ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແຂວງຜົ້ງສາລີ ແລະ ສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້, ແຂວງຜົ້ງສາລີ ໄດ້ດຳເນີນກອງປະຊຸມຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ທີ່ເມືອງບຸນໃຕ້, ແຂວງຜົ້ງສາລີ ໃນຕອນເຊົ້າວັນທີ 29 ກັນຍາ 2022 ທີ່ສະໂມສອນເມືອງບຸນໃຕ້, ແຂວງຜົ້ງສາລີ ໂດຍການເປັນປະທານ ຂອງທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ; ມີຄະນະສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້, ທ່ານ ສານມະນີ ອີນດາວົງ ຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຄະນະ   ພັກ, ກອງບັນຊາການປກຊ-ປກສ, ຫົວໜ້າ-ຮອງຫົວໜ້າຫ້ອງການ, ພະນັກງານ-ລັດຖະກອນ, ແພດໝໍ, ຄູ-ອາຈານ ອ້ອມຂ້າງເມືອງ, ພະນັກງານບໍານານ, ອົງການປົກຄອງບ້ານ, ເຖົ້າແກ່ແນວໂຮມ ແລະ 8 ອົງການຈັດຕັ້ງຂັ້ນບ້ານຂອງ 8ບ້ານພາຍໃນເທດສະບານເມືອງ ເຂົ້າຮ່ວມຈໍານວນ 150 ທ່ານ, ຍິງ 57 ທ່ານ.

ກອງປະຊຸມຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໃນຄັ້ງນີ້ ຮັບຟັງທ່ານ ສຸວັນຟູ ລາວລີ ສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້; ເຜີຍແຜ່ ມະ​ຕິ​ວ່າ​ດ້ວຍ​ການຮັບຮອງເອົາການສະເໜີຍົກຍ້າຍ ທ່ານ ນ. ດວງຈັນ ຊາມຸນຕີ ຫົວໜ້າພະແນກກະສິກຳ ແລະ ປ່າໄປແຂວງ ໄປຮັບໜ້າທີ່ໃໝ່ ຢູ່ແຂວງວຽງຈັນ ສະບັບເລກທີ 40/ສພຂ, ວັນທີ 23 ສິງຫາ 2022;  ມະ​ຕິ​ ວ່າ​ດ້ວຍ​ການຮັບຮອງເອົາການສະເໜີແຕ່ງຕັ້ງ ທ່ານ ສົມຈິດ ສິດທິວົງ ເປັນຫົວໜ້າພະແນກກຳສິກຳ ແລະ ປ່າໄມ້ ແຂວງ ສະບັບເລກທີ 41/ສພຂ, ວັນທີ 23 ສິງຫາ 2022; ມະ​ຕິ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ສະບັບເລກທີ 48/ສພຂ, ວັນທີ 25 ສິງຫາ 2022; ມະ​ຕິ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ເເລະ ແຜນການ 6 ເດືອນທ້າຍປີ 2022 ສະບັບເລກທີ 49/ສພຂ, ວັນທີ 25 ສິງຫາ 2022; ຮັບຟັງທ່ານ ສົມຈິດ ເສີມມີໄຊ ສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້ ເຜີຍແຜ່ ມະ​ຕິ​ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການສະກັດກັ້ນ, ຕ້ານ ແລະ ແກ້ໄຂຢາເສບຕິດ ຢູ່ແຂວງຜົ້ງສາລີ ສະບັບເລກທີ 42/ສພຂ, ວັນທີ 25 ສິງຫາ 2022; ມະ​ຕິ​ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການກໍານົດລາຄາຫົວໜ່ວຍ ການຊົດເຊີຍຜົນກະທົບຈາກໂຄງການພັດທະນາພື້ນຖານໂຄງລ່າງຢູ່ແຂວງຜົ້ງສາລີ ສະບັບເລກທີ 43/ສພຂ, ວັນທີ 25 ສິງຫາ 2022; ມະ​ຕິ​ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການສ້າງກອງທຶນ ກິລາ-ກາຍຍະກຳຂອງແຂວງຜົ້ງສາລີ ສະບັບເລກທີ 44 /ສພຂ, ວັນທີ 25 ສິງຫາ 2022; ມະ​ຕິ​ ວ່າ​ດ້ວຍ​ການຮັບ​ຮອງ​ເອົາ ຂໍ້ຕົກລົງເຈົ້າແຂວງ ວ່າດ້ວຍການຄຸ້ມຄອງ ການຈັດງານບຸນປະເພນີ ຢູ່ແຂວງຜົ້ງສາລີ ສະບັບເລກທີ 45/ສພຂ, ວັນທີ 25 ສິງຫາ 2022; ມະ​ຕິ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານໃນໄລະຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ແລະ ແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II, ສະບັບເລກທີ 47/ສພຂ, ວັນທີ 25 ສິງຫາ 2022; ຮັບຟັງທ່ານ ນາງ ສຸກສະຫວັນ ສຸລິຄໍາ ສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້ ເຜີຍແຜ່ມະ​ຕິ ວ່າ​ດ້ວຍ​ການ​ຮັບ​ຮອງ​ເອົາບົດລາຍງານຜົນການຕິດຕາມກວດກາ ການປັບປຸງຄຸນນະພາບລະບົບການຮຽນ-ການສອນ ໃນທຸກຊັ້ນທຸກສາຍໃນໄລຍະໃໝ່ ຂອງພະແນກສຶກສາທິການ ແລະ ກິລາ ແຂວງ ສະບັບເລກທີ 50/ສພຂ, ວັນທີ 25 ສິງຫາ 2022;

ຮັບຟັງ ທ່ານ ທອງສີ ເສົາສຸລິພົມ ເຜີຍແຜ່ມະຕິຂອງສະພາແຫ່ງ ຊຸດທີ IX ປະກອບມີ 21 ມະຕິ, ປະກອບມີວຽກງານບຸກຄະລາກອນ, ວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ ແລະ ວຽກຂອງການສ້າງ ແລະ ປັບປຸງກົດໝາຍ; ເຊິ່ງມີເນື້ອໃນບາງຕອນທ່ານ ໄດ້ກ່າວວ່າ: “ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປີ 2022 ພາຍໃຕ້ເງື່ອນໄຂທີ່ສະພາບແວດລ້ອມຂອງສາກົນ ແລະ ພາກພື້ນໄດ້ການຜັນແປຢ່າງສະລັບສັບຊ້ອນ ບວກກັບຄວາມຫຍຸ້ງຍາກທາງດ້ານເສດຖະກິດ-ການການເງິນຂອງປະເທດ ທີ່ໄດ້ສະສົມມາເປັນເວລາຫຼາຍປີ, ເຊິ່ງໄດ້ສົ່ງຜົນກະທົບ ແລະ ເປັນສິ່ງທ້າທາຍຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປີ 2022 ເປັນຕົ້ນ: ຄາດໝາຍແຜນເງິນຕາ, ຄາດໝາຍດ້ານແຜນງົບປະມານ ທີ່ເຫັນວ່າຍັງມີຄວາມສ່ຽງທີ່ຈະບໍ່ບັນລຸຕາມແຜນການປີ, ຄາດໝາຍການລະດົມແຫຼ່ງທຶນເພື່ອການພັດທະນາ, ການຂຶ້ນທະບຽນອອກໃບຕາດິນ ແລະ ຄາດໝາຍສູ້ຊົນໃນ ວຽກງານຂົງເຂດວັດທະນະທໍາ-ສັງຄົມ. ພ້ອມກັນນັ້ນ; ທ່ານຍັງໄດ້ຮຽງຮ້ອງທຸກພາກສ່ວນ ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ກໍ່ຄື ທິດທາງໜ້າທີ່ກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງກໍ່ຄືມະຕິກອງປະຊຸມໃຫຍ່ ຂອງອົງຄະນະພັກເມືອງວາງອອກໃຫ້ເລິກເຊິ່ງ ແລະ ຈັດຕັ້ງປະຕິບັດໃຫ້ຖຶກຕາມລະບຽບກົດໝາຍວາງອອກຢ່າງເຂັ້ມງວດ ແລະ ພ້ອມກັນນີ້ກໍໃຫ້ກຳແໜ້ນບັນດາເນື້ອໃນ ມະຕິກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນຂັ້ນແຂວງ ຊຸດທີ II ໄດ້ຮັບຮອງ ເພື່ອເປັນບ່ອນອີງໃນການຊຸກຍູ້ຕາມມະຕິທີ່ສະພາໄດ້ຮັບຮອງໃຫ້ບັນລຸຕາມແຜນການທີ່ໄດ້ວາງໄວ້; ໃຫ້ອົງການປົກຄອງເມືອງ ແລະ ບັນດາທ່ານສະມາຊິກສະພາປະຊາຊົນແຂວງເອົາໃຈໃສ່ ຍົກສູງປະສິດຕິພາບໃນການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ; ຄະນະພັກ ແລະ ອົງການປົກຄອງທຸກຂັ້ນຕ້ອງເອົາໃຈໃສ່ສຶກສາອົບຮົມປະຊາຊົນບັນດາເຜົ່າ ຮັບຮູ້ ເຂົ້າໃຈຕໍ່ຄວາມພະຍາຍາມຂອງພັກ, ລັດຖະບານ, ສະພາແຫ່ງຊາດ ທີ່ໄດ້ອອກເຫື່ອເທແຮງຂຸດຄົ້ນທຸກຄວາມສາມາດບົ່ມຊ້ອນຂອງປະເທດ, ທັງຍາດແຍ່ງ ການພົວພັນຮ່ວມມືກັັບຕ່າງປະເທດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢ່າງມີຈຸດສຸມ ແລະ ມີຄວາມຮັບຜິດຊອບສູງ.”

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ