ຕອນເຊົ້າວັນພະຫັດ, ວັນທີ 25 ສິງຫາ 2022 ທີ່ຜ່ານມາ, ຢູ່ທີ່ຫ້ອງປະຊຸມສະພາປະຊາຊົນແຂວງ, ຄະນະປະຈໍາສະ ພາປະຊາຊົນແຂວງ ໄດ້ຮັບຟັງການລາຍງານປັບປຸງຂໍ້ຕົກລົງຂອງທ່ານເຈົ້າແຂວງ ຈາກພະແນກ ຊັບພະຍາກອນທໍາມະຊາດ ແລະ ສິງແວດລ້ອມແຂວງ, ໂດຍການເປັນປະທານຂອງທ່ານ ນ. ຄຳພອນ ພິມະຈັນ ຮອງປະທານ ສພຂ, ມີ ບັນດາທ່ານຄະນະປະຈໍາ ສພຂ, ຫົວໜ້າຂະແໜງ, ວິຊາການຂະແໜງເສດຖະກິດ ແລະ ທ່ານ ຄອນສີ ໄຊຍະມອນ ຮອງຫົວໜ້າພະແນກ ຊັບພະຍາກອນທໍາມະຊາດ ແລະ ສິງແວດລ້ອມແຂວງ ແລະ ຄະນະຮັບຜິດຊອບເຂົ້າຮ່ວມ.

ທ່ານ ຄອນສີ ໄຊຍະມອນ ຮອງຫົວໜ້າພະແນກ ຊັບພະຍາກອນທໍາມະຊາດ ແລະ ສິງແວດລ້ອມແຂວງ ໄດ້ຕາງໜ້າຄະນະຮັບຜິດຊອບລາຍງານການປັບປຸງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການປະເມີນລາຄາທີ່ດິນໃນທົ່ວແຂວງອຸດົມໄຊ(ສະບັບເລກທີ 506/ຈຂ.ອຊ, ລົງວັນ 19 ພຶດສະພາ 2020) ທີ່ນໍາເຂົ້າຜ່ານ ໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງວັນທີ 09-10 ສິງຫາ 2022 ທີ່ຜ່ານມາ, ເຊິ່ງບັນດາທ່ານສະມາຊິກສະພາປະຊາຊົນແຂວງໄດ້ຄົ້ນຄວ້າ, ພິຈາລະນາ ແລະປະກອບຄໍາເຫັນ ຢູ່ໃນກອງປະຊຸມ, ພ້ອມນັ້ນທ່ານຍັງໄດ້ມີຄໍາເຫັນແລກປ່ຽນວ່າຂໍ້ຕົກລົງດັ່ງກ່າວມີບາງໝວດ, ບາງມາດຕາ ທີ່ບໍ່ສາມາດປັບປຸງໄດ້ແມ່ນຍ້ອນສາເຫດອັນໃດ ແລະ ໄດ້ຊີ້ແຈງອະທິບາຍຕໍ່ຄະນະປະຈໍາສະ ພາປະຊາຊົນແຂວງ.

 

ຫຼັງຈາກນັ້ນປະທານໄດ້ມີຄໍາເຫັນ ກ່ອນອື່ນທ່ານໄດ້ສະແດງຄວາມຂອບໃຈ ພາກ ສ່ວນກ່ຽວຂ້ອງທີ່ໃຫ້ການຮ່ວມມື ແລະ ປັບປຸບຂໍ້ຕົກລົງດັ່ງກ່າວ ເພື່ອໃຫ້ຖືກຕ້ອງ, ສອດ ຄ່ອງກັບສະພາບຄວາມເປັນຈິງໃນທ້ອງຖິ່ນແຂວງອຸດົມໄຊ ປັດຈຸບັນ ແລະ ສາມາດນໍາໄປຈັດຕັ້ງປະຕິບັດໃຫ້ມີປະສິດທິຜົນ.