ວັນທີ 12 ຕຸລາ 2022 ນີ້, ກໍາມະບານຮາກຖານ ສະພາປະຊາຊົນແຂວງຫົວພັນ ໄດ້ຈັດກອງປະຊຸມປະເມີນຜົນເນື້ອໃນ ຂໍ້ແຂ່ງຂັນ 5 ເປັນເຈົ້າ ປະຈຳປີ 2022 ຂື້ນ ຢູ່ທີ່ ຫ້ອງປະຊຸມ ສະພາປະຊາຊົນແຂວງ ໂດຍການເປັນປະທານ ຂອງສະຫາຍ ສຸກມີໄຊ ສິງບຸນເຮືອງ ຮອງປະທານກວດກາໜ່ວຍພັກ, ຮອງເລຂາທິການ ສພຂ, ຄະນະບໍລິຫານງານສະຫະພັນກຳມະບານແຂວງ, ປະທານກຳມະບານຮາກຖານ ສະພາປະຊາຊົນແຂວງ; ເປັນກຽດເຂົ້າຮ່ວມຂອງ ສະຫາຍ ແທງ ວິໄລພອນ ຄະນະໜ່ວຍພັກ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ກຳມະການຄະນະປະຈຳ, ປະທານຄະນະກຳມະການ ເສດຖະກິດ ແຜນການ ແລະ ການເງິນ ສະພາປະຊາຊົນແຂວງ ພ້ອມດ້ວຍບັນດາສະມາຊິກກຳມະບານຮາກຖານພາຍໃນສະພາປະຊາຊົນແຂວງ ເຂົ້າຮ່ວມ.

          ໃນກອງປະຊຸມ ໄດ້ຮັບຟັງການຜ່ານຮ່າງບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2022 ແລະ ທິດທາງແຜນການ ປີ 2023 ຂອງກຳມະບານຮາກຖານ ສພຂ ແລະ ບົດແນະນຳ ສະບັບເລກທີ 284/ສກລ, ລົງວັນທີ 17 ມີນາ 2022 ກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ ຈາກສະຫາຍ ປະທານ, ຮອງປະທານ ກຳມະບານຮາກຖານ ສພຂ ເຊິ່ງໄດ້ຍົກໃຫ້ເຫັນດ້ານດີຜົນງານ ແລະ ດ້ານອ່ອນຂໍ້ຄົງຄ້າງ, ພ້ອມກັນປະກອບຄໍາຄິດເຫັນໃສ່ຮ່າງບົດສະຫຼຸບໃຫ້ມີເນື້ອໃນຄົບຖ້ວນ ແລະ ສາມາດຈັດຕັ້ງປະຕິບັດໄດ້; ຈາກນັ້ນ, ສະມາຊິກກຳມະບານ ທຸກສະຫາຍໄດ້ຜ່ານໃບສຳຫຼວດຕົນເອງ, ພ້ອມທັງ ຕໍານິສົ່ງຂ່າວ ກໍ່ສ້າງເຊິ່ງກັນ ແລະ ກັນ, ພ້ອມທັງ ປະເມີນໃຫ້ຄະແນນຕົນເອງ ແລະ ໝູ່ຄະນະ; ແລ້ວຕີລາຄາແບ່ງປະເພດຕາມເນື້ອໃນຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວວາງອອກ. ຜ່ານການປະເມີນຕີລາຄາ ມີປະເພດດີເລີດ, ປະເພດດີສ່ວນປະເພດກາງ ແລະ ອ່ອນແມ່ນບໍ່ມີ. ອີງໃສ່ມາດຖານເງື່ອນໄຂ ເຫັນວ່າກຳມະບານຮາກຖານສະພາປະຊາຊົນແຂວງ ສາມາດສະເໜີຂັ້ນເທິງຮັບຮອງເປັນກຳມະບານຮາກຖານ 5 ເປັນເຈົ້າປະຈຳ ປີ 2022.

         ຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ຂອງສະຫາຍ ແທງ ວິໄລພອນ ຄະນະໜ່ວຍພັກ, ຜູ້ຊີ້ນຳວຽກງານອົງການຈັດຕັ້ງມະຫາຊົນ ຊຶ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວວຽກງານກໍາມະບານ ທີ່ຍາດມາໄດ້ໃນໄລຍະ 1 ປີ ຜ່ານມາ. ພ້ອມທັງຮຽກຮ້ອງໃຫ້ຄະນະກຳມະບານຮາກຖານກໍຄືສະມາຊິກກຳມະບານພາຍໃນຮາກຖານທັງໝົດ ເອົາໃຈໃສ່ສຶກສາອົບຮົມການເມືອງແນວຄິດ, ກຳໄດ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໂດຍສະເພາະແມ່ນບັນດາສະຫາຍສະມາຊິກກຳມະບານທີ່ເປັນພະນັກງານຫຼັກແຫຼ່ງນຳພາ-ຄຸ້ມຄອງຢູ່ແຕ່ລະຂະແໜງ ຕ້ອງເປັນແບບຢ່າງທີ່ດີ ເພື່ອໃຫ້ຜູ້ອື່ນໄດ້ຮຽນນຳ ຄືດັ່ງຄຳເວົ້າທີ່ວ່າ“ຄວາມເປັນແບບຢ່າງທີ່ດີ ແມ່ນການນຳພາທີ່ດີ”, ສາມາດເຮັດໃຫ້ສະມາຊິກກຳມະບານ ມີແນວຄິດອຸ່ນອຽນທຸ່ນທ່ຽງ, ເຂັ້ມແຂງ,ໜັກແໜ້ນທາງດ້ານການເມືອງ ຍົກສູງສະຕິຕື່ນຕົວ ແລະ ຄວາມຮັບຜິດຊອບ, ຄວາມເປັນເຈົ້າການໃຫ້ສູງຂຶ້ນ; ເພີ່ມທະວີຄວາມສາມັກຄີພາຍໃນໜັກແໜ້ນ ແລະ ພາຍນອກກວ້າງຂວາງ, ຍົກສູງຄວາມຮູ້, ຄວາມສາມາດ ແລະ ເປັນແບບຢ່າງນຳໜ້າຮັກສາມູນເຊື້ອ ກຳມະບານຮາກຖານ 5 ເປັນເຈົ້າໃນປີຕໍ່ໆໄປ; ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງສູນກາງສະຫະພັນກໍາມະບານລາວ ແລະ ມະຕິ ຄັ້ງທີ VIII ຂອງສະຫະພັນກໍາມະບານ ແຂວງຫົວພັນ ໃຫ້ປະກົດຜົນເປັນຈິງ, ສືບຕໍ່ປົກປ້ອງສິດຜົນປະໂຫຍດອັນຊອບທຳຂອງກຳມະກອນ ແລະ ຊາວຜູ້ອອກແຮງງານເພື່ອປະກອບສ່ວນເຂົ້າໃນພາລະກິດປົກປັກຮັກສາ, ສ້າງສາພັດທະນາປະເທດຊາດ ແລະ ຈັດຕັ້ງປະຕິບັດແຜນການກຳມະບານວາງອອກໃຫ້ບັນລຸຕາມຈຸດປະສົງທີ່ວາງໄວ້.