ຕອນເຊົ້າວັນທີ 22 ສິງຫາ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດກອງປະຊຸມຄົບຄະນະ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງ ຄະນະສະມາຊິກສະພາແຫ່ງຊາດ (ຄສຊ) ປະຈໍາເຂດເລືອກຕັ້ງ 2 ແຂວງຜົ້ງສາລີ; ໂດຍການເປັນປະທານຂອງທ່ານ ທອງສີ ເສົາລິພົມ ປະທານ ຄສຊ ປະຈໍາເຂດເລືອກຕັ້ງ 2 ແຂວງຜົ້ງສາລີ; ມີ ທ່ານ ຄໍາຜອຍ ວັນນະສານ ເຈົ້າແຂວງ-ແຂວງຜົ້ງສາລີ, ຮອງເຈົ້າແຂວງ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ 2 , ສະມາຊິກສະພາປະຊາຊົນແຂວງ (ສສຂ), ມີຕາງໜ້າຈາກສະມາຊິກອົງການປົກຄອງແຂວງ, ແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ, ອົງການພັກ-ລັດ, ອົງການລັດທຽບເທົ່າຂັ້ນແຂວງ ແລະ ພະນັກງານຊ່ວຍວຽກຄະນະ ສສຂ ປະຈໍາເມືອງເຂົ້າຮ່ວມ.

ທີ່ກອງປະຊຸມໄດ້ຮັບຟັງທ່ານ ສົມຈິດ ຫັບລະກອນ ຮອງປະທານ ຄສຊ ປະຈໍາເຂດເລືອດຕັ້ງ02 ຜ່ານບົດສະຫຼຸບຕິລາຄາການເຄື່ອນໄຫວວຽກງານ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ຮັບຟັງທ່ານ ນາງ ຈັນມະນີ ດວງພາສຸກ ສສຊ ປະຈໍາເຂດເລືອກຕັ້ງ 2 ຂຶ້ນເຜີຍແຜ່ແຜນດໍາເນີນງານ ຂອງຄະນະສະມາຊິກສະພາແຫ່ງຊາດ ຊຸດທີ IX ປະຈໍໍາເຂດເລືອກຕັ້ງທີ 2 ແຂວງຜົ້ງສາລິ ໄລຍະ 5 ປີ (2021-2025); ເຜີຍແຜ່ຂໍ້ກໍານົດ ວ່າດ້ວຍແບບແຜນວິທີເຮັດວຽກ ຂອງປະທານ, ຮອງປະ ທານຄະນະສະມາຊິກ ສະພາແຫ່ງຊາດຊຸດທີ IX ປະຈໍໍາເຂດເລືອກຕັ້ງທີ 2 ແຂວງຜົ້ງສາລິ; ເຜີຍແຜ່ຂໍ້ກໍານົດ ວ່າດ້ວຍທີ່ຕັ້ງພາລະບົດບາດ ແລະ ການເຄື່ອນໄຫວວຽກງານ ຂອງຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ. ຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ຜັດປ່ຽນກັນປະກອບຄໍາເຫັນຕໍ່ເນື້ອໃນດັ່ງກ່າວຢ່າງກົງໄປກົງມາ, ທັງນີ້ກໍເພື່ອຮັບປະກັນໃຫ້ເນື້ອໃນມີຄວາມອຸມດົມສົມບຸນ, ທັງຮັບປະກັນໃຫ້ແຜນການເຄື່ອນໄຫວວຽກງານ 6 ທ້າຍປີ ຂອງ ຄສຊ ປະຈໍາເຂດເລືອກຕັ້ງ 2 ຖືກຕ້ອງ, ສອດຄ່ອງກັບສະພາບ ໃນປະຈຸບັນ.

ຕອນທ້າຍຂອງກອງປະຊຸມ ປະທານກອງປະຊຸມສັງລວມຄືນຜົົນຂອງກອງປະຊຸມຄັ້ງນີ້ ເຊິ່ງທ່ານກໍໄດ້ຕິລາສູງຕໍ່ການເຄື່ອນໄຫວວຽກຂອງ ຄສຊ ປະຈໍາເຂດເລືອກຕັ້ງ 2 ເປັນຕົ້ນ: ດ້ານດີຜົນສຳເລັດ, ດ້ານອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ທີ່ໄດ້ເອົາໃຈໃສ່ໃນການເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ ທີ່ໄດ້ກຳນົດໄວ້ໃນກົດໝາຍ ວ່າດ້ວຍສະພາແຫ່ງຊາດ ແລະ ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານ ຂອງຄະສະມາຊິກສະພາແຫ່ງຊາດ ປະຈຳເຂດເລືອກຕັ້ງ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ