(ສພຊ) ວັນທີ 24 ສິງຫາ 2022 ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດ 14 ທັງເປັນປະທານສະພາປະຊາຊົນແຂວງສາລະວັນ ພ້ອມດ້ວຍຄະນະ ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງສາລະວັນ ຊຸດທີ II ຢູ່ທີ່ສະໂມສອນເມືອງສະໝ້ວຍ ແລະ ບ້ານລະຮາງ; ໂດຍມີອໍານາດການປົກຄອງເມືອງ, ຄະນະບ້ານ ແລະ ພໍ່ແມ່ປະຊາຊົນທັງພາຍໃນບ້ານອ້ອມຂ້າງເມືອງເຂົ້າຮ່ວມ.

ໂອກາດດັ່ງກ່າວ ຄະນະຜູ້ແທນ ໄດ້ຜັດປ່ຽນເຜີຍແຜ່ຜົນຂອງກອງປະຊຸມ ປະກອບມີ ບັນດາມະຕິ, ກົດໝາຍ ແລະ ເນື້ອໃນບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ບັນດາເນື້ອໃນເອກະສານ ບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງສາລະວັນ ຊຸດທີ II; ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ມີການແລກປ່ຽນຄຳຄິດເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ.

ພາບ-ຂ່າວ: ດີລຳພົນ ພົມມະຈັນ