ວັນທີ 29 ກັນຍາ 2022 ນີ້ ຢູ່ທີ່ສະໂມສອນ ແຂວງຄຳມ່ວນ ໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໃຫ້ແກ່ພະນັກງານການນໍາຫລັກແຫລງ, ພະນັກງານ – ລັດຖະກອນ ໃນກຸ່ມວັດທະນະທຳ – ສັງຄົມ, ອົງການປົກຄອງ ແລະ ການຕ່າງປະເທດ, ມີຕາງໜ້າອົງການພຸດທະສາສະໜາສໍາພັນແຫ່ງຊາດປະຈໍາແຂວງເຂົ້າຮ່ວມ, ໃຫ້ກຽດເປັນປະທານໂດຍ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍສະມາຊິກສະພາແຫ່ງຊາດປະຈໍາເຂດເລືອກຕັ້ງ 12ແຂວງຄຳມ່ວນ ແລະ ສະມາຊິກສະພາປະຊາຊົນຂັ້ນແຂວງ.

ເປັນກຽດ ເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໂດຍ ທ່ານ ໂຕເຊີນ ອຸດທັດສີ  ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 12 ແຂວງຄໍາມ່ວນ  ເຊິ່ງໄດ້ຍົກໃຫ້ເຫັນກ່ຽວກັບບັນຫາສໍາຄັນຂອງຊາດ ເປັນຕົ້ນວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ, ການປັບປຸງ ແລະ ຮັບຮອງເອົາກົດໝາຍ, ຮັບຮອງເອົາບົດລາຍງານການຕິດຕາມຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ແລະ ທິດທາງແຜນການຕິດຕາມກວດກາໃນຕໍ່ໜ້າ ແລະ ວຽກງານດ້ານບຸກຄະລາກອນ ທີ່ໄດ້ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຂອງການນໍາໃນຄະນະລັດຖະບານ.

ທ່ານ ໂຕເຊີນ ອຸດທັດສີ  ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 12 ແຂວງຄໍາມ່ວນ

ໂອກາດດຽວກັນນັ້ນ ທ່ານ ນັນຕະໄຊ ອິນທະສອນ ສະມາຊິກສະພາປະຊາຊົນແຂວງຄໍາມ່ວນ  ໄດ້ຂື້ນເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ,  ທີ່ໄດ້ຍົກໃຫ້ເຫັນໃນການພິຈາລະນາ ແລະ ຮັບຮອງເອົາບັນຫາເນື້ອໃນສໍາຄັນຕົ້ນຕໍຂອງແຂວງ, ໂດຍສະເພາະວຽກງານອົງການປົກຄອງແຂວງ, ວຽກງານສະພາປະຊາຊົນແຂວງ, ຮັບຮອງເອົາບົດລາຍງານການຕິດຕາມຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ແລະ ທິດທາງແຜນການໃນຕໍ່ໜ້າ ແລະ ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຂອງຄະນະບໍລິຫານງານພັກແຂວງໃນບາງຂະແໜງການ. ພ້ອມນີ້ຍັງໄດ້ຮັບຟັງການເຜີຍແຜ່ລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍອີກຈໍານວນໜຶ່ງ ທີ່ພົວພັນກັບວຽກງານສະພາປະຊາຊົນແຂວງ, ທັງນີ້ກໍ່ເພື່ອສ້າງຄວາມຮັບຮູ້ ແລະ ຄວາມເຂົ້າໃຈ ຢ່າງເລິກເຊິ່ງ ໃຫ້ແກ່ບັນດາຂະແໜງການທີ່ເຂົ້້າຮ່ວມ ໃຫ້ສາມາດກໍາໄດ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃນແຕ່ລະໄລຍະຢ່າງຕໍ່ເນື່ອງ ເພື່ອສືບຕໍ່ຜັນຂະຫຍາຍ ແລະ ພ້ອມກັນນໍາໄປຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ.

                                                                                                                            ທ່ານ ນັນຕະໄຊ ອິນທະສອນ ສະມາຊິກສະພາປະຊາຊົນແຂວງຄໍາມ່ວນປະຈໍາເຂດເລືອກຕັ້ງເມືອງທ່າແຂກ.