(ສພຊ) ກອງປະຊຸມໃຫຍ່ ຄັ້ງທີ IV ຂອງໜ່ວຍພັກກົມເລຂານຸການ ໄດ້ຈັດຂຶ້ນວັນທີ 8 ກັນຍາ 2021 ຢູ່ຫໍສະພາແຫ່ງຊາດຫຼັງໃໝ່ ພາຍໃຕ້ການເປັນປະທານຂອງສະຫາຍ ສິງຄໍາ ວົງພະຈັນ ຮອງເລຂາຄະນະພັກຮາກຖານຄະນະເລຂາທິການສະພາແຫ່ງຊາດ, ເລຂາໜ່ວຍພັກກົມເລຂານຸການ; ເຂົ້າຮ່ວມມີສະຫາຍ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ຄະນະບໍລິຫານງານພັກສະພາແຫ່ງຊາດ, ເລຂາຄະນະພັກຮາກຖານຄະນະເລຂາທິການສະພາແຫ່ງຊາດ; ມີສະມາຊິກພັກສົມບູນ ເຂົ້າຮ່ວມທັງໝົດ 17 ສະຫາຍ ຍິງ 7 ສະຫາຍ, ບັນດາສະຫາຍກຳມະການຄະນະຮາກຖານພັກ, ຜູ້ຕາງໜ້າຄະນະຊ່ວຍວຽກຄະນະບໍລິຫານງານພັກສະພາແຫ່ງຊາດ, ອົງການຈັດຕັ້ງມະຫາຊົນພາຍໃນໜ່ວຍພັກພ້ອມດ້ວຍແຂກຖືກເຊີນ.
ກອງປະຊຸມໃຫຍ່ຄັ້ງທີ IV ຂອງໜ່ວຍພັກກົມເລຂານຸການ ຜູ້ແທນກອງປະຊຸມໄດ້ມີຄວາມເປັນເອກະພາບຮັບຮອງເອົາເນື້ອໃນສໍາຄັນຕົ້ນຕໍ ເປັນຕົ້ນ: ບົດລາຍງານການເມືອງຂອງໜ່ວຍພັກກົມເລຂານຸການ ເຊິ່ງໄດ້ສະຫຼຸບຕີລາຄາຜົນງານການເຄື່ອນໄຫວທີ່ຍາດມາໄດ້ ໃນໄລຍະຜ່ານມາ ໂດຍຍົກໃຫ້ເຫັນດ້ານດີທີ່ເປັນມູນເຊື້ອ, ບັນດາຜົນງານທີ່ຈະຕ້ອງເສີມຂະຫຍາຍ ເປັນຕົ້ນດ້ານການເມືອງ-ແນວຄິດ, ຄວາມເປັນເອກະພາບໃນການຊີ້ນໍາ-ນໍາພາ ແລະຕິດຕາມຊຸກຍູ້ວຽກງານຢ່າງໃກ້ຊິດ ຂອງຄະນະໜ່ວຍພັກ, ຄວາມເອົາໃຈໃສ່ເປັນເສນາທິການວຽກງານເລຂານຸການ ໃຫ້ແກ່ສະພາແຫ່ງຊາດ; ກອງປະຊຸມໄດ້ຮັບຮອງເອົາທິດທາງແຜນການເຄື່ອນໄຫວວຽກງານຂອງໜ່ວຍພັກ ໃນຕໍ່ໜ້າ ເຊິ່ງເນັ້ນໃສ່ຈະສູ້ຊົນປະຕິບັດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນການວຽກງານລວມຂອງສະພາແຫ່ງຊາດ ກໍຄືກອງປະຊຸມໃຫຍ່ ຄັ້ງທີ IV ຂອງໜ່ວຍພັກກົມເລຂານຸການວາງອອກ ໃຫ້ປະກົດຜົນເປັນຈິງ ຕາມຂົງເຂດວຽກງານທີ່ໜ່ວຍພັກຮັບຜິດຊອບ; ກອງປະຊຸມໄດ້ຮັບຮອງເອົາບົດສໍາຫຼວດຕີລາຄາການຊີ້ນໍາ-ນໍາພາຂອງຄະນະໜ່ວຍພັກກົມເລຂານຸການ ຕະຫຼອດໄລຍະຜ່ານ (2019-2021) ຊຶ່ງຍົກໃຫ້ເຫັນຜົນສໍາເລັດດ້ານດີທີ່ຕັ້ງໜ້າ ແລະບາງດ້ານທີ່ຈະຕ້ອງເປັນບົດຮຽນໃຫ້ແກ່ຄະນະໜ່ວຍພັກຊຸດໃໝ່ ນໍາໄປປັບປຸງແກ້ໄຂ ແນໃສ່ຮັບປະກັນເຮັດໃຫ້ການເຄື່ອນໄຫວວຽກງານໃນຕໍ່ໜ້າ ມີປະສິດທິຜົນດີຂຶ້ນກວ່າເກົ່າ.
ບັນດາສະຫາຍຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງຄະນະ ໜ່ວຍພັກກົມເລຂານຸການ ຊຸດໃໝ່ ບົນຫຼັກການລວມສູນປະຊາທິປະໄຕ ພ້ອມທັງຖືກຕ້ອງ, ສອດຄ່ອງກັບມາດຖານ ແລະ ເງື່ອນໄຂທີ່ກໍານົດໄວ້, ເຊິ່ງມີຜູ້ສະໝັກເລືອກຕັ້ງ 5 ສະຫາຍ ຍິງ 2 ສະຫາຍ; ກອງປະຊຸມໄດ້ເລືອກຕັ້ງເອົາຄະນະພັກ ຊຸດໃຫມ່ ຈຳນວນ 3 ສະຫາຍ ຍິງ 1 ສະຫາຍ ແລະ ໄດ້ເປີດກອງປະຊຸມຄັ້ງປະຖົມມະລືກຂອງຄະນະໜ່ວຍພັກ ເລືອກເອົາສະຫາຍ ຄຳສະໄໝ ສຳມາວົງເປັນເລຂາໜ່ວຍພັກ, ສະຫາຍ ສຸລະສັກ ສຸວັນນະວົງ ຮອງເລຂາໜ່ວຍພັກ, ສະຫາຍ ນາງ ກາບແກ້ວ ພິໄລສານ ເປັນກຳມະການ ທັງເປັນປະທານກວດກາ.
ໂອກາດດຽວກັນນີ້, ກອງປະຊຸມໄດ້ຮັບຟັງການໂອ້ລົມຂອງສະຫາຍ ນາງ ປິ່ງຄໍາ ລາຊະສີມມາ ເຊິ່ງສະ ຫາຍໄດ້ເນັ້ນບາງບັນຫາທີ່ຈະຕ້ອງເອົາໃຈໃສ່ໃນຕໍ່ໜ້າ ເປັນຕົ້ນສືບຕໍ່ເພີ່ມທະວີຄວາມເອົາໃຈໃສ່ຕໍ່ວຽກງານການເມືອງແນວຄິດ ໃຫ້ມີຄວາມໜັກແໜ້ນ, ຮັກສາມູນເຊື້ອສາມັກຄີເປັນເອກະພາບຢູ່ພາຍໃນ. ໄປຄຽງຄູ່ກັບການເອົາໃຈໃສ່ຕໍ່ການປັບປຸງວິທີການເຄື່ອນໄຫວຈັດຕັ້ງນຳພາ, ຄະນະໜ່ວຍພັກ ແລະ ຄະນະກົມ ຕ້ອງເອົາໃຈໃສ່ກຳແໜ້ນ ແລະນຳພາວຽກງານແນວຄິດການເມືອງ, ແກ້ໄຂສະພາບແນວຄິດຂອງສະມາຊິກພັກ, ພະນັກງານ ໃຫ້ແທດຕົວຈິງ ແລະ ດ້ວຍມາດຕະການທີ່ເໝາະສົມ ແລະ ສອດຄ່ອງ; ສືບຕໍ່ປັບປຸງກົງຈັກການຈັດຕັ້ງຂອງກົມເລຂານຸການ ໃຫ້ແທດເໝາະ, ເຂັ້ມແຂງ, ໜັກແໜ້ນ, ມີກົນໄກຄຸ້ມຄອງບໍລິຫານ ເປັນຕົ້ນແມ່ນ: ດ້ານວິຊາສະເພາະ ໃຫ້ມີຄວາມຄ່ອງຕົວ ແລະ ແທດຕົວຈິງ, ບັນຈຸສັບຊ້ອນບຸກຄະລາກອນ ໃຫ້ຄົບຖ້ວນຕາມຕຳແໜ່ງງານ, ແທດເໝາະກັບສະພາບຕົວຈິງຂອງໜ້າວຽກ ໃນຖັນແຖວພະນັກງານ-ລັດຖະກອນ; ຍົກລະດັບໃຫ້ພະນັກງານວິຊາການ ໃນການເຮັດໜ້າທີເປັນເສນາທິການທີ່ດີໃຫ້ແກ່ການນໍາຂັ້ນສູງ ກໍຄືຄະນະພັກຮາກຖານ, ຄະນະປະຈຳສະພາແຫ່ງຊາດ ແລະ ຄະນະເລຂາທິການສະພາແຫ່ງຊາດ ໂດຍສະເພາະແມ່ນການຝຶກຝົນຫຼໍ່ຫຼອມ, ການຝຶກອົບຮົມ ເພື່ອຍົກລະດັບຂີດຄວາມສາມາດເຮັດວຽກຕົວຈິງ, ຄະນະໜ່ວຍພັກ, ຄະນະກົມ ແລະ ບັນດາສະຫາຍສະມາຊິກພັກກົມເລຂານຸການ ຕ້ອງມີແຜນການປັບປຸງຍົກລະດັບຄຸນນະພາບ ຂອງວຽກງານເສນາທິການ.
(ສົມນຶກ ແກ້ວໄຊຍະຈັກ)