(ສພຊ) ໃນວັນທີ 15 ກັນຍາ 2022, ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ປະທານສະພາແຫ່ງຊາດກໍາປູເຈຍ ພ້ອມດ້ວຍຄະນະ ກໍໄດ້ສືບຕໍ່ຢ້ຽມຢາມດ່ານສາກົນສິນຄ້າທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນ ແລະ ທັດສະນາສຶກສາສະຖານີລົດໄຟລາວ-ໄທ ເຊິ່ງເປັນສະຖານທີ່ສຳຄັນໃນການຂົນສົ່ງສິ້ນຄ້າ ສົ່ງອອກ-ນໍາເຂົ້າ ຂອງ ສປປລາວ.

ການມາຢ້ຽມຢາມ ສປປລາວ ໃນຄັ້ງນີ້ ຂອງຄະນະ ເປັນການປະກອບສ່ວນສຳຄັນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ທີ່ເປັນມູນເຊື້ອມາແຕ່ດົນນານ ຖານບ້ານໃກ້ເຮືອນຄຽງບ້ານແກ່ວເມືອງດອງທີ່ດີ, ການເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສອງປະເທດລາວ-ກຳປູເຈຍ ກໍຄືລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດກຳປູເຈຍ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.

ໃນວັນດຽວກັນ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ແຫ່ງ ສປປລາວ, ປະທານຄະນະສະມາຄົມມິດຕະພາບ ລາວ-ກໍາປູເຈຍ ຂອງ ສປປລາວ ພ້ອມດ້ວຍຄະນະ ກໍໄດ້ເຂົ້າຢ້ຽມຂໍ່ານັບ ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊໍາຣິນ ປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ສະມາຄົມມິດຕະພາບ ລາວ-ກໍາປູເຈຍ ແລະ ກໍາປູເຈຍ-ລາວ ໄດ້ຮັບການຊີ້ນໍາໃຫ້ສອງສະມາຄົມມິດຕະພາບລາວ-ກຳປູເຈຍ-ລາວ ມີການຮ່ວມມືກັນ ໃນການສຶກສາອົບຮົມຄົນຮຸ່ນໃໝ່ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ເຖິງປະຫວັດສາດແຫ່ງການພົວພັນຮ່ວມມື ທີ່ເປັນມູນເຊື້ອອັນດີງາມ ທີ່ການນໍາປະໄວ້ໃຫ້ພວກເຮົາ; ຄົນລາວ ແລະ ກໍາປູເຈຍ ໃຫ້ສືບຕໍ່ທະນຸຖະໜອມ ແລະ ເພີ່ມພູນຄູນສ້າງສາຍພົວພັນດັ່ງກ່າວ ໃຫ້ມີຄວາມຍືນຍົງຕະຫຼອດໄປ.