ໃນລະຫວ່າງວັນທີ 20-22 ກັນຍາ 2022 ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນແຂວງຄໍາມ່ວນປະຈໍາເຂດເລືອກຕັ້ງເມືອງ ໄດ້ເຄື່ອນໄຫວພົບປະຢ້ຽມຢາມ ແລະ ຈັດຕັ້ງຜັນຂະຫຍາຍໂຄສະນາເຜີຍແຜ່ຜົນສໍາເລັດ ຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ເຊິ່ງໄດ້ເຄື່ອນໄຫວຈັດຕັ້ງຜັນຂະຫຍາຍທັງໝົດຢູ່ 6 ຈຸດຂອງເມືອງໄຊບົວທອງຄື: ຢູ່ທີ່ສະໂມສອນເມືອງ, ບ້ານ ນານ້ອຍ, ກະແສ, ນາຄອງ, ຊອກທາງ ແລະ ບ້ານ ນານົກ ເຊິ່ງນໍາໂດຍ ທ່ານ ສະເຫຼີມສັກ ແກ້ວຈັນທະລາ ຄະນະປະຈໍາສະພາປະຊາຊົນແຂວງຄໍາມ່ວນ ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງໄຊບົວທອງ ໂດຍໄດ້ຮັບການຕ້ອນຮັບ ແລະເຂົ້າຮ່ວມເຮັດວຽກ ທ່ານ ບົວລະພາ ໄຊຍະວົງ ຮອງເຈົ້າເມືອງໄຊບົວທອງ ພ້ອມດ້ວຍບັນດາ ທ່ານຄະນະປະຈໍາພັກເມືອງ, ກຳມະການພັກເມືອງ, ພະນັກງານ-ລັດຖະກອນ, ປກຊ-ປກສ, ອຳນາດການປົກຄອງບ້ານ ແລະຕະຫຼອດຮອດພໍ່ແມ່ປະຊາຊົນເຂົ້າຮ່ວມຮັບຟັງທັງໝົດ 815 ຄົນ, ຍິງ 336 ຄົນ.
ໃນວາລະຂອງການຈັດຕັ້ງເຜີຍແຜ່ຜົນສໍາເລັດ ກອງປະຊຸມໃນຄັ້ງນີ້ໄດ້ຮັບຟັງການລາຍງານໂດຍສັງເຂບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ທີ່ຕິດພັນກັບສອງວາລະແຫ່ງຊາດກໍ່ຄືວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ທິດທາງແຜນການໃນຕໍ່ໜ້າຂອງເມືອງ ຈາກນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ຜັດປ່ຽນເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ ຊຸດທີ II.
ຈຸດປະສົງ: ໃນການລົງເຄື່ອນໄຫວພົບປະຢ້ຽມຢາມ ແລະ ເຮັດວຽກຄັ້ງນີ້ ເພື່ອໃຫ້ພະນັກງານ-ລັດຖະກອນ, ທະຫານ-ຕໍາຫຼວດ, ອຳນາດການປົກຄອງຂັ້ນເມືອງ ແລະ ບ້ານ ຕະຫຼອດຮອດພໍ່ແມ່ປະຊາຊົນ ໄດ້ມີຄວາມຮັບຮູ້ເຊື່ອມຊຶມ ແລະ ເຂົ້າໃຈຕໍ່ແນວທາງນະໂຍບາຍຂອງພັກເວົ້າລວມ, ເວົ້າສະເພາະກໍຄືວຽກງານຂອງສະພາແຫ່ງຊາດ ແລະ ຂອງສະພາປະຊາຊົນຂັ້ນແຂວງ ທັງເປັນການເກັບກຳສະພາບການ, ຄໍາຮ້ອງ, ຄໍາສະເໜີ, ບັນຫາຂັດຂ້ອງຫມອງໃຈຕ່າງໆຂອງປະຊາຊົນໃນເຂດເລືອກຕັ້ງແຕ່ລະຈຸດເພື່ອຊອກຫາວິທີແກ້ໄຂໃນຕໍ່ໜ້າ, ຄຽງຄູ່ກັບການປັບປຸງຊີວິດການເປັນຢູ່ ຂອງປະຊາຊົນຕໍ່ກັບສະພາບການເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກຍາກອຶ່ນໆ ສົ່ງຜົມກະທົບສ້າງຄວາມເສຍຫາຍ ໃຫ້ແກ່ເສດຖະກິດ ແລະ ການດຳລົງຊີວິດຂອງປະຊາຊົນ ກໍຄືຂອງອົງການຈັດຕັ້ງພັກ-ລັດ ໃນການຮ່ວມກັນແກ້ໄຂບັນຫາທີ່ມີຄວາມຫຍຸ້ງຍາກໃຫ້ບັນລຸຜົນສຳເລັດຕາມຈຸດປະສົງຄາດໝາຍ.
ໂດຍ: ເອື້ອ ມະໂນສິງ