(ສພຊ) ລະຫວ່າງວັນທີ 10-11 ສິງຫາ 2022, ທ່ານ ພອນສານ ວິໄລເມັ້ງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ຮອງປະທານຄະນະບໍລິຫານງານສູນກາງສະຫະພັນກໍາມະບານລາວ ພ້ອມດ້ວຍວິຊາການຕິດຕາມ 1 ທ່ານ ໄດ້ເຂົ້າຮ່ວມກອງປະຊຸມສຳມະນາ ພາຍໃຕ້ຫົວຂໍ້: “ບົດບາດຂອງລັດຖະສະພາໃນການສົ່ງເສີມການຕອບໂຕ້ແບບກວມລວມ ແລະ ຍືນຍົງ ຕໍ່ພາວະສຸກເສີນທາງດ້ານສຸຂະພາບ: ກໍລະນີສຶກສາກ່ຽວກັບປະສິດທິຜົນ ແລະ ອຸປະສັກ ຕໍ່ແຜນການຕອບໂຕ້ກັບພະຍາດໂຄວິດ-19 ໃນລະດັບຊາດ” ເຊິ່ງຈັດຂຶ້ນທີ່ຊຽມລຽບ, ຣາຊະອານາຈັກກໍາປູເຈຍ.
ກອງປະຊຸມສຳມະນາດັ່ງກ່າວ, ຈັດຂຶ້ນພາຍໃຕ້ການຮ່ວມມືຂອງຄະນະກຳມາທິການທີ 8 ກ່ຽວກັບວຽກງານສາທາລະນະສຸກ, ສັງຄົມ, ຊາວໜຸ່ມ, ແຮງງານ, ການເຝິກອົບຮົມວິຊາຊີບ ແລະ ວຽກງານແມ່ຍິງ ຂອງສະພາແຫ່ງຊາດແຫ່ງຣາຊະອານາຈັກກຳປູເຈຍ, ສູນລັດຖະສະພາອາຊີ (PCAsia) ແລະ ກອງເລຂາສະມັດຊາລັດຖະສະພາລະຫວ່າງຊາດອາຊຽນ (AIPA) ໂດຍມີສະມາຊິກສະພາແຫ່ງຊາດຈາກບັນດາລັດຖະສະພາສະມາຊິກ AIPA, ລັດຖະມົນຕີກະຊວງສາທາລະນະສຸກກໍາປູເຈຍ, ຫົວໜ້າຄະນະບໍລິຫານງານຊາວໜຸ່ມກໍາປູເຈຍ, ອໍານາດການປົກຄອງແຂວງຊຽມລຽບ ແລະ ຕາງໜ້າຈາກອົງການຈັດຕັ້ງສາກົນ ໃນບັນດາປະເທດອາຊຽນ ເຂົ້າຮ່ວມທັງໝົດ 47 ທ່ານ.
ກອງປະຊຸມຄັ້ງນີ້, ໄດ້ຮັບຟັງການນຳເໜີກ່ຽວກັບບົດບາດຂອງລັດຖະສະພາ ໃນການປະກອບສ່ວນ ແລະ ສົ່ງເສີມການຮັບມືກັບການແຜ່ລະບາດຂອງພະຍາດໂຄວິດ-19 ຈາກບັນດາສະມາຊິກລັດຖະສະພາທີ່ເຂົ້າຮ່ວມ ພ້ອມທັງຮັບຟັງການລາຍງານກ່ຽວກັບສະພາບການການຕອບໂຕ້ພະຍາດລະບາດໂຄວິດ-19 ຈາກຕາງໜ້າອົງການຈັດຕັ້ງສາກົນຂອງປະເທດຕ່າງໆໃນອາຊຽນ. ນອກນັ້ນ, ໃນກອງປະຊຸມຍັງໄດ້ມີການແລກປ່ຽນແນວທາງ ແລະ ວິທີການທີ່ດີໃນການແກ້ໄຂບັນຫາການແຜ່ລະບາດໄລຍະຜ່ານມາ ລວມໄປເຖິງການສົ່ງເສີມຄວາມໂປ່ງໃສ, ຄວາມຮັບຜິດຊອບ ແລະ ການປ້ອງກັນທາງດ້ານສຸຂະພາບຂອງປະຊາຊົນ ທັງໃນລະຫວ່າງການແຜ່ລະບາດ ແລະ ພາຍຫຼັງການແຜ່ລະບາດຂອງພະຍາດໂຄວິດ-19 ຢ່າງສ້າງສັນ ແລະ ຟົດຟື້ນ.
ໂອກາດດັ່ງກ່າວ, ທ່ານ ພອນສານ ວິໄລເມັ້ງ ຜູ້ແທນສະພາແຫ່ງຊາດລາວ ໄດ້ມີຄຳເຫັນຕໍ່ກອງປະຊຸມ ໂດຍໄດ້ຍົກໃຫ້ເຫັນເຖິງສະພາບການການແຜ່ລະບາດຂອງພະຍາດໂຄວິດ-19 ໃນ ສປປລາວ ແລະ ການຈັດຕັ້ງປະຕິບັດພາລະບົດບາດຂອງສະພາແຫ່ງຊາດລາວ ໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ເຊິ່ງສະພາແຫ່ງຊາດລາວ ໄດ້ໃຫ້ຄວາມສໍາຄັນໃນການຊຸກຍູ້ສົ່ງເສີມການຈັດຕັ້ງປະຕິບັດກົດໝາຍວ່າດ້ວຍການກັນ ແລະ ຄວບຄຸມພະຍາດລະບາດ, ກົດໝາຍວ່າດ້ວຍການໃຫ້ວັກຊີນກັນພະຍາດ ຢ່າງເຂັ້ມງວດ, ພ້ອມທັງຕິດຕາມກວດກາ ແລະ ປະສານສົມທົບກັບພາກສ່ວນທີ່ກ່ຽວຂ້ອງຂອງລັດຖະບານ ໃນການຈັດຕັ້ງປະຕິບັດວຽກງານດັ່ງກ່າວຢ່າງໃກ້ສິດ. ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ສະມາຊິກລັດຖະສະພາ AIPA, ອົງການຈັດຕັ້ງສາກົນ ແລະ ພາກສ່ວນຕ່າງໆ ສືບຕໍ່ຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ເພື່ອປ້ອງກັນ, ຄວບຄຸມ ແລະ ຕອບໂຕ້ການແຜ່ລະບາດຂອງພະຍາດໂຄວິດ-19 ແລະ ພະຍາດລະບາດອື່ນໆທີ່ອາດຈະເກີດຂຶ້ນໃນອະນາຄົດ ໃຫ້ໝົດໄປຢ່າງຖາວອນ.