(ສພຊ) ວັນທີ 20 ສິງຫາ 2021, ທີ່ຫ້ອງປະຊຸມສະພາປະຊາຊົນແຂວງ (ສພຂ) ຄໍາມ່ວນ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນ ໂດຍການຕ້ອນຮັບຂອງທ່ານ ບຸນມີ ພິມມະສອນ ປະທານ ສພຂ; ມີບັນດາສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 12 ແຂວງຄໍາມ່ວນ, ສະມາຊິກສະພາປະຊາຊົນແຂວງ (ສສຂ), ຄະນະເລຂາທິການ, ບັນດາຄະນະກຳມະການ, ພ້ອມດ້ວຍຫົວໜ້າ-ຮອງຫົວໜ້າຂະແໜງການຂອງ ສພຂ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ບຸນມີ ພິມມະສອນ ໄດ້ລາຍງານໂດຍຫຍໍ້ກ່ຽວກັບຜົນສຳເລັດຂອງກອງປະຊຸມຄັ້ງປະຖົມມະລືກ ຂອງ ສພຂ ຄໍາມ່ວນ ຊຸດທີ II, ໃນການຮັບເລືອກຕັ້ງ ສສຂ ຄໍາມ່ວນ ໂດຍມີທັງໝົດ 35 ທ່ານ ຍິງ 14 ທ່ານ; ໃນນີ້, ມີ ສສຊ ປະຈໍາເຂດເລືອກຕັ້ງຄວບ ສສຂ ຄໍາມ່ວນ ຈໍານວນ 5 ທ່ານ, ຍິງ 2 ທ່ານ ແລະ  ສສຂ ຄໍາມ່ວນ ມີຈໍານວນ 30 ທ່ານ, ຍິງ 12 ທ່ານ; ພ້ອມນັ້ນ, ຍັງໄດ້ພິຈາລະນາ ແລະ ຮັບຮອງເອົາໂຄງປະກອບບຸກຄະລະກອນຂອງອົງການປົກແຂວງ ເຊິ່ງກອງປະຊຸມຄັ້ງປະຖົມມະລືກ ຂອງ ສພຂ ຊຸດທີ  II ໄດ້ດຳເນີນໃນວັນທີ 21 ພຶດສະພາ 2021 ທີ່ຜ່ານມາແລະ ໄດ້ລາຍງານກ່ຽວກັບການຈັດຕັ້ງເຜີຍແຜ່ຜົນສຳເລັດຂອງກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດ IX ແລະ ສພຂ ຊຸດທີ II ຕິດພັນກັບການລົງເກັບກຳບັນດາຄໍາສະເໜີຈາກພໍ່ແມ່ປະຊາຊົນ ເຊິ່ງໄດ້ເຄື່ອນໄຫວທັງໝົດ 60 ຈຸດໃນທົ່ວແຂວງ; ມີຜູ້ເຂົ້າຮ່ວມຮັບຟັງທັງໝົດ 6,699 ເທື່ອຄົນ; ຍິງ 2,945 ເທື່ອຄົນ; ແລະ ໄດ້ຮັບຄໍາສະເໜີຈາກອົງການຈັດຕັ້ງ ແລະ ພໍ່ແມ່ປະຊາຊົນ ໃນ 10 ເມືອງທົ່ວແຂວງ ທີ່ຕິດພັນກັບຊີວິດການເປັນຂອງປະຊາຊົນບັນດາເຜົ່າເພື່ອນຳໄປສະເໜີໃຫ້ພາກສ່ວນທີ່ກ່ຽວຂ້ອງແກ້ໄຂ. ພ້ອມນັ້ນ, ຍັງໄດ້ລາຍງານກ່ຽວກັບສະພາບການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຂອງແຂວງ  ຍ້ອນພາຍໃຕ້ການຊີ້ນຳ-ນຳພາຂອງຄະນະພັກ-ອຳນາດການປົກຄອງແຕ່ລະຂັ້ນ, ໄດ້ພ້ອມກັນຕັ້ງໜ້າ ຈັດຕັ້ງປະຕິບັດວຽກງານຕ່າງໆຕາມແຜນການທີ່ວາງໄວ້ ຄື: ທົ່ວແຂວງສາມາດຮັບປະກັນສະຖຽນນະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ຄວາມທຸກຍາກຂອງປະຊາຊົນໄດ້ຮັບການແກ້ໄຂ ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນເປັນກ້າວໆ, ໄດ້ຫັນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ປັບປຸງກົງຈັກການຈັດຕັ້ງບໍລິຫານລັດໄປຕາມທິດກະທັດຮັດຕາມມະຕິຄໍາສັ່ງຂອງຄະນະພັກຂັ້ນເທິງ.
ໃນຕອນທ້າຍກອງປະຊຸມ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ມີຄໍາເຫັນ ແລະ ໃຫ້ທິດຊີ້ນໍາ ເຊິ່ງທ່ານໄດ້ສະແດງຄວາມຊົມເຊີຍຕໍ່ຜົນສໍາເລັດການເລືອກຕັ້ງ ສສຊ ຊຸດທີ IX ແລະ ສສຂ ຄໍາມ່ວນ ຊຸດທີ II ແລະ ຜົນສໍາເລັດຂອງກອງປະຊຸມຄັ້ງປະຖົມມະລືກ ຂອງ ສພຂ ຊຸດທີ II; ທ່ານໄດ້ເນັ້ນໜັກໃຫ້ຄະນະ ສສຊ ປະຈໍາເລືອກຕັ້ງທີ 12 ແຂວງຄໍາມ່ວນ ແລະ  ສສຂ ເອົາໃຈໃສ່ຍົກສູງເປັນເຈົ້າການໃນການຈັດຕັ້ງປະຕິບັດກົດໝາຍ, ລັດຖະທຳມະນູນໃຫ້ເຂັ້ມງວດ, ສ້າງຄວາມເຂົ້າໃຈໃຫ້ປະຊາຊົນໄດ້ຮັບຮູ້, ເຂົ້າໃຈກົດໝາຍ ແລະ ລັດຖະທໍາມະນູນຢ່າງເລິກເຊິ່ງຍິ່ງຂຶ້ນ; ສືບຕໍໍ່ຈັດຕັ້ງເຊື່ອມຊຶມ, ກໍາແໜ້ນ ແລະ ຜັນຂະຫຍາຍບັນດາທິດນໍາ ມະຕິ ຄໍາສັ່ງຕ່າງໆ ຂອງພັກ, ລັດຖະບານ ກໍໍຄືຂອງແຂວງ ໃຫ້ເລິກເຊິ່ງທົົ່ວເຖິງ ແລະ ໜັກແໜ້ນ ສູ່ການຈັດຕັ້ງປະຕິບັດຕົວຈິງ ຢູ່ບັນດາຂະແໜງ ການ; ເອົາໃຈໃສ່ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫ່ຍຄັ້ງທີ XI ຂອງພັກ, ມະຕິຂອງກອງປະຊຸມຄົບຄະນະສະໄໝວິສາມັນຂອງຄະນະບໍລິຫານງານສູນກາງພັກສະໄໝ XI, ມະຕິກອງປະຊຸມໃຫ່ຍຄັ້ງທີ X ຂອງອົງຄະນະພັກແຂວງ, ໂດຍການນໍາພາ-ຊີ້ນໍາຂະແໜງການທີ່ກ່ຽວຂ້ອງ ຈັດຕັ້ງຜັນຂະຫຍາຍໃນແຕ່ລະຂົງເຂດວຽກງານໃຫ້ເປັນອັນລະອຽດຂອງແຕ່ລະຂະແໜງການທີ່ກ່ຽວຂ້ອງ, ຄະນະພັກ-ຄະນະນໍາ ຕ້ອງໄດ້ກ້າຕັດສິນໃຈແກ້ໄຂບັນຫາໃຫ້ເກີດຜົນປະໂຫຍດສູງສຸດຕໍໍ່ການພັດທະນາຂອງແຂວງ ກໍຄືຂອງປະເທດຊາດ, ການແກ້ໄຂບັນດາປາກົດການຫຍໍ້ທໍໍ້ທີ່ຍັງເປັນໄພຂົົ່ມຂູ່ຕໍໍ່ການພັດທະນາເສດຖະກິດ-ສັງຄົມ ແລະ ບັນຫາອື່ນໆ; ສືບຕໍໍ່ເອົາໃຈໃສ່ການນໍາພາ-ຊີ້ນໍາຮອບດ້ານ ຕໍໍ່ວຽກງານປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຂອງລັດຖະບານ ກໍຄືຂອງແຂວງ ໃຫ້ເຂັ້ມງວດ, ຮັບປະກັນສຸຂະພາບ ແລະ ຊີວິດຂອງປະຊາຊົນພາຍໃນແຂວງ.
(ເອື້ອ ມະໂນສິງ)