ໃນວັນທີ 15-16 ກັນຍາ 2022 ນີ້, ທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ ຮອງປະທານຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ທ່ານ ພູຂົງ ຈິດຮູບໂລກ ຄະນະປະຈຳພັກກະຊວງ, ຫົວໜ້າຫ້ອງການກະຊວງເຕັກໂນໂລຊີ ແລະ ການສື່ສານ ທັງເປັນສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13, ພ້ອມດ້ວຍບັນດາສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງພະລານໄຊ, ໄດ້ລົງເຄື່ອນໄຫວພົບປະເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 03 ຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ໂດຍການຕ້ອນຮັບ ຂອງຄະນະນໍາຂອງເມືອງ,ມີບັນດາທ່ານຄະນະພັກ-ຄະນະປົກຄອງເມືອງ, ຄະນະຫ້ອງການ, ທະຫານ, ຕຳຫຼວດ, ພະນັກງານລັດຖະກອນ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນເຂົ້າຮ່ວມຮັບຟັງທັງໝົດ 506 ຄົນ, ຍິງ 123 ຄົນ.
ການລົງເຄື່ອນໄຫວພົບປະເຜີຍແຜ່ຂອງບັນດາທ່ານ ສສຊ ແລະ ສສຂ ໃນຄັ້ງນີ້ແມ່ນໄດ້ລົງຢູ່ 04 ຈຸດຄື: ໂອ້ລົມສະມາຊິກພັກ-ພະນັກງານຢູ່ທີ່ສະໂມສອນເມືອງ, ກຸ່ມບ້ານໂພສີ, ບ້ານກະຫຼອງເໝືອ ແລະ ບ້ານພະລານໃຕ້ ຊຶ່ງໃນແຕ່ລະຈຸດທີ່ລົງບັນດາທ່ານ ສສຊ ແລະ ສສຂ ກໍ່ໄດ້ຮັບຟັງ ການລາຍງານຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງພະລານໄຊໂດຍຫໍ້ຍ, ພ້ອມທັງການລາຍງານ ການຈັດຕັ້ງປະຕິບັດວຽກງານການຊີ້ນໍາ-ນຳພາວຽກງານຂອງອຳານາດການປົກທັງສາມບ້ານ, ຈາກນັ້ນ ບັນດາທ່ານ ສສຊ, ສສຂ ກໍ່ໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງ ກອງປະຊຸມສະໄໝສາມັນ ເທື່ອທີ 03 ໃຫ້ປະຊາຊົນຜູ້ມີສິດເລືອກຕັ້ງໄດ້ຮັບຮູ້, ໂດຍສະເພາະກອງປະຊຸມໄດ້ຮັບຮອງເອົາຫຼາຍບັນຫາສຳຄັນເປັນຕົ້ນແມ່ນ: ການຮັບຮອງເອົາ 10 ມະຕິຂອງກອງປະຊຸມສະໄໝສາມັນເທື່ອທີ 03 ຂອງສະພາແຫ່ງຊາດ ຊຸດທີ IX ແລະ ການຮັບຮອງເອົາ 04 ມະຕິຂອງກອງປະຊຸມສະໄໝສາມັນເທື່ອທີ 03 ຂອງສະພາປະຊາຊົນ ແຂວງຊຸດທີ II, ໂອກາດນີ້, ພໍ່ແມ່ປະຊົນ ກໍ່ຍັງໄດ້ຊັກຖາມ ແລະມີຄຳສະເໜີ ໂດຍສະເພາະແມ່ນບັນຫາການພັດທະນາພື້ນຖານໂຄງລ່າງໃນນັ້ນການກໍ່ເສັ້ນທາງ
ຂົວແຫ່ງຕ່າງໆຈາກເມືອງຫາບ້ານ, ການສ້າງຕາຂ່າຍໄຟຟ້າ, ການແກ້ໄຂບັນຫາຢາເສບຕິດ,ບັກຫາຄູອາສາສະໝັກ,ການກໍ່ສ້າງສຸກສາລາປະຈຳບ້ານ, ລະບົບຊົນລະປະທານເໝືອງຝາຍ, ແນວພັນເຂົ້າ ທີ່ຈະນໍາໃຊ້ເຂົ້າໃນການຜະລິດຂອງພໍ່ແມ່ປະຊາຊົນ ເພື່ອເປັນການແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂຶ້ນ, ພ້ອມນັ້ນ ສສຊ ແລະ ສສຂ ກໍ່ຍັງໄດ້ມີຄໍາເຫັນຫຼາຍດ້ານ ຕໍ່ກັບການການພັດທະນາພື້ນຖານ ໂຄງລ່າງ, ການພັດທະນາທາງດ້ານເສດຖະກິດ, ການແກ້ໄຂບັນຫາ ທາງດ້ານຢາເສບຕິດ ໂດຍຕິດພັນ ກັບການແກ້ໄຂ 02 ວາລະແຫ່ງຊາດ ຂອງລັດຖະບານ ເພື່ອແນໃສ່ໃຫ້ ບັນລຸໄດ້ຕາມລະດັບຄາດໝາຍ ທີ່ພັກ-ລັດວາງໄວ້. ພ້ອມນັ້ນ ຍັງໄດ້ຕອບບັນຫາການຊັກຖາມຂອງ ພໍ່ແມ່ປະຊາຊົນ ເພື່ອໃຫ້ຮັບຮູ້ ແລະ ເຂົ້າໃຈເຖິງບັນຫາຕ່າງໆຕໍ່ກັບສະພາບການອັນລວມຕໍ່ກັບການພັດທະນາ ຂອງປະເທດເຮົາໃນໄລຍະປະຈຸບັນ ພ້ອມທັງຮັບເອົາຄຳສະເໜີຂອງອົງການປົກຄອງບ້ານ ແລະພໍ່ແມ່ປະຊາຊົນໄປນຳສະເໜີ ຕໍ່ຂະແໜງການກ່ຽວຂ້ອງ, ເພື່ອນຳໄປປຶກສາຫາລື ແລະ ຄົ້ນຄວ້າແກ້ໄຂໃນຂັ້ນຕໍ່ໄປ.
ຊຶ່ງໃນໂອກາດ ທີ່ທາງຄະນະລົງເຄື່ອນໄຫວໃນຄັ້ງນີ້ ກໍຍັງໄດ້ມອບເຄື່ອງກະຈາຍສຽງ ( ປາກເລີ້ ຈຳນວນ 02 ປາກ ) ລວມມູນຄ່າ 5.700.000ກີບ (ຫ້າລ້ານເຈັດແສນກີບ) ມອບໃຫ້ເມືອງ ເພື່ອນໍາໄປມອບໃຫ້ບ້ານທີ່ເຫັນວ່າມີຄວາມເໝາະສົມ ໄດ້ນໍາໃຊ້ເຂົ້າໃນການຈັດປະຕິບັດໂຄສະນາເຜີຍແຜ່ບັນດາຂໍ້ມູນ-ຂ່າວສານ, ທາງດ້ານກົດໝາຍ, ນິຕິກຳໃຕ້ກົດໝາຍ, ແຈ້ງການຕ່າງໆຂອງແຂວງ ກໍຄືຂອງເມືອງທີ່ໄດ້ປະກາດໃຊ້ເພື່ອເຮັດໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈກົດໝາຍ, ລະບຽບການທີ່ຂັ້ນເທິງວາງອອກ ແລະ ພ້ອມພຽງກັນຈັດຕັ້ງປະຕິບັດໃຫ້ເກີດດອກອອກຜົນອີກດ້ວຍ.
ພາບ-ຂ່າວ: ນາງ ຄອນສະຫວັນ ເມກສະຫັວນ