(ສພຊ) ລະຫວ່າງວັນທີ 19-22 ສິງຫາ 2022 ຄະນະຜູ້ແທນຄະນະເລຂາທິການສະພາແຫ່ງຊາດ ແຫ່ງ ສປປລາວ ນໍາໂດຍສະຫາຍ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ເລຂາທິການສະພາແຫ່ງຊາດລາວ ໄດ້ເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນ ຄັ້ງທີ XI ລະຫວ່າງຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ທີ່ໄດ້ຈັດຂຶ້ນ ທີ່ແຂວງກວາງບິງ, ສສ.ຫວຽດນາມ.
ທັງນີ້, ກໍແມ່ນການຈັດຕັ້ງຜັນຂະຫຍາຍເນື້ອໃນບົດບັນທຶກວ່າດ້ວຍການຮ່ວມມື ລະຫວ່າງສອງສະພາແຫ່ງຊາດລາວ-ຫວຽດນາມ, ບົດບັນທຶກວ່າດ້ວຍການຮ່ວມມື ລະຫວ່າງຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ສະບັບປີ 2017 ແລະ ສະບັບລົງວັນທີ 16 ພຶດສະພາ 2022 ກໍຄືບົດບັນທຶກຜົນຂອງກອງປະຊຸມພົບປະແລກປ່ຽນບົດຮຽນ ຄັ້ງທີ X ທີ່ແຂວງຊຽງຂວາງ ໃນປີ 2019 ແລະ ຍັງເປັນກິດຈະກໍາໜຶ່ງທີ່ສຳຄັນຂອງສອງສະພາແຫ່ງຊາດ ໃນການປະກອບສ່ວນສະເຫຼີມສະຫຼອງ ສອງວັນປະຫວັດສາດ ຂອງສອງປະເທດ ລາວ-ຫວຽດນາມ-ລາວ ຄື: ວັນຄົບຮອບ 60 ປີ (5/9/1962-5/9/2022) ແຫ່ງການສ້າງຕັ້ງສາຍພົວພັນການທູດ ແລະ 45 ປີ (18/7/1977-18/7/2022) ວັນເຊັນສັນຍາມິດຕະພາບ ແລະ ການຮ່ວມມືລະຫວ່າງລາວ-ຫວຽດນາມ.
ໃນການເຄື່ອນໄຫວ, ຄະນະຜູ້ແທນຄະນະເລຂາທິການສະພາແຫ່ງຊາດລາວ ໄດ້ພົບປະສອງຝ່າຍ ກັບສະຫາຍ ບຸ່ຍ ວັນ ເກື່ອງ ເລຂາທິການ, ຫົວໜ້າຫ້ອງວ່າການສະພາແຫ່ງຊາດຫວຽດນາມ ເຊິ່ງທັງສອງຝ່າຍ ໄດ້ຕີລາຄາຄືນການພົວພັນຮ່ວມມື ໂດຍສະເພາະແມ່ນການຈັດຕັ້ງປະຕິບັດບົດບັນທຶກການຮ່ວມມື ສະບັບປີ 2017-2019 ແລະ ບົດບັນທຶກທີ່ເຊັນກັນໃນເດືອນພຶດສະພາ 2022 ພ້ອມທັງປຶກສາຫາລືທິດທາງແຜນການຮ່ວມມື ໃນຕໍ່ໜ້າ. ພ້ອມນັ້ນ, ຍັງໄດ້ເຂົ້າຢ້ຽມຂໍ່ານັບສະຫາຍ ເຈີ່ນ ແທັງ ເມີ້ນ ກໍາມະການກົມການເມືອງສູນກາງພັກ, ຮອງປະທານສະພາແຫ່ງຊາດ ສສ.ຫວຽດນາມ ໂດຍສະຫາຍເລຂາທິການ ໄດ້ສະແດງຄວາມຮູ້ບຸນຄຸນ ແລະ ຂອບໃຈຕໍ່ສະຫາຍຮອງປະທານ ຜູ້ປະຈຳການສະພາແຫ່ງຊາດຫວຽດນາມ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ມີທິດຊີ້ນຳກ່ຽວກັບການເສີມຂະຫຍາຍການພົວພັນ 2 ຝ່າຍ, ສະຫາຍຫົວໜ້າຄະນະຜູ້ແທນຝ່າຍລາວ ຍັງໄດ້ຕີລາຄາສູງການພົວພັນຮ່ວມມືສອງຝ່າຍໃນໄລຍະຜ່ານມາ ແລະ ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າ ຂອງສະຫາຍອ້າຍນ້ອງຫວຽດນາມ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ແລະ ພາລະກິດປົກປັກຮັກສາ ແລະ ພັດທະນາປະເທດຊາດ ໃນປັດຈຸບັນ, ພິເສດ ຕໍ່ການຊ່ວຍເຫຼືອທຶນຮອນອັນລ້ຳຄ່າຂອງພັກ, ລັດ, ສະພາແຫ່ງຊາດ ແລະ ປະຊາຊົນຫວຽດນາມອ້າຍນ້ອງ ໃນການສ້າງຫໍສະພາແຫ່ງຊາດລາວ ຫຼັງໃໝ່, ທຶນໃນການບູລະນະປົກປັກຮັກສາຫໍສະພາແຫ່ງຊາດ, ອຸປະກອນເຕັກນິກຮັບໃຊ້ຫ້ອງການ, ອຸປະກອນການແພດ ແລະ ທຶນຮອນໃນການບໍາລຸງສ້າງພະນັກງານ-ລັດຖະກອນ ຂອງສະພາແຫ່ງຊາດລາວ.
ໃນໂອກາດນີ້, ສະຫາຍຮອງປະທານສະພາແຫ່ງຊາດຫວຽດນາມ, ສະຫາຍເລຂາທິການສະພາແຫ່ງຊາດລາວ, ສະຫາຍຫົວໜ້າຫ້ອງວ່າການສະພາແຫ່ງຊາດຫວຽດນາມ ແລະ ສະຫາຍເລຂາພັກແຂວງກວາງບິງ ໄດ້ເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນ ຄັ້ງທີ XI ທີ່ໄດ້ສຸມໃສ່ແລກປ່ຽນບົດຮຽນ ກ່ຽວກັບການຍົກສູງການເປັນເສນາທິການຮັບໃຊ້ໃຫ້ແກ່ກອງປະຊຸມສະພາແຫ່ງຊາດ ໂດຍການຫັນເປັນທັນສະໄໝ, ການຍົກສູງວຽກງານຂໍ້ມູນ-ຂ່າວສານ ແລະ ສື່ມວນຊົນ, ການເພີ່ມທະວີການປະສານສົມທົບ ລະຫວ່າງ ຫ້ອງວ່າການສະພາແຫ່ງຊາດ ຫຼື ຄະນະເລຂາທິການສະພາແຫ່ງຊາດ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ເຊິ່ງເປັນຫົວຂໍ້ ທີ່ເຕັມໄປດ້ວຍເນື້ອໃນສຳຄັນ ທີ່ມີຜົນປະໂຫຍດຫຼາຍ, ແທດເໝາະຕົວຈິງ ແລະ ສາມາດນໍາໄປຈັດຕັ້ງປະຕິບັດຕົວຈິງໄດ້.
ໂອກາດດັ່ງກ່າວ, ສະຫາຍ ບຸ່ຍ ວັນ ເກື່ອງ ຍັງໄດ້ເປັນເຈົ້າພາບຈັດງານລ້ຽງເພື່ອຊົມເຊີຍຜົນສຳເລັດ ກອງປະຊຸມສໍາມະນາແລກປ່ຽນບົດຮຽນ ຄັ້ງທີ XI ແລະ ສະຫຼຸບຂະບວນການແຂ່ງຂັນກິລາມິດຕະພາບ ແລະ ແລກປ່ຽນສິລະປະ-ວັດທະນະທໍາ ລະຫວ່າງຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ທັງໄດ້ເຄື່ອນໄຫວທັດສະນະສຶກສາ ແລະ ທ່ຽວຊົມແຫຼ່ງທ່ອງທ່ຽວຟັອງຍາແກບ່າງ, ທ່ຽວຊົມເຂດຕົວເມືອງ ແລະ ໄດ້ຕ້ອນຮັບຈາກສະຫາຍ ວູ໌ ດ໋າຍ ຖັງ ກໍາມະການສູນກາງພັກ, ເລຂາພັກແຂວງ, ຫົວໜ້າຄະນະສະມາຊິກສະພາແຫ່ງຊາດ ແຂວງກວາງບິງ ຢ່າງອົບອຸ່ນ ໃນຖານສະຫາຍອ້າຍນ້ອງ.