ວັນທີ 31 ສິງຫາ 2022 ນີ້, ຢູ່ທີ່ ຫ້ອງປະຊຸມ ສະພາປະຊາຊົນ ແຂວງຫົວພັນ ໄດ້ຈັດກອງຊຸມຄົ້ນຄວ້າ ການຈັດຕັ້ງປະຕິບັດ ການຄຸ້ມຄອງ ຮ້ານອາຫານ ແລະ ຮ້ານບັນເທີງ ຢູ່ທຸກເມືອງທົ່ວແຂວງຫົວພັນ ເວົ້າລວມ, ເວົ້າສະເພາະ ຢູ່ເທດສະບານ ເມືອງຊຳເໜືອ ທີ່ເປີດບໍລິການຮ້ານອາຫານ ແລະ ຮ້ານບັນເທີງ ໃຫ້ຖືກຕ້ອງ ສອດຄ່ອງກັບລະບຽບກົດໝາຍກຳນົດ ກອງປະຊຸມໂດຍການເປັນປະທານຂອງ ທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ ເຂົ້າຮ່ວມໂດຍ ທ່ານ ພຸດພັນ ແກ້ວວົງໄຊ ຮອງເຈົ້າແຂວງຫົວພັນ ຜູ້ຊີ້ນຳວຽກງານວັດທະນະທຳ-ສັງຄົມ ມີບັນດາທ່ານຄະນະປະຈຳສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ພະແນກສາທາລະນະສຸກ, ກອງບັນຊາການປ້ອງກັນຄວາມສະຫງົບ ແລະ ພະແນກອຸດສາຫະກຳ ແລະ ການຄ້າແຂວງ, ຕະຫລອດຮອດຫົວໜ້າຂະແໜງ, ວິຊາການ ຂະແໜງວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ເຂົ້າຮ່ວມ.

             ໃນກອງປະຊຸມ ຜູ້ເຂົ້າຮ່ວມໄດ້ຮັບຟັງການລາຍງານໂດຍຫຍໍ້ ກ່ຽວກັບສະພາບການຈັດຕັ້ງປະຕິບັດໃນໄລຍະຜ່ານມາ ຕໍ່ກັບບັນຫາຫາງສຽງຂອງສັງຄົມ ໃນການຄຸ້ມຄອງຮ້ານອາຫານ ແລະ ຮ້ານບັນເທີງຈຳນວນໜຶ່ງ ຈາກພາກສ່ວນກ່ຽວຂ້ອງ ໂດຍຍົກໃຫ້ເຫັນດ້ານດີ, ດ້ານອ່ອນ, ຂໍ້ຫຍຸ້ງຍາກ ແລະ ຂໍ້ສະເໜີຈຳນວນໜຶ່ງ ຈາກປະຊາຊົນ ໂດຍສະເພາະແມ່ນການເຄື່ອນໄຫວທີ່ບໍ່ຖືກຕ້ອງຕາມລະບຽບການ ເຊັ່ນ: ການເປີດຮ້ານເກີນໂມງເວລາທີ່ພາກສ່ວນກ່ຽວຂ້ອງກຳນົດໄວ້, ເດັກນ້ອຍນັກຮຽນບໍ່ທັນຮອດອາຍຸກາສຽນ 18 ປີ ເຂົ້າຮ້ານບັນເທີງ, ບັນຫາມົ້ວສຸມຢາເສບຕິດ, ຂີ້ລັກງັດແງະ ແລະ ບັນຫາອື່ນໆ ເຮັດໃຫ້ມີຜົນກະທົບຕໍ່ສະພາບແວດລ້ອມສັງຄົມໃນປັດຈຸບັນ, ຈາກນັ້ນ ຍັງໄດ້ຮັບຟັງຄຳຄິດເຫັນ, ຊີ້ແຈງ ອະທິບາຍໃນການດຳເນີນທຸລະກິດ ຈາກພາກສ່ວນທີ່ຮັບຜິດຊອບ, ພ້ອມທັງ ພັດປ່ຽນກັນປະກອບຄຳຄິດຄຳເຫັນຢ່າງກົງໄປກົງມາ ເພື່ອຄົ້ນຄວ້າວິທີການແກ້ໄຂໃຫ້ສອດຄ່ອງ ແລະ ເໝາະສົມ.

ຕອນທ້າຍ ປະທານກອງປະຊຸມ ຍັງໄດ້ເນັ້ນໜັກ ໃຫ້ພາກສ່ວນກ່ຽວຂ້ອງ ກວດກາເບິ່ງຄືນບັນດານິຕິກຳຕ່າງໆ ທີ່ກ່ຽວຂ້ອງກັບພະແນກຂອງຕົນ ທີ່ໄດ້ແຈ້ງອອກໄປແລ້ວນັ້ນ ນຳໄປເຜີຍແຜ່ໃຫ້ບັນດາຮ້ານ, ປະຊາຊົນໄດ້ຮັບຮູ້, ເຂົ້າໃຈຢ່າງເລິກເຊິ່ງ ຖືກຕ້ອງຕາມນິຕິກຳ ກຳນົດໄວ້, ພ້ອມນັ້ນຕ້ອງເອົາໃຈໃສ່ຕິດຕາມກວດກາ ຫ້າງຮ້ານຕ່າງໆ ຢ່າງເປັນປົກກະຕິ ແລະ ສຸມໃສ່ການປະຕິບັດມາດຕະການຜ່ອນຜັນ ທີ່ຂັ້ນເທິງວາງອອກຢ່າງເຂັ້ມງວດ ໂດຍອີງໃສ່ລະບຽບການ, ນິຕິກຳ, ກົດໝາຍ ໃນການດຳເນີນທຸລະກິດ ແລະ ການບໍລິການຮ້ານບັນເທີງໃຫ້ຖືກຕ້ອງຕາມຂໍ້ກຳນົດ ແລະ ລະບຽບກົດໝາຍກຳນົດໄວ້.

ພາບ ແລະ ຂ່າວ ໂດຍ ປຸ້ຍນິຕາ.