ໃນວັນທີ 28 ຕຸລາ 2022​ ນີ້. ທີ່ສະໂມສອນເມືອງຊານໄຊ,​ ສະມາຊິກສະພາແຫ່ງຊາດ (ສສຊ) ເຂດເລືອກຕັ້ງທີ 17 ແຂວງອັດຕະປື ແລະ​ ສະມາຊິກສະພາປະຊາຊົນແຂວງ​ (ສສຂ)​ ປະຈໍາເຂດເລືອກຕັ້ງເມືອງຊານໄຊ ໄດ້ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ຊຸດທີ II. ໂດຍການເປັນປະທານຂອງ ທ່ານ​ ສຸກສໍາລານ ໄຊຍະແສງ ສສຊ ເຂດ17, ຮອງປະທານ ສພຂ​ ຮ່ວມກັບທ່ານ ບຸນເນັມ​ ໄຊຍະເສັ້ມ​ ສສຂ​ ປະຈໍາເຂດເລືອກຕັ້ງເມືອງ ເຂົ້າຮ່ວມມີບັນດາທ່ານຄະນະປະຈໍາ​ພັກ​ເມືອງ,​ກໍາມະການພັກເມືອງ, ຫົວໜ້າ-ຮອງ​ຫົວໜ້າ​ຫ້ອງການ,​ກໍາລັງປກຊ-ປກສ​ ແລະ​ ພະນັກງານ-ລັດຖະກອນ ພ້ອມດ້ວຍອໍານາດການປົກຄອງບ້ານອ້ອມຂ້າງເມືອງເຂົ້າຮ່ວມ.

ສະມາຊິກສະພາແຫ່ງຊາດ ເຂດເລືອກຕັ້ງທີ 17​ ແລະ​ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນຍົກເອົາບັນຫາສໍາຄັນທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II.ເຊິ່ງແນໃສ່ເຮັດໃຫ້ພະນັກງານ-ລັດຖະກອນ ຮັບຮູ້ ແລະ ເຂົ້າໃຈຕໍ່ການນຳພາຂອງພັກ, ລະບຽບກົດຫມາຍຂອງລັດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືຂອງແຂວງ ແລະ ແນ່ໃສ່ຮັບຮູ້ ແລະ ເຂົ້າໃຈຕໍ່ລະບົບກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ແລະ ເນື້ອໃນວຽກງານສຳຄັນທີ່ໄດ້ພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ພ້ອມກັນນໍາເອົານິຕິກໍາໃຕ້ກົດໝາຍ ກໍຄືມະຕິທີ່ໄດ້ຮັບຮອງໄປຈັດຕັ້ງເຜີຍແຜ່ ແລະ ຈັດຕັ້ງປະຕິບັດຫັນເຂົ້າໃນວຽກງານຂອງຕົນຢ່າງເປັນຮູບປະທໍາ ແລະ ມີຜົນສໍາເລັດ ເຮັດໃຫ້ພໍ່ແມ່ປະຊາຊົນຫລຸດພົ້ນອອອກຈາກຄວາມທຸກຍາກເປັນກ້າວໆ.
ໃນນັ້ນ, ຜູ້ເຂົ້າຮ່ວມຍັງໄດ້ມີຄໍາສະເໜີ ແລະ ແລກປ່ຽນຄໍາຄິດຄໍາເຫັນ ເປັນຕົ້ນ: ດ້ານປະກົດການຫຍໍ້ທໍ້ຕ່າງໆ,​ ດ້ານບັນຫາຂໍ້​ຫຍຸ້ງຍາກ, ຂໍ້ຄົງຄ້າງໃນການຈັດຕັ້ງແຜນພັດທະນາເສດຖະກິດ-ສັງຄົມພາຍໃນເມືອງ,​ ບາງຄໍາສະເໜີ ສສຊ-ສສຂ ຍັງໄດ້ຮັບເອົາໄປຄົ້ນຄວ້າ ນໍາສະເໜີຕາມຂັ້ນຕອນເພື່ອໃຫ້ພາກສ່ວນທີ່ກ່ຽວຂ້ອງລົງຕິດຕາມແກ້ໄຂຕາມຄວາມເໝາະສົມ.
(ນັກຂ່າວ: ສພຂ ອັດຕະປື)