ໃນຕອນເຊົ້າຂອງວັນທີ 4 ກັນຍາ 2022 ນີ້ ຢູ່ທີ່ຫ້ອງປະຊຸມໂຄງການກໍ່ສ້າງຂົວຂ້າມນໍ້າຂອງ ມິດຕະພາບ ລາວ-ໄທ ແຫ່ງທີ V ( ບໍລິຄໍາໄຊ -ບຶງການ ) ທ່ານ ສັນຍາ ປຣະເສີດ ກຳມະການຄະນະປະຈໍາສະພາແຫ່ງຊາດ ປະທານກຳມາທິການຕ່າງປະເທດ ສະພາແຫ່ງຊາດ ພ້ອມດ້ວຍຄະນະ ສົມທົບກັບ ສະພາປະຊາຊົນແຂວງບໍລິຄໍາໄຊ ລົງເຮັດວຽກຮ່ວມກັບຮອງຫົວໜ້າການໂຄງການກໍ່ສ້າງຂົວຂ້າມນໍ້າຂອງ ມິດຕະພາບ ລາວ-ໄທ ແຫ່ງທີ V ( ບໍລິຄໍາໄຊ -ບຶງການ ) ເພື່ອລົງຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດ ໃຫ້ກຽດເຂົ້າຮ່ວມຕິດຕາມມີ ທ່ານ ໃສຄໍາ ທອງລັດ ກຳມະການພັກແຂວງ ຮອງປະທານສະພາປະຊາຊົນແຂວງ , ຄະນະເລຂາທິການ, ພະແນກການທີ່ກ່ຽວຂ້ອງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

         ຈຸດປະສົງໃນການລົງມາຄັ້ງນີ້ ກໍ່ເພື່ອລົງຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດ, ຮັບຟັງສະພາບການລວມໂດຍຫຍໍ້ຕໍ່ກັບການຈັດຕັ້ງປະຕິບັດວຽກງານການຕ່າງ ປະເທດໃນດ້ານຕ່າງໆເປັນຕົ້ນແມ່ນການຈັດຕັ້ງປະຕິບັດຕາມສັນຍາກໍ່ສ້າງຂົ້ວຂອງສອງປະເທດ, ວຽກງານຊົດເຊີຍທີ່ດິນໃຫ້ພໍ່ແມ່ປະຊາຊົນທີ່ຖືກຜົນກະທົບຈາກໂຄງການ ແລະ ອື່ນໆ ຂໍ້ສະດວກ, ຂໍ້ຫຍຸ້ງຍາກ, ວິທີແກ້ໄຂ ໃນການຈັດຕັ້ງປະຕິບັດວຽກງານ ພ້ອມດຽວກັນນັ້ນ, ຍັງໄດ້ລົງເບີ່ງພື້ນທີ່ຕົວຈິງຄວາມຄືບໜ້າຂອງໂຄງການກໍ່ສ້າງຂົວຂ້າມນໍ້າຂອງ ມິດຕະພາບ ລາວ-ໄທ ແຫ່ງທີ V ( ບໍລິຄໍາໄຊ -ບຶງການ ).

ໃນຕອນບ່າຍ ຄະນະດັ່ງກ່າວຍັງໄດ້ລົງຕິດຕາມ ກວດກາ ຢູ່ທີ່ດ່ານສາກົນປາກຊັນ ພ້ອມນີ້ ຍັງໄດ້ຮັບຟັງການລາຍງານຂອງແຕ່ລະພະແນກການທີ່ປະຈໍາຢູ່ດ່ານດັ່ງກ່າວຄື: ກອງບັນຊາການປ້ອງກັນຄວາມສະຫງົບແຂວງ, ດ່ານພາສີສາກົນປາກຊັນ, ພະແນກສາທາລະນະສຸກແຂວງ, ພະແນກກະສິກຳ ແລະ ປ່າໄມ້ແຂວງ, ຫ້ອງວ່າການແຂວງ. ພ້ອມນີ້, ຍັງໄດ້ຕິດຕາມສະພາບຕາຝັ່ງເຈື່ອນຕາມລໍາແມ່ນໍ້າຂອງ.

( ຂ່າວ; ພາບ ໂສລະຢ໋າ ໄຊຍະວົງ )