ເປີດງານວາງສະແດງຮູບພາບຜົນສໍາເລັດການປົກປັກຮັກສາ ແລະ ສ້າງສາພັດທະນາປະເທດຊາດ ຕິດພັນກັບຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ

(ສພຊ) – ພິທີເປີດງານວາງສະແດງຮູບພາບພາຍໃຕ້ຫົວຂໍ້ “ຜົນສໍາເລັດການປົກປັກຮັກສາ ແລະ ສ້າງສາພັດທະນາປະເທດຊາດ ຕິດພັນກັບຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ” ໄດ້ຈັດຂຶ້ນທີ່ຫໍພິພິທະພັນ ໄກສອນ ພົມວິຫານ ເມື່ອວັນສຸກທີ 28 ພະຈິກຜ່ານມາ ໂດຍມີສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ບັນດາສະຫາຍກຳມະການກົມການເມືອງສູນກາງພັກ, ເລຂາທິການສູນກາງພັກ, ກຳມະການສູນກາງພັກ, ອະດີດການນໍາຂັ້ນສູງພັກ-ລັດ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນພິທີ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ໄດ້ກ່າວວ່າ: 50 ປີຜ່ານມາ, ປະເທດຊາດຂອງພວກເຮົາ ໄດ້ຜ່ານຜ່າເສັ້ນທາງແຫ່ງການພັດທະນາທີ່ເຕັມໄປດ້ວຍຜົນສໍາເລັດອັນໃຫຍ່ຫຼວງໃນແຕ່ລະໄລຍະ ພາຍໃຕ້ການນໍາພາຂອງພັກປະຊາຊົນປະຕິວັດລາວ ໂດຍແມ່ນປະທານ ໄກສອນ ພົມວິຫານ ເປັນຜູ້ນຳໜ້າ ແລະ ຮຸ່ນສືບທອດແຕ່ລະສະໄໝ ຈົນເຖິງປັດຈຸບັນ ໂດຍສະເພາະແນວທາງການປ່ຽນແປງໃໝ່ ເຊິ່ງເຮັດໃຫ້ປະເທດຊາດພວກເຮົາ ໄດ້ບັນລຸຜົນສໍາເລັດທີ່ໜ້າພາກພູມໃຈໃນຫຼາຍຂົງເຂດ. ງານວາງສະແດງຄັ້ງນີ້ ສະແດງໃຫ້ເຫັນໝາກຜົນ, ເຫດການອັນສໍາຄັນ, ໂດດເດັ່ນ, ເລິກເຊິ່ງ ແລະ ປະທັບໃຈທີ່ສຸດ ທີ່ສະທ້ອນໃຫ້ເຫັນວິວັດທະນາການແຫ່ງການກຳເນີດເກີດຂຶ້ນ ທີ່ສະແດງເຖິງຜົນສໍາເລັດໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕິດພັນກັບຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ. ງານວາງສະແດງຄັ້ງນີ້ ຍັງເປັນການປະກອບສ່ວນສໍາຄັນອັນໜຶ່ງ ເຂົ້າໃນການສຶກສາອົບຮົມມູນເຊື້ອອັນສະຫງ່າງາມຂອງພັກ-ຂອງຊາດ ກໍຄືສຶກສາຮໍ່າຮຽນເອົາແບບຢ່າງອັນດີເດັ່ນ, ຄຸນສົມບັດສິນທຳປະຕິວັດອັນໃສແຈ້ງຂອງປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກ ເປັນຜູ້ນໍາໜ້າພາທາງ ແລະ ຄວາມເສຍສະຫຼະທັງເຫື່ອແຮງ, ຈິດໃຈ ແລະ ສະຕິປັນຍາ ພ້ອມທັງຊີວິດອິນຊີອັນລໍ້າຄ່າຂອງບັນດາສະຫາຍພະນັກງານສະມາຊິກພັກໃນແຕ່ລະໄລຍະຂອງການປະຕິວັດ ເພື່ອເຊີດຊູຄັນທຸງຊະນະເລີດຂອງພັກ, ເພື່ອຄວາມຈະເລີນວັດທະນາຂອງປະເທດຊາດອັນແສນຮັກ, ເພື່ອຄວາມຢູ່ເຢັນເປັນສຸກຂອງປະຊາຊົນ; ທັງນີ້, ກໍເພື່ອເຮັດໃຫ້ຄົນຮຸ່ນຫຼັງ ໂດຍສະເພາະຮຸ່ນໜຸ່ມ ໃຫ້ຢຶດໝັ້ນອຸດົມການຂອງພັກ, ສືບທອດມູນເຊື້ອຂອງນັກປະຕິວັດຮຸ່ນອາວຸໂສ, ເດັດດ່ຽວພາປະເທດຊາດກ້າວຂຶ້ນຢ່າງໜັກແໜ້ນ.
ສໍາລັບເນື້ອໃນການຈັດວາງສະແດງ ປະກອບມີ II ພາກໃຫຍ່ຄື: ພາກທີ I ຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ 1920-1992, ພາກທີ II ຜົນສໍາເລັດການປົກປັກຮັກສາ ແລະ ສ້າງສາພັດທະນາປະເທດຊາດ ຕິດພັນກັບຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ 1975-2025; ລວມມີຮູບພາບ, ເອກະສານ ແລະ ວັດຖຸພັນ ທັງໝົດ 334 ຊິ້ນ.