ບາງຄົນຫຼຸດປາກເວົ້າອອກມາໃນທໍານອງບໍ່ຈິງຈັງກັບຊີວິດວ່າ: ວັດກະເຂົ້າ ເຫຼົ້າກະກິນ, ບຸນກະຫາບ ບາບກະຫິ້ວ ເຊິ່ງເບິ່ງຄືວ່າຜູ້ຄິດແບບນີ້ ດີກະເອົາຊົ່ວກະເອົາ ຫຼື ບາງຄົນຍັງເຂົ້າໃຈຜິດຖະໜັດວ່າ: ເຮັດບຸນແລກບາບ ຫຼື ເຮັດບຸນເພື່ອທົດແທນທີ່ຕົນໄດ້ເຮັດບາບ ເຊິ່ງຄວາມຈິງບຸນກໍຄືບຸນ, ບຸນບໍ່ສາມາດເອົາໄປລ້າງບາບໄດ້ ມັນອາດພຽງແຕ່ຜ່ອນໜັກເປັນເບົາໄດ້.

ບາງຄົນລືມຄິດໄປວ່າ: ຖ້າບຸນເປັນສີຂາວ, ບາບຄືສີດໍາ ຖ້າວ່າເອົາສີດໍາໄປທາທັບສີຂາວ ເຮົາຈະເຫັນສີດໍາຢູ່ຂ້າງນອກ ແຕ່ສີຂາວກໍບໍ່ໄດ້ຫາຍໄປໃສ ພຽງແຕ່ມັນຖືກທາທັບໄວ້ຂ້າງໃນ ເພາະມັນຄົນລະສີກັນ ເຊັ່ນດຽວຄືບຸນກັບບາບ ສັງຄົມບ້ານເຮົາມີປະເພນີວັດທະນະທໍາ ຮີດ 12 ຄອງ 14 , ຮີດ 12 ກໍຄື ປາງບຸນ 12 ປາງ ທີ່ຄົນລາວປະຕິບັດສືບຕໍ່ກັນມາຍາວນານ ຕົກມາຮອດປັດຈຸບັນນີ້ ພໍເຖິງເວລາປາງບຸນຕ່າງໆໄດ້ພັກການແລ້ວ ຕັ້ງວົງເຫຼົ້າເບຍກິນດື່ມກັນຫຼັງຈາກໄປໃສ່ບາດຢາດນໍ້າ ເຮົາອາດຕັ້ງຂໍ້ສົງໄສເປັນຄໍາຖາມຂຶ້ນມາວ່າ: ຫຼັງການໄປໃສ່ບາດຢາດນໍ້າວັນສໍາຄັນທາງພຸດທະສາສະໜາແລ້ວ ເປັນຫຍັງຈຶ່ງຕັ້ງວົງດື່ມເຫຼົ້າເບຍ?

ການມີພຶດຕິກໍາດື່ມເຫຼົ້າເບຍໃນມື້ວັນພະວັນສິນນີ້ ປາກົດມາດົນແລ້ວບໍ? ຜູ້ຂຽນພຽງແຕ່ເດົາເອົາວ່າ: ພຶດຕິກໍາບໍລິໂພກນິຍົມມາແຮງສະເໝີ ເມື່ອໃດມີໂອກາດມັນກໍແຊກແຊງເຂົ້າໃສ່ໂລດ ຖ້າວ່າໃຜຂາດສະຕິກໍຈະຖືກດູດດຶງເຂົ້າໄປໃນກະແສຈົນບໍ່ຮູ້ສຶກໂຕ, ອະດີດພໍ່ແມ່ປູ່ຍ່າຕາຍາຍ ເຖິງວັນສິນໃສ່ບາດບໍາເພັນພາວັນນາ ເພື່ອຈະເລີນສະຕິປັນຍາ ເຂົ້າວັດຟັງທໍາ ທຸກມື້ນີ້ ວັນສິນເຂົ້າວັດແລ້ວກັບມາເຮືອນຕັ້ງວົງສຸລາ….

ບຸນກະຫາບ ບາບກະຫິ້ວແທ້ໆ ຖ້າເປັນແນວນັ້ນ ແຕ່ໄລຍະຍາວອາດມີຜົນກະທົບໃສ່ວິຖີຊີວິດທີ່ດີງາມມີມາແຕ່ເກົ່າກ່ອນ, ອັນໃດດີກໍຄວນຊ່ວຍກັນຮັກສາໄວ້….!