ເພື່່ອເປັນການເສີມຂະຫຍາຍສາຍພົວພັນທີ່ເປັນມູນເຊື້ອ, ຄວາມສາມັກຄີເເບບພິເສດອ້າຍນ້ອງ ແລະ ການຮ່ວມມືຮອບດ້ານລະຫວ່າງລາວ – ຫວຽດນາມທີ່ມີມາແຕ່ດຶກດໍາບັນໃຫ້ເຕີບໃຫຍ່ຂະຫຍາຍຕົວ, ເຕັມໄປດ້ວຍຄວາມໝາຍອັນເລິກເຊິ່ງ ແລະ ເກີດດອກອອກຜົນ ກໍຄື ຫົວພັນ – ແທັງຮວ່າ ເວົ້າລວມ; ເວົ້າສະເພາະ ສະພາປະຊາຊົນ ແຂວງຫົວພັນ ແລະ ສະພາປະຊາຊົນ ແຂວງແທັງຮວ່າ ສສ ຫວຽດນາມ ໃຫ້ນັບມື້ກ້າວເຂົ້າສູ່ລວງເລິກ ແລະ ເປັນການສືບຕໍ່ຜັນຂະຫຍາຍບົດບັນທຶກຊ່ວຍຈໍາທີ່ກອງປະຊຸມພົບປະແລກປ່ຽນບົດຮຽນການເຄື່ອນໄຫວລະຫວ່າງສະພາປະຊາຊົນແຂວງຫົວພັນແຫ່ງ ສປປລາວ ແລະ ສະພາປະຊາຊົນ ແຂວງແທັງຮ່ວາ ແຫ່ງ ສສ ຫວຽດນາມທີ່ໄດ້ລົງນາມຄັ້ງວັນທີ 20 ເມສາ 2019 ທີ່ນະຄອນຊໍາເຊິນ ແຂວງແທັງຮ່ວາ ສສຫວຽດນາມ.

ໃນລະຫວ່າງວັນທີ 28-30 ກັນຍາ 2022 ຜ່ານມານີ້ ສະພາປະຊາຊົນ ແຂວງຫົວພັນ ແລະ ສະພາປະຊາຊົນ ແຂວງແທັງຮວ່າ ໄດ້ຈັດກອງປະຊຸມພົບປະແລກປ່ຽນບົດຮຽນຮ່ວມກັນຢູ່ທີ່ ນະຄອນເຊີມເຊີນ ແຂວງແທັງຮວ່າ ສສ ຫວຽດນາມ ເຊິ່ງຝ່າຍລາວນຳໂດຍ ສະຫາຍ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ ທັງເປັນປະທານ ສະພາປະຊາຊົນແຂວງ ແລະ ຝ່າຍຫວຽດນາມ ສະຫາຍ ລ້າຍ ເທ້ ຫງວຽນ ຮອງເລຂາຜູ້ປະຈຳການປະທານຄະນະສະມາຊິກສະພາແຫ່ງຊາດ ແຂວງແທັງຮວ່າ ສສ ຫວຽດນາມ

ໃນວາລະກອງປະຊຸມທັງສອງຝ່າຍໄດ້ພັດປ່ຽນກັນ ລາຍງານ ໂດຍຫຍໍ້ກ່ຽວກັບການພັດທະນາເສດຖະກິດ – ສັງຄົມຂອງແຂວງ ແລະ ການເຄື່ອນໄຫວວຽກງານ ຂອງສະພາປະຊາຊົນແຂວງໃຫ້ກັນ ແລະ ກັນໄດ້ຮັບຊາບ ຈາກນັ້ນຜູ້ເຂົ້າຮ່ວມກອງປະຊຸມທັງສອງຝ່າຍກໍໄດ້ພ້ອມກັນສົນທະນາແລກປ່ຽນບົດຮຽນນໍາກັນຫລາຍດ້ານ ເພື່ອເຮັດໃຫ້ ການເຄື່ອນໄຫວວຽກງານຂອງ ສອງສະພາປະຊາຊົນແຂວງ ມີຄວາມເຕີບໃຫ່ຍເຂັ້ມແຂງຂຶ້ນເລື້ອຍໆ.ໃນຕ້ອນທ້າຍ ຂອງກອງປະຊຸມພົບປະແລກປ່ຽນທັງສອງຝ່າຍຍັງໄດ້ເຊັນບົດບັນທຶກຮ່ວມກັນ ແລະ ໂອກາດນີ້ທາງຄະນະຍັງໄດ້ໄປຢ້ຽມຢາມ, ທ່ຽວຊົມ ເຂດເສດຖະກິດພິເສດຫງີເຊິນ ແຂວງແທັງຮ່ວາຕື່ມອີກ.

          ພາບ ແລະ ຂ່າວ: ສພຂ