ລະຫວ່າງວັນທີ 24-28 ຕຸລາ 2022 ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງບໍ່ແກ້ວ ໄດ້ເຂົ້າຮ່ວມກອງປະຊຸມທາບທາມຮ່າງກົດໝາຍທີ່ຈະນໍາເຂົ້າຜ່ານກອງປະຊຸມສະໄໝສາມັນເທື່ອທີ 04 ຂອງສະພາແຫ່ງຊາດ ຊຸດທີ IX ຢູ່ທີ່ສະໂມສອນແຂວງອຸດົມໄຊ, ໂດຍການເປັນປະທານຂອງທ່ານ ພົທ ສຸວອນ ເລືອງບຸນມີ ກໍາມະການສູນກາງພັກ, ຮອງປະທານສະພາແຫ່ງຊາດ.
ເຂົ້າຮ່ວມມີທ່ານ ຄໍາດີ ວົງລ້ອມ ປະທານສະພາປະຊາຊົນແຂວງອຸດົມໄຊ, ມີສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ 4 ແຂວງຄື: ແຂວງຜົ້ງສາລີ, ແຂວງລວງນໍ້າທາ, ແຂວງອຸດົມໄຊ ແລະ ແຂວງບໍ່ແກ້ວ(ເຂດເລືອກຕັ້ງທີ 2–5), ມີຄະນະຄົ້ນຄວ້າ, ກອງເລຂາຄະນະຄົ້ນຄວ້າຮ່າງກົດໝາຍ ແລະ ຄະນະຮັບຜິດຊອບກອງປະຊຸມເຂົ້າຮ່ວມ.
ເພື່ອລະດົມແນວຄວາມຄິດ, ຄຳເຫັນ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃນຖານະຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ເພື່ອນຳມາປັບປຸງໃສ່ຮ່າງກົດໝາຍໃຫ້ມີເນື້ອໃນຄົບຖ້ວນ, ຮັດກຸມ ແລະ ແທດເໝາະກັບການຈັດຕັ້ງປະຕິບັດຕົວຈິງ ກ່ອນນຳສະເໜີກອງປະຊຸມຄະນະປະຈຳສະພາແຫ່ງຊາດ ພິຈາລະນາ ແລ້ວນຳເຂົ້າຜ່ານໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX;
ເພື່ອຮັບປະກັນຄວາມເຂົ້າໃຈເປັນເອກະພາບ ຂອງບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຕໍ່ການກຳນົດເນື້ອໃນຂອງຮ່າງກົດໝາຍ ຢ່າງມີປະສິດທິພາບ ແລະ ປະສິດທິຜົນ.
ກອງປະຊຸມຜູ້ຕາງໜ້າຄະນະຮັບຜິດຊອບສ້າງຮ່າງກົດໝາຍໄດ້ສະເໜີໂດຍຫຍໍ້ກ່ຽວກັບເຫດຜົນ, ຄວາມ ຈໍາເປັນ ແລະ ຄາດຄະເນຜົນໄດ້ຮັບຈາການສ້າງຮ່າງກົດໝາຍຈໍານວນ 12 ສະບັບສ້າງໃໝ່ 3 ສະບັບຄື: ຮ່າງກົດໝາຍວ່າດ້ວຍໜັງສືຜ່ານແດນ(ສ້າງໃໝ່), ຮ່າງກົດໝາຍວ່າດ້ວຍການຄົມມະນາຄົມທາງນໍ້າ(ສ້າງໃໝ່) ແລະ ຮ່າງກົດໝາຍວ່າດ້ວຍພິພິທະພັນ(ສ້າງໃໝ່) ແລະ ສະເໜີປັບປຸງ 9 ສະບັບຄື: ກົດໝາຍວ່າດ້ວຍທະນາຍຄວາມ(ສະບັບປັບປຸງ), ກົດໝາຍວ່າດ້ວຍທະບຽນສານ(ສະບັບປັບປຸງ), ກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່(ສະບັບປັບປຸງ), ກົດໝາຍວ່າດ້ວຍວິສາຫະກິດ(ສະບັບປັບປຸງ), ກົດໝາຍວ່າດ້ວຍທຸລະກໍາທາງເອເລັກໂຕຣນິກ(ສະບັບປັບປຸງ), ກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ(ສະບັບປັບປຸງ), ກົດໝາຍວ່າດ້ວຍອົງການໄອຍະການທະຫານ(ສະບັບປັບປຸງ), ກົດໝາຍວ່າດ້ວຍການກວດສອບແຫ່ງລັດ ແລະ ກົດໝາຍວ່າດ້ວຍການກວດກາແຫ່ງລັດ(ສະບັບປັບປຸງ).
ປະ ທານກອງປະຊຸມສະເໜີເຈາະຈີ້ມຕໍ່ບາງເນື້ອໃນ ເພື່ອເປັນຈຸດສຸມໃນການປະກອບຄຳເຫັນ, ຫຼັງຈາກນັ້ນ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໄດ້ຄົ້ນຄວ້າ, ຫຼັງຈາກນັ້ນບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ປະກອບຄໍາຄິດຄໍາເຫັນຢ່າງເປັນຂະບວນຟົດຟື້ນ, ມີຈຸດສຸມ ແລະ ຄວາມຮັບຜິດຊອບສູງ ເພື່ອເຮັດໃຫ້ບັນດາຮ່າງກົດໝາຍດັ່ງກ່າວມີເນື້ອໃນຄົບຖ້ວມ, ສົມບູນ ແລະ ຖືກກັບສະພາບຄວາມຂອງສັງຄົມໃນປັດຈຸບັນ ແລະ ສາມາດນໍາເຂົ້າໄປພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 04 ຂອງສະພາແຫ່ງຊາດ ຊຸດທີ IX.
ໃນຕອນທ້າຍກອງປະຊຸມ ທ່ານ ພົທ ສຸວອນ ເລືອງບຸນມີ ໄດ້ສະແດງຄວາມຍ້ອງຍໍຊົມເຊີຍ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ທີ່ໄດ້ເອົາໃຈໃສ່ຄົ້ນຄວ້າ, ປະກອບຄຳເຫັນຢ່າງກົງໄປກົງມາ ແລະ ມີເນື້ອໃນຈິດໃຈທີ່ສະແດງເຖິງຄວາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າຢ່າງແທ້ຈິງ. ພ້ອມນັ້ນ, ກໍໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບແຕ່ລະຮ່າງກົດໝາຍທີ່ໄດ້ຂຶ້ນສະເໜີເຫດຜົນ ແລະ ຄວາມຈຳເປັນຂອງການສ້າງ ຫຼື ປັບປຸງກົດໝາຍແຕ່ລະສະບັບ ແລະ ໄດ້ຊີ້ແຈງບາງຄຳເຫັນທີ່ຖືກຍົກຂຶ້ນ ຢ່າງຈະແຈ້ງ.
