ຕອນບ່າຍ ວັນທີ 13 ກັນຍາ 2022 ທີ່ຫ້ອງປະຊຸມຄະນະປະຈໍາສະພາປະຊາຊົນແຂວງ (ຄປຈຂ) ໄດ້ຈັດກອງປະຊຸມຄະນະປະຈໍາສະພາປະຊາຊົນແຂວງ (ວິສາມັນ) ຄັ້ງທີ 19 ໂດຍການເປັນປະທານຂອງທ່ານ ທອງສີ ເສົາສຸລິພົມ ປະທານ ຄປຈຂ; ມີບັນດາທ່ານ ຄປຈຂ, ຮອງປະທານຄະນະກໍາການສະພາປະຊາຊົນແຂວງ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ເພື່ອຈັດຂຶ້ນເພື່ອຮັບການລາຍງານການປັບປຸງເນື້ອໃນ ນິຕິກໍາໃຕ້ກົດໝາຍທີ່ໄດ້ຮັບຮອງໃນກອງປະຊຸມໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II; ທັງນີ້ກໍເພື່ອເຮັດໃຫ້ເນື້ອໃນຮັດກຸມ, ສອດຄ່ອງຕາມສະພາບຄວາມເປັນຈິ່ງຢູ່ທ້ອງຖິ່ນ.

ທີ່ປະຊຸຸມຮັບຟັງທ່ານ ຄໍາພັນ ຄຸນສົມບັດ ຕາງໜ້າໃຫ້ຄະນະຮັບຜິດຊອບປັບປຸງເນື້ອໃນ ນິຕິກໍາໃຕ້ກົດໝາຍ 4 ສະບັບ (ຮ່າງຂໍ້ຕົກລົງເຈົ້າແຂວງ ວ່າດ້ວຍການເພີ່ມທະວີການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ຢູ່ແຂວງຜົ້ງສາລີ; ຮ່າງຂໍ້ຕົກລົງເຈົ້າແຂວງ ວ່າດ້ວຍການສ້າງກອງທຶນພັດທະນາກິລາ-ກາຍຍະກໍາຂອງແຂວງ; ຮ່າງຂໍ້ຕົກລົງເຈົ້າແຂວງ ວ່າດ້ວຍການກໍານົດຫົວໜ່ວຍຊົດເຊີຍ ຜົນກະທົບຈາກໂຄງການພັດນາພື້ນຖານໂຄງລ່າງຢູ່ແຂວງຜົ້ງສາລີ; ຮ່າງຂໍ້ຕົກລົງເຈົ້າແຂວງ ວ່າດ້ວຍການຈັດງານປະເພນີ ຢູ່ແຂວງຜົ້ງສາລີ). ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບເຫັນໃສ່ ຮ່າງນິຕິກໍາໃຕ້ກົດໝາຍດັ່ງກ່າວດ້ວຍຄວາມຮັບຜິດຊອບສູງ ເພື່ອຮັບປະກັນໃຫ້ນິຕິກໍາດັ່ງກ່າວສາມາດຈັດຕັ້ງປະຕິບັດໄດ້.

ຕອນທ້າຍຂອງກອງປະຊຸມ ທ່ານ ທອງສີ ເສົາສຸລິພົມ ໄດ້ສັງລວມຄືນຜົນຂອງກອງປະຊຸມ ເຊິ່ງກໍໄດ້ຕິລາຄາສູງຕໍ່ການປັບປຸງເນື້ອໃນນິຕິກໍາໃຕ້ກົດໝາຍດ້ວຍຄວາມຮັບຜິດຊອບສູງ. ເພື່ອຮັບປະກັນໃຫ້ບັນດານິຕິກໍາໃຕ້ກົດໝາຍມີຄວາມຮັດກຸມ ແລະ ສາມາດນໍາໄປຈັດຕັ້ງປະຕິບັດໄດ້ ທ່ານ ໄດ້ເໜັ້ນບາງບັນຫາ ເປັນຕົ້ນ: ມອບໃຫ້ບັນດາຄະນະກໍາມະການສະພາປະຊາຊົນແຂວງ ຈັດກອງປະຊຸມຮ່ວມກັບຄະນະຮັບຜິດຊອບຮ່າງ ນິຕິກໍາໃຕ້ກົດໝາຍ ຕາມຄໍາເຫັນຂອງບັນດາທ່ານຄະນະປະຈໍາສະພາປະຊາຊົນແຂວງ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ