ໃນຕອນເຊົ້າຂອງວັນທີ 3 ຕຸລາ 2022 ທີ່ຜ່ານມານີ້ ສະພາແຫ່ງຊາດ ໄດ້ຈັດກອງປະຊຸມທາບທາມຄໍາເຫັນໃສ່ຮ່າງກົດໝາຍຈໍານວນ 12 ສະບັບ ຂື່ນຢູ່ທີ່ສະໂມສອນຂອງແຂວງຈໍາປາສັກ ໂດຍການເປັນປະທານກອງປະຊຸມຂອງ ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ ມີບັນດາທ່ານປະທານ-ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ປະທານ-ຮອງປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ຈາກ 4 ແຂວງພາກໃຕ້ ຄື: ແຂວງສາລະວັນ, ແຂວງຈໍາປາສັກ, ແຂວງເຊກອງ ແລະ ແຂວງອັດຕະປື ພ້ອມດ້ວຍພາກສ່ວນທີ່ກ່ຽວຂ້ອງກັບກົດໝາຍເຂົ້າຮ່ວມ.

ວາລະດໍາເນີນກອງປະຊຸມ, ທ່ານ ຄໍາໃບ ດໍາລັດ ປະທານກອງປະຊຸມ ໄດ້ກ່າວຈຸດປະສົງຂອງການດໍາເນີນກອງປະຊຸມວ່າ: ເພື່ອທາບທາມຄໍາເຫັນຂອງບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ຈາກ 4 ແຂວງພາກໃຕ້ ແລະ ພາກສ່ວນກ່ຽວຂ້ອງ ໃສ່ຮ່າງກົດໝາຍ ຈໍານວນ 12 ສະບັບ ໃຫ້ມີເນື້ອໃນຄົບຖ້ວນສົມບູນ ກ່ອນການນໍາເຂົ້າຄົ້ນຄວ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ຈະດໍາເນີນໃນທ້າຍປີ 2022 ນີ້. ຮ່າງກົດໝາຍ ຈໍານວນ 12 ສະບັບ ທີ່ນໍາມາທາບທາມໃນກອງປະຊຸມຄັ້ງນີ້ປະກອບມີ ກົດໝາຍສ້າງໃໝ່ 3 ສະບັບ, ກົດໝາຍສະບັບປັບປຸງ 9 ສະບັບ ຄື: ຮ່າງກົດໝາຍວ່າດ້ວຍໜັງສືຜ່ານແດນ(ສ້າງໃໝ່), ຮ່າງກົດໝາຍວ່າດ້ວຍການທາງນໍ້າ(ສ້າງໃໝ່), ຮ່າງກົດໝາຍວ່າດ້ວຍຫໍພິພິຕະພັນ(ສ້າງໃໝ່), ກົດໝາຍວ່າດ້ວຍທະນາຍຄວາມ(ສະບັບປັງປຸງ), ກົດໝາຍວ່າດ້ວຍທະບຽນສານ(ສ້າງໃໝ່), ກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ(ສະບັບປັບປຸງ), ກົດໝາຍວ່າດ້ວຍວິສາຫະກິດ(ສະບັບປັງປຸງ), ກົດໝາຍວ່າດ້ວຍທຸລະກໍາທາງເອເລັກໂຕຣນິກ(ສະບັບປັບປຸງ), ກົດໝາຍວ່າດ້ວຍການກັນ ແລະ ຄວຍຄຸມພະຍາດຕິດຕໍ່(ສະບັບປັບປຸງ), ກົດໝາຍວ່າດ້ວຍໄອຍະການທະຫານ(ສະບັບປັບປຸງ), ກົດໝາຍວ່າດ້ວຍການກວດສອບແຫ່ງລັດ(ສະບັບປັບປຸງ) ແລະ ກົດໝາຍວ່າດ້ວຍການກວດກາລັດ(ສະບັບປັບປຸງ). ພ້ອມດຽວກັນ, ປະທານກອງປະຊຸມໄດ້ຮຽກຮອງໃຫ້ບັນດາທ່ານຜູ້ແທນກອງປະຊຸມຈົ່ງພ້ອມກັນຍົກສູງຄວາມຮັບຜິດຊອບ ໃນການຄົ້ນຄວ້າປະກອບຄຳເຫັນຢ່າງຕັ້ງໜ້າ ເພື່ອເຮັດເນື້ອໃນໃຫ້ກົດໝາຍຄົບຖ້ວນສົມບູນ, ຮັດກຸມ ແລະ ສ່ອງແສງເຖິງແນວທາງຂອງພັກ, ມີລັກສະນະຊາດ, ລັກສະນະວິທະຍາສາດ, ລັກສະນະສາກົນ ໂດຍສອດຄ່ອງກັບສະພາບຄວາມເປັນຈິງ ຂອງສັງຄົມໃນປັດຈຸບັນ ແລະ ຍາວນານ.

ຈາກນັ້ນ, ກອງປະຊຸມໄດ້ຮັບຟັງການນໍາສະເໜີໂດຍຫຍໍ້ກ່ຽວກັບເຫດຜົນ, ຄວາມຈໍາເປັນ ແລະ ເນື້ອໃນເຈາະຈີມຕໍ່ການສ້າງ ແລະ ປັບປຸງກົດໝາຍ ແຕ່ລະສະບັບ ຈາກຄະນະຮັບຜິດຊອບ. ໂອກາດດຽວກັນ, ບັນດາທ່ານຜູ້ແທນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຈາກ 4 ແຂວງພາກໃຕ້ ໄດ້ພ້ອມກັນປະກອບຄໍາເຫັນ ໃສ່ເນື້ອໃນຮ່າງກົດໝາຍທີ່ຄະນະຮັບຜິດຊອບນໍາສະເໜີຢ່າງມີຈຸດສຸມ, ແນໃສ່ເຮັດໃຫ້ເນື້ອໃນຂອງຮ່າງກົດໝາຍທີ່ສ້າງຂື້ນໃໝ່ ແລະ ສະບັບປັບປຸງ .ໃຫ້ມີເນື້ອໃນຄົບຖ້ວນສົມບູນ, ມີຄວາມຖືຕ້ອງສອດຄ້ອງກັບສະພາບເສດຖະກິດ-ສັງຄົມ ໃນປັດຈຸບັນ ສາມາດພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ຈະມາເຖິງ ແລະ ນໍາໃຊ້ໄດ້ຍາວນາມ. ກອງປະຊຸມຄັ້ງນີ້, ໄດ້ຮັບການສະໜັບສະໜູນຈາກ: ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ(ແຜນງານເຊກາ) ຮ່ວມກັບ ມູນນິທິເອເຊຍ, ເຊິ່ງກອງປະຊຸມຈະສືບຕໍ່ດໍາເນີນໄປຈົ້ນຮອດວັນທີ 7 ຕຸລາ 2022 ຈິງຈະປິດລົງ.
(ພາບ-ຂ່າວ: ສົມວິຈິດ ໄຊມົນຕີ)