາມສາມັກຄີພາຍໃນ ແລະ ພາຍນອກ, ເປັນເຈົ້າການນຳກັນສ້າງຂະບວນການໃຫ້ດີກວ່າເກົ່າ, ສືບຕໍ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ; ເອົາໃຈໃສ່ ສ້າງຄວາມກ້າຫານ ແລະ ບຸກບືນຕໍ່ຫນ້າທີ່ວຽກງານວິຊາສະເພາະຂອງຕົນ ໃຫ້ນັບມື້ນັບດີຂຶ້ນ ແລະ ສ້າງໜ່ວຍແມ່ຍິງໃຫ້ກາຍເປັນໜ່ວຍແມ່ຍິງ 3ດີຄັ້ງໄປ.

ພາບ ແລະ ຂ່າວ: ສພຂ