(ສພຊ) ໃນວັນທີ 23 ກັນຍາ 2021 ທີ່ ສະພາແຫ່ງຊາດ, ທ່ານ ສັນຍາ ປຣະເສີດ ກໍາມະການຄະນະປະຈໍາ, ປະທານກຳມາທິການການຕ່າງປະເທດ ພ້ອມດ້ວຍສະມາຊິກສະພາແຫ່ງຊາດຈາກເຂດເລືອກຕັ້ງທີ່ກ່ຽວຂ້ອງຂອງສະພາແຫ່ງຊາດລາວ, ຮອງລັດຖະມົນຕີກະຊວງແຜນການ ແລະ ການລົງທຶນ ໃນນາມຕາງໜ້າຄະນະປະສານງານຮ່ວມເຂດສາມຫຼ່ຽມພັດທະນາ (CLV) ຂອງ ສປປລາວ, ຕາງໜ້າກະຊວງການຕ່າງປະເທດ ແລະ ພະນັກງານຂັ້ນສູງທີ່ກ່ຽວຂ້ອງຈຳນວນໜຶ່ງ ໄດ້ເຂົ້າຮ່ວມກອງປະຊຸມຮ່ວມລະຫວ່າງສາມກຳມາທິການການຕ່າງປະເທດ ສະພາແຫ່ງຊາດກຳປູເຈຍ-ລາວ-ຫວຽດນາມ (CLV) ຄັ້ງທີ 8 ທີ່ລາຊະອານາຈັກກຳປູເຈຍ ເຊິ່ງເປັນເຈົ້າພາບໃນຮູບແບບກອງປະຊຸມທາງໄກ. ກອງປະຊຸມຈັດຂຶ້ນພາຍໃຕ້ການເປັນປະທານຮ່ວມຂອງທ່ານ ຊຽງ ວຸນ ປະທານກຳມາທິການການຕ່າງປະເທດ, ການຮ່ວມມືສາກົນ, ໂຄສະນາ ແລະ ຂ່າວສານ ສະພາແຫ່ງຊາດກຳປູເຈຍ; ທ່ານ ສັນຍາ ປຣະເສີດ ກໍາມະການຄະນະປະຈໍາ, ປະທານກຳມາທິການການຕ່າງປະເທດ ສະພາແຫ່ງຊາດລາວ ແລະ ທ່ານ ຫວູ້ ຮາຍ ຮາ ກໍາມະການຄະນະປະຈໍາ, ປະທານກຳມາທິການການຕ່າງປະເທດ ສະພາແຫ່ງຊາດຫວຽດນາມ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງຂອງກໍາປູເຈຍ, ລາວ ແລະ ຫວຽດນາມ ເຂົ້າຮ່ວມລວມທັງໝົດ 85 ທ່ານ.
ກອງປະຊຸມ, ໄດ້ປຶກສາຫາລື ແລະ ແລກປ່ຽນສົນທະນາກັນ ພາຍໃຕ້ຫົວຂໍ້: ※ການຮ່ວມມືຂອງລັດຖະສະພາ ໃນການສົ່ງເສີມການພັດທະນະແບບຍືນຍົງ ແລະ ການຮັບມືກັບວິກິດການການແຜ່ລະບາດຂອງພະຍາດໂຄວິດ-19 ໃນເຂດສາມຫຼ່ຽມພັດທະນາກຳປູເຈຍ-ລາວ-ຫວຽດນາມ (Promoting Parliamentary Partnership for Sustainable Development and Responding to COVID-19 Crisis in CLV-DTA)§ ເຊິ່ງໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນການພັດທະນາ, ການດຳເນີນໂຄງການຮ່ວມມື, ການລົງທຶນຂອງລັດຖະບານສາມປະເທດ ແລະ ການຮັບມືກັບວິກິດການການແຜ່ລະບາດຂອງພະຍາດໂຄວິດ-19 ໃນເຂດສາມຫຼ່ຽມພັດທະນາ ຈາກຄະນະປະສານງານຮ່ວມຂອງກຳປູເຈຍ, ລາວ ແລະ ຫວຽດນາມ, ພ້ອມທັງທົບທວນຄືນຜົນການຕິດຕາມກວດກາການຈັດຕັ້ງປະຕິບັດວຽກງານການຕ່າງປະເທດ ໃນຂົງເຂດສາມຫຼ່ຽມພັດທະນາ ຂອງສະພາແຫ່ງຊາດ ກຳປູເຈຍ, ລາວ ແລະ ຫວຽດນາມ.
ໃນການເຂົ້າຮ່ວມກອງປະຊຸມ, ທ່ານ ສັນຍາ ປຣະເສີດ ໄດ້ມີຄຳເຫັນຕໍ່ກອງປະຊຸມ ເຊິ່ງໄດ້ໃຫ້ການສະໜັບສະໜູນຕໍ່ຫົວຂໍ້ຂອງກອງປະຊຸມ ແລະ ໄດ້ຕີລາຄາສູງຕໍ່ກັບໝາກຜົນຂອງການຮ່ວມມືຂອງສາມປະເທດ ໃນການພັດທະນາເສດຖະກິດ-ສັງຄົມ, ຊີວິດການເປັນຢູ່ຂອງປະຊາຊົນໃຫ້ດີຂຶ້ນ ໃນເຂດສາມຫຼ່ຽມພັດທະນາຂອງ ສປປລາວ; ພ້ອມທັງໄດ້ຍົກໃຫ້ເຫັນເຖິງສິ່ງທ້າທາຍ ແລະ ການຮ່ວມມືກັນໃນການແກ້ໄຂບັນຫາຕ່າງໆ ເປັນຕົ້ນການຈັດຕັ້ງປະຕິບັດບັນດາແຜນງານ ແລະ ໂຄງການບູລິມະສິດ ໃນເຂດສາມຫຼ່ຽມພັດທະນາ ແນໃສ່ຫລຸດຜ່ອນຄວາມທຸກຍາກຂອງປະຊາຊົນ ຕາມທີ່ລັດຖະບານສາມປະເທດຕົກລົງຮ່ວມກັນໃຫ້ປາກົດຜົນເປັນຈິງ.
ໃນຕອນທ້າຍຂອງກອງປະຊຸມ ປະທານກຳມາທິການການຕ່າງປະເທດກຳປູເຈຍ-ລາວ-ຫວຽດນາມ ໄດ້ເຫັນດີເປັນເອກະພາບ ແລະ ລົງລາຍເຊັນໃນຮູບແບບອີເລັກໂຕຣນິກ ເພື່ອຮັບຮອງເອົາຖະແຫຼງການຮ່ວມຂອງກອງປະຊຸມ ຄັ້ງທີ 8 ໂດຍເປັນການກໍານົດແນວທາງການຈັດຕັ້ງປະຕິບັດເນື້ອໃນທີ່ສໍາຄັນຂອງກອງປະຊຸມໃນຕໍ່ໜ້າ ແລະ ໄດ້ຕົກລົງເຫັນດີໃຫ້ສະພາແຫ່ງຊາດລາວ ເປັນເຈົ້າພາບຈັດກອງປະຊຸມຮ່ວມລະຫວ່າງສາມກຳມາທິການການຕ່າງປະເທດ ສະພາແຫ່ງຊາດກຳປູເຈຍ-ລາວ-ຫວຽດນາມ (CLV) ຄັ້ງທີ 9 ໃນປີ 2023 ທີ່ ສປປລາວ.