ຕອນເຊົ້າວັນທີ 26 ສິງຫາ 2022 ສະພາປະຊາຊົນແຂວງ ຫລວງນ້ຳທາ ໄດ້ເປີດກອງປະຊຸມສະຫລຸບຕີລາຄາຖອດຖອນບົດຮຽນກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ3 ຂອງສະພາປະຊາຊົນແຂວງຊຸດທີII ຂື້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານ ອ່ອນຈັນ ທຳມະວົງ ກຳມະການປະຈຳພັກແຂວງ ຮອງເຈົ້າແຂວງ ຜູ້ຊີ້ນຳຂົງເຂດເສດຖະກິດຂອງແຂວງ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການຂອງແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 30 ກວ່າທ່ານ.
ກອງປະຊຸມໄດ້ຮັບຟັງບົດລາຍງານ ການສະຫລຸບຕີລາຄາກ່ຽວກັບການກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ3 ຂອງສະພາປະຊາຊົນແຂວງຊຸດທີII ຊຶ່ງກອງປະຊຸມໄດ້ດຳເນີນເປັນເວລາ 3 ວັນ ໃນຕົ້້ນເດືອນ ສິງຫາ 2022 ດ້ວຍຜົນສຳເລັດອັນຈົບງາມ ແລະ ກອງປະຊຸມສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ແຂກຖືກເຊີນ ໄດ້ສຸ່ມໃສ່ປະກອບຄໍາເຫັນຕໍ່ເນື້ອໃນທີ່ນໍາເຂົ້າໃນກອງປະຊຸມຢ່າງມີຈຸດສຸມ ເພື່ອເຮັດໃຫ້ເນື້ອໃນຄົບຖ້ວນສົມບຸນ, ເຮັດໃຫ້ການລົງຄະແນນສຽງຮັບຮອງເອົາມະຕິກອງປະຊຸມ ໄດ້ຮັບຄະແນນສຽງເຫັນດີເປັນສ່ວນຫລາຍ ໂດຍສະເລ່ຍ ໃນລະດັບ 96%-100% ຊຶ່ງກອງປະຊຸມຄັ້ງນີ້ໄດ້ຮັບຮອງລົງຄະແນນສຽງເອົາມະຕິຕ່າງໆ ຈຳນວນ 7 ສະບັບ; ແລະ ເນື້ອໃນກອງປະຊຸມສະໄໝສາມັນຄັ້ງນີ້ ເປັນການຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ່ VIII ຂອງອົງຄະນະພັກແຂວງ, ສອງວາລະແຫ່ງຊາດ, ການຈັດຕັ້ງປະຕິບັດພາລະບົດບາດຂອງສະພາປະຊາຊົນແຂວງ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ໃນການພິຈາລະນາຮັບຮອງເອົາການສ້າງ ແລະ ປັບປຸງນິຕິກຳໃຕ້ກົດໝາຍ, ບັນຫາສຳຄັນພື້ນຖານຂອງແຂວງ , ປະກອບສ່ວນເຮັດໃຫ້ແຂວງ ມີສະຖຽນລະພາບທາງດ້ານສັງຄົມໜັກແໜ້ນ, ສັງຄົມມີຄວາມສະຫງົບ ແລະ ເສດຖະກິດສືບຕໍ່ມີການຂະຫຍາຍຕົວຢ່າງຕໍ່ເນື່ອງ; ພ້ອມດຽວກັນ ຜູ້ແທນກອງປະຊຸມໄດ້ແລກປ່ຽນປະກອບຄຳຄິດເຫັນກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ3 ທີ່ສຳເລັດໄປແລ້ວນັ້ນຢ່າງມີຈຸດສຸມ ເພື່ອເປັນການຖອດຖອນບົດຮຽນ ເຮັດໃຫ້ການກະກຽມ ແລະ ດຳເນີນກອງປະຊຸມສະໄໝສາມັນ ຂອງສະພາປະຊາຊົນແຂວງ ຄັ້ງຕໍ່ໄປໃຫ້ມີເນື້ອໃນຖືກຕ້ອງຄົບຖ້ວນ, ວ່ອງໄວທວງທັນກັບເວລາ.
ໂອກາດນີ້ ຍັງໄດ້ຮັບຟັງຄຳເຫັນຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ກ່ອນອື່ນທ່ານໄດ້ເອກະພາບ ແລະ ຊົມເຊີຍຕໍ່ກັບຄຳຄິດເຫັນໃນກອງປະຊຸມຄັ້ງນີ້ ແລະ ບັນດາຄຳເຫັນ, ຂໍ້ຄົງຄ້າງ ແມ່ນຈະນຳປຶກສາຫາລື, ແກ້ໄຂ ໃນຕໍ່ໜ້າໃຫ້ດີຂຶ້ນກ່ອນເກົ່າ; ພ້ອມທັງ ຮຽກຮ້ອງໃຫ້ອານຸກຳມະການກະກຽມເນື້ອໃນຕ່າງໆ ນຳເອົາເນື້ອໃນຈິດໃຈກອງປະຊຸມນີ້ໄປປັບປຸງ, ແກ້ໄຂ ໃນຂໍ້ຕົກບົກພ່ອງຂອງຕົນ ເພື່ອເຮັດໃຫ້ກອງປະຊຸມສະໄໝສາມັນ ຂອງສະພາປະຊາຊົນແຂວງ ຄັ້ງຕໍ່ໄປ ໃຫ້ທວງທັນເວລາ, ຖືກຕ້ອງສອດຄອງກັບກົດໝາຍ ແລະ ຮັບປະກັນຄຸນນະພາບໃຫ້ດີຂຶ້ນກວ່າເກົ່າ.
\