ຕອນບ່າຍວັນສຸກ, ວັນທີ 14 ຕຸລາ 2022 ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງ. ສພຂ ໄດ້ສະຫລຸບຕີລາຄາການລົງເຄື່ອນໄຫວຕິດຕາມກວດກາ, ພົບປະຜູ້ມີສິດເລືອກຕັ້ງ ແລະ ຈັດຊຸດຝຶກອົບຮົມສ້າງຄວາມເຂັມແຂງໃຫ້ ສສຂ ແລະ ພະນັກງານຊ່ວຍວຽກ, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານ ສພຂ, ມີຮອງປະທານ ສພຂ, ມີບັນດາທ່ານຄະນະປະຈໍາ, ຮອງປະທານຄະນະກຳມະການ, ຄະນະເລຂາທິການ, ຫົວໜ້າຂະແໜງ-ຮອງຂະແໜງ ແລະ ພະນັກງານວິຊາການພາຍໃນ ສພຂ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມແມ່ນເພື່ອສະຫລຸບຕີລາຄາ ການລົງເຄື່ອນໄຫວຕິດຕາມກວດກາໂຄງການຂຸດຄົ້ນແຮ່ຄຳ ຂອງບໍລິສັດລາວຊິນຫຼົງ ບຸກເບີກອຸດສາຫະກຳບໍ່ແຮ່ຈຳກັດ ຢູ່ເມືອງປາກແບງ, ການພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ່ 3 ຂອງ ສພຊ ຊຸດທີ IX ແລະ ສພຂ ຊຸດທີ II ຊຸດ ແລະ ການຈັດຊຸດຝຶກອົບຮົມສ້າງຄວາມເຂັມແຂງໃຫ້ ສສຂ ແລະ ພະນັກງານຊ່ວຍວຽກ ດັ່ງກ່າວເຫັນວ່າມີຂໍ້ສະດວກ, ຂໍ້ຫຍຸ້ງຫຍັງແດ່ ແລະ ມີຜົນໄດ້ຮັບຄືແນວໃດ, ບັນຫາທີ່ຍັງຄົງຄ້າງຄວນຈະມີວີທີ່ທາງແນວໃດ, ເພື່ອເຮັດໃຫ້ການບັນຫາຕ່າງໆ ໄດ້ຮັບການແກ້ໄຂໃຫ້ຖືກຕ້ອງ, ສອດຄອງ ແລະ ທວງທັນກັບເວລາ, ຫລັງຈາກນັ້ນ, ບັນດາທ່ານຜູ້ເຂົ້າຮ່ວມໄດ້ປະກອບຄໍາຄິດເຫັນ ແລະ ມີຄໍາສະເໜີແລກປ່ຽນກັນຢ່າງກົງໄປກົງມາ.

ໃນຕອນທ້າຍປະທານກອງປະຊຸມໄດ້ມີຄໍາເຫັນສະຫລຸບ ທ່ານໄດ້ສະແດງຄວາມຊົມເຊີຍຕໍ່ຄະນະຮັບຜິດ ຊອບທີ່ໄດ້ກະກຽມບັນດາຂໍ້ມູນ ແລະ ເນື້ອໃນຕ່າງໆ ເຮັດໃຫ້ການເຄື່ອນໄຫວສໍາເລັດຕາມກໍານົດເວລາ, ພ້ອມດ່ຽວກັນນັ້ນຍັງເຫັນໄດ້ບັນຫາຕ້ອງໄດ້ສືບຕໍ່ແກ້ໄຂໃນຕໍ່ໜ້າໃຫ້ດີຂຶ້ນກວ່າເກົ່າ.

ພາບ/ຂ່າວ: ແສງພອນ ອິນນະລົງ.