ຮອງປະທານ ສະພາປະຊາຊົນ ນວ ເຄື່ອນໄຫວເຮັດວຽກຢູ່ ເມືອງ ປາກງື່ມ ນວ.

(ສປນວ) ວັນທີ 13 ຕຸລາ 2022, ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ, ທ່ານ ນາງ ເກດມະນີ ບັນດາສັກ, ປະທານ ຄະນະກຳມະການວັດທະນະກຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ເມືອງ ປາກງື່ມ ນວ, ມີ ທ່ານ ຮອງເຈົ້າເມືອງ, ສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງ, ບັນດາທ່ານ ຫົວໜ້າຫ້ອງການກ່ຽວຂ້ອງອ້ອມຂ້າງເມືອງ ແລະ ວິຊາການກ່ຽວຂ້ອງເຂົ້າຮ່ວມ.

ການລົງເຄື່ອນໄຫວເຮັດວຽກໃນຄັ້ງນີ້ ເປັນການລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານຂົງເຂດວັດທະນະທຳ-ສັງຄົມ ໂດຍສະເພາະວຽກງານເຜົ່າ ແລະ ສາສະໜາ ຂອງເມືອງປາກງື່ມ. ທ່ານ ກອງມີ ສີສະໝຸດ, ຮອງເຈົ້າເມືອງ ເມືອງປາກງື່ມ ໄດ້ລາຍງານໃຫ້ຊາບວ່າ: ເມືອງປາກງື່ມ ມີທັງໝົດ 53 ບ້ານ, 11.448 ຄົວເຮືອນ; ມີພົນລະເມືອງທັງໝົດ 57.880 ຄົນ, ຍິງ 29.128 ຄົນ ເຊິ່ງປະກອບດ້ວຍເຜົ່າຕ່າງໆ ລວມທັງໝົດ 10 ຊົນເຜົ່າ ຄື: ຊົນເຜົ່າລາວ, ຊົນເຜົ່າມົ້ງ, ຊົນເຜົ່າອິວມຽນ, ຊົນເຜົ່າໄທເໜືອ, ຊົນເຜົ່າໄຕ, ຊົນ ເຜົ່າຜູ້ໄທ, ຊົນເຜົ່າຫໍ້, ຊົນເຜົ່າກຶມມຸ, ຊົນເຜົ່າລະວີ ແລະ ຊົນເຜົ່າຜູ້ນ້ອຍ; ໃນນັ້ນ, ຊົນເຜົ່າລາວກວມເປັນສ່ວຍໃຫຍ່, ປະຊາຊົນບັນດາເຜົ່າໃນທົ່ວເມືອງມີຄວາມເຊື່ອຖືສາສະໜາເປັນສິ່ງຍຶດໜ່ຽວຈິດໃຈ ປະກອບດ້ວຍ 02 ສາສະໜາ ຄື: ສາສະໜາພຸດ ແລະ ສາສະໜາເຢຊູຄຣິດ; ພາຍໃນເມືອງປາກງື່ມ ມີວັດ ທັງໝົດ 72 ວັດ, ມີວັດຮ້າງ 03 ວັດ ແລະ ມີໂບດ 05 ແຫ່ງ, 01 ນິກາຍ ຄື: ນິກາຍໂປແຕັດສະຕັ້ງ. ປະຊາຊົນສ່ວນໃຫຍ່ແມ່ນຍຶດຖືອາຊີບປູກຝັງ, ລ້ຽງສັດ. ນອກຈາກນັ້ນ, ຍັງໄດ້ຮັບຟັງການລາຍ ງານວຽກງານໃນຂົງເຂດເສດຖະກິດ-ສັງຄົມ ຂອງເມືອງ ອີກດ້ວຍ.

ໃນໂອກາດດັ່ງກ່າວ, ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ ກໍໄດ້ມີຄຳເຫັນຊີ້ນຳຕໍ່ກອງປະຊຸມ ພ້ອມທັງມີຄຳເຫັນແລກປ່ຽນ ແລະ ຮັບເອົາບາງບັນຫາ, ຂໍ້ຫຍຸ້ງຍາກທີ່ຄະນະຮັບຜິດຊອບໃນຂົງເຂດວຽກງານຕ່າງໆ ຂອງເມືອງພົບພໍ້ ເພື່ອນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ໃນຕອນທ້າຍ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນຳເມືອງ, ບັນດາຫ້ອງການເມືອງ ແລະ ທຸກພາກສ່ວນກ່ຽວຂ້ອງ ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍ ແລະ ທິດທາງໃນຕໍ່ໜ້າທີ່ກຳນົດໄວ້ໃຫ້ບັນລຸຄາດໝາຍ ແລະ ສຳເລັດຕາມແຜນການທີ່ວາງໄວ້ ຢ່າງມີປະສິດທິພາບ ແລະ ປະສິດທິຜົນ.

ໃນຕອນບ່າຍຂອງມື້ດຽວກັນນັ້ນ, ຄະນະດັ່ງກ່າວ ກໍໄດ້ລົງເຮັດວຽກ ແລະ ຢ້ຽມຊົມ ວັດທ່າຊ້າງ, ຕັ້ງຢູ່ບ້ານທ່າຊ້າງ ເມືອງປາກງື່ມ ນວ. (ນາງ ໂຮງທ່າວ ຊົງເຢີ)