(ສພຊ) ວັນທີ 14 ມິຖຸນາ 2021 ທີ່ຫ້ອງວ່າການປົກຄອງແຂວງສະຫວັນນະເຂດ, ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກກັບອໍານາດການປົກຄອງແຂວງສະຫວັນນະເຂດ; ໂດຍການຕ້ອນຮັບຂອງທ່ານ ສັນຕິພາບ ພົມວິຫານ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆສະຫວັນນະເຂດ, ພ້ອມດ້ວຍການນໍາຂັ້ນແຂວງ, ສະພາປະຊາຊົນແຂວງ (ສພຂ) ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.  ເຊິ່ງທ່ານປະທານສະພາແຫ່ງຊາດ ໄດ້ເຂົ້າຮ່ວມພິທີປູກຕົ້ນໄມ້ທີ່ຕໍ່ໜ້າຫ້ອງວ່າການປົກຄອງແຂວງສະຫວັນນະເຂດ.

ຈາກນັ້ນ, ຢູ່ທີ່ຫ້ອງະຊຸມຫ້ອງວ່າການປົກຄອງແຂວງສະຫວັນນະເຂດ, ທ່ານ ສັນຕິພາບ ພົມວິຫານ ໄດ້ຕາງໜ້າໃຫ້ຄະນະພັກແຂວງ ໄດ້ລາຍງານກ່ຽວກັບ ການເຜີຍແຜ່ຊື່ມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ; ເຊິ່ງທ່ານໄດ້ລາຍງານໃຫ້ຊາບວ່າ: ພາຍຫລັງທີ່ໄດ້ຮັບຄໍາສັ່ງເລກທີ 38/ຄລສພ ຂອງຄະນະເລຂາທິການສູນກາງພັກ ພ້ອມດ້ວຍບັນດາເອກະສານຕ່າງໆທີ່ຕິດພັນກັບມະຕິ XI ຂອງພັກແລ້ວ, ຄະນະປະຈໍາພັກແຂວງໄດ້ອອກມະຕິຕົກລົງແຕ່ງຕັ້ງຄະນະຮັບຜິດຊອບ ເພື່ອກະກຽມດ້ານເນື້ອໃນເຜີຍແຜ່ ຜັນຂະຫຍາຍມະຕິດັ່ງກ່າວ ໂດຍຕິດພັນກັບການດໍາເນີນກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 2 ສະໄໝທີ IX; ສໍາລັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2021 ແມ່ນໄດ້ດໍາເນີນ ໃນທ່າມກາງສະພາບຄວາມຫຍຸ້ງຍາກຫລາຍຢ່າງ ເປັນຕົ້ນຄວາມບອບບາງທາງດ້ານເສດຖະກິດ-ການເງິນ ຍ້ອນຖານການຜະລິດອ່ອນນ້ອຍ ບວກກັບຜົນກະທົບຈາກໄພທໍາມະຊາດ ແລະ ການລະບາດຂອງພະຍາດໂຄວິດ 19 ຮອບ II; ແຕ່ ພາຍໃຕ້ການຊີ້ນໍາ-ນໍາພາຂອງຄະນະພັກ-ອໍານາດການປົກຄອງແຕ່ລະຂັ້ນ, ໄດ້ພ້ອມກັນຕັ້ງໜ້າ ຈັດຕັ້ງປະຕິບັດວຽກງານຕ່າງໆຕາມແຜນການທີ່ວາງໄວ້ ສໍາເລັດຫລາຍຢ່າງຄື: ທົ່ວແຂວງສາມາດຮັບປະກັນສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ; ຄວາມທຸກຍາກຂອງປະຊາຊົນໄດ້ຮັບການແກ້ໄຂ, ຊີວິດການເປັນຢູ່ ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນເປັນກ້າວໆ; ໄດ້ຫັນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ປັບປຸງກົງຈັກການຈັດຕັ້ງບໍລິຫານລັດໄປຕາມທິດກະທັດຮັດ ຕາມມະຕິຄໍາສັ່ງ ຂອງຄະນະພັກຂັ້ນເທິງ; ດ້ານການເຕີບໂຕທາງດ້ານເສດຖະກີດ, ຜ່ານການຈັດຕັ້ງປະຕິບັດ 6 ​ເດືອນຕົ້ນປີ GDP ເຕີບໂຕສະເລ່ຍ 2,37%, ລວມມູນຄ່າ GDP ປະຕິບັດໄດ້ 8.626,3 ຕື້ກີບ ເທົ່າກັບ 38,5%; ສະເລ່ຍ GDP ຕໍ່ຫົວຄົນໄດ້ 862 ໂດລາສະຫະລັດ.

ໃນຕອນບ່າຍຂອງວັນດຽວກັນ ທີ່ສະພາປະຊາຊົນແຂວງສະຫວັນນະເຂດ, ທ່ານປະທານສະພາແຫ່ງຊາດ ພ້ອມດ້ວຍຄະນະ ໄດ້ເຮັດວຽກຮ່ວມກັບ ສພຂ ສະຫວັນນະເຂດ; ເຂົ້າຮ່ວມມີທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານ ສພຂ, ມີບັນດາສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ສະມາຊິກສະພາປະຊາຊົນແຂວງ (ສສຂ), ຄະນະເລຂາທິການ, ບັນດາກໍາມະການ,  ພ້ອມດ້ວຍພະນັກງານ ສພຂ ສະຫວັນນະເຂດ ເຂົ້າຮ່ວມຢ່າງພ້ອມພຽງ.

ທ່ານ ກິ່ງແກ້ວ ມີວໍລະຈັກ ໄດ້ລາຍງານກ່ຽວກັບຜົນສໍາເລັດຂອງກອງປະຊຸມຄັ້ງປະຖົມມະລືກ ຂອງ ສພຂ ແຂວງສະຫວັນນະເຂດ ຊຸດທີ II; ເຊິ່ງໄດ້ຮັບຮອງເອົາແຕ່ລະບັນຫາຕາມທີ່ກົດໝາຍໄດ້ວາງອອກ ເປັນຕົ້ນແມ່ນ: ການເລືອກຕັ້ງເອົາ ປະທານສະພາປະຊາຊົນແຂວງ ຊຸດທີ II, ເລືອກຕັ້ງເອົາ ຮອງປະທານສະພາປະຊາຊົນແຂວງ, ພ້ອມບັນດາກຳມະການຄະນະປະຈຳສະພາປະຊາຊົນແຂວງ, ຮັບຮອງໂຄງປະກອບກົງຈັກສະພາປະຊາຊົນແຂວງ ແລະ  ຮັບຮອງເອົາການແຕ່ງຕັ້ງປະທານຄະນະກຳມະການ, ເລຂາທິການ ແລະ ຮອງປະທານຄະນະກຳມະການ ຂອງສະພາປະຊາຊົນແຂວງ ຊຸດທີ II, ບັນດາທ່ານໃຄະນະປະຈໍາສະພາປະຊາຊົນແຂວງ, ຄະນະກໍາມະການ ແລະ ເລຂາທິການ ໃນຖານະເປັນຜູ້ປະຈໍາການນີ້ ມີທັງໝົດ 16 ທ່ານ, ຍິງ 3 ທ່ານ ໃນນີ້ ມີຜູ້ປະຈໍາການ 13 ທ່ານ ແລະ 3 ທ່ານ ທີ່ເປັນຮອງປະທານຄະນະກຳມະການ ແມ່ນຄວບຕໍາແໜ່ງ; ໄດ້ເລືອກຕັ້ງ ເຈົ້າແຂວງ, ເລືອກຕັ້ງຫົວໜ້າອົງການໄອຍະການປະຊາຊົນແຂວງ, ປະທານສານປະຊາຊົນແຂວງ ແລະ ຮັບຮອງເອົາການແຕ່ງຕັ້ງຮອງເຈົ້້າແຂວງ, ​ຮັບຮອງເອົາໂຄງປະກອບກົງຈັກຂອງອົງການປົກຄອງແຂວງ ເຊິ່ງມີ 15 ພະແນກການ, 2 ກອງບັນຊາການ ແລະ 2 ອົງການທຽບເທົ່າພະແນກຂັ້ນແຂວງ, ພ້ອມທັງໄດ້ຮັບຮອງເອົາການແຕ່ງຕັ້ງຫົວໜ້າພະແນກການ 18 ພະແນກ; ຍັງເຫຼືອແຕ່ບຸກຄະລາກອນທີ່ຈະເປັນຫົວໜ້າພະແນກສຶກສາທິການ ແລະ ກິລາແຂວງ ຍັງບໍ່ໄດ້ຮັບຮອງ ເຊິ່ງໃນກອງປະຊຸມ ໄດ້ສະເໜີໃຫ້ອົງການປົກຄອງແຂວງ ສືບຕໍ່ຄົ້ນຄວ້າ ແລະ ນຳສະເໜີໃຫ້ແກ່ ຄະນະປະຈຳສະພາປະຊາຊົນແຂວງ ຫຼື ກອງປະຊຸມສະໄໝສາມັນ ຄັ້ງຕໍ່ໄປ ເປັນຜູ້ພິຈາລະນາ.

ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ມີຄໍາເຫັນ ແລະ ໃຫ້ທິດຊີ້ນໍາ ເຊິ່ງທ່ານໄດ້ສະແດງຄວາມຊົມເຊີຍຕໍ່ຜົນສໍາເລັດການເລືອກຕັ້ງ ສສຊ ຊຸດທີ IX ແລະ ສສຂ ສະຫວັນນະເຂດ ຊຸດທີ ​II ແລະ ຜົນສໍາເລັດ ຂອງກອງປະຊຸມຄັ້ງປະຖົມມະລືກ ຂອງ ສພຂ ຊຸດທີ II;  ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ສັງລວມແລ້ວເຫັນໄດ້ວ່າ ຊີວິດການເປັນຢູ່ຂອງປະຊາຊົນ ຄ່ອຍໆໄດ້ຮັບການປັບປຸງດີຂຶ້ນເທື່ອລະກ້າວ; ທ່ານໄດ້ຊີ້ນໍາໃຫ້ເພີ່ມທະວີການປັບປຸງຄວາມເຂັ້ມແຂງຮອບດ້ານ ວຽກງານປ້ອງກັນຊາດ-ປ້ອງກັນຄວາມສະຫງົບ, ເອົາໃຈໃສ່ປົກປັກຮັກສາແຂດນໍ້າແດນດິນ, ຮັກສາຄວາມສະຫງົບ, ສະກັດກັ້ນການແຜ່ລະບາດຂອງຢາເສບຕິດ; ເອົາໃຈໃສ່ເພີ່ມມູນຄ່າການຜະລິດພາຍໃນ, ສົ່ງເສີມການຜະລິດພາຍໃນ ໃຫ້ຂະຫຍາຍຕົວ ແລະ ເຂັ້ມແຂງ, ປັບປຸງປົວແປງພື້ນຖານໂຄງລ່າງ; ເອົາໃຈໃສ່ການພັດທະນາຊັບພະຍາກອນມະນຸດ, ເພີ່ມທະວີການເຝິກອົບຮົມສີມືແຮງງານ ເພື່ອສ້າງໃຫ້ຊາວໜຸ່ມມີວຽກເຮັດງານທໍາ ມີລາຍຮັບທີ່ໝັ້ນຄົງ; ປັບປຸງການຈັດຕັ້ງ ສ້າງຄວາມສັດທາຕໍ່ປະຊາຊົນ; ໃຫ້ອົງການຈັ້ງຕັ້ງມະຫາຊົນເອົາໃຈໃສ່ ຊ່ວຍປຸກລະດົມປະຊາຊົນບັນດາເຜົ່າ ໃຫ້ສືບຕໍ່ປະກອບສ່ວນພັດທະນາເສດຖະກິດ; ເອົາໃຈໃສ່ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ເທື່ອທີ 9 (2021-2025) ໃຫ້ໄດ້ຮັບຜົນສໍາເລັດຕາມລະດັບຄາດໝາຍ, ໃຫ້ສືບຕໍ່ເອົາໃຈໃສ່ປະຕິບັດມາດຕະການປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ 19 ໂດຍປະສານ ສົບທົບກັບປະເທດເພື່ອນບ້ານເພື່ອບໍ່ໃຫ້ມີການລັກລອບຂ້າມຊາຍແດນຜິດກົດໝາຍ ແລະ ອື່ນໆ.

ທ່ານປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ສືບຕໍ່ຢ້ຽມຢາມ ແລະ ເຮັດວຽກຢູ່ພື້ນຖານການຜະລິດ ຂອງແຂວງສະຫວັນນະເຂດອີກຈໍານວນໜຶ່ງ ເຊັ່ນ: ວັນທີ 15 ມິຖຸນາ 2021 ໄດ້ຢ້ຽມຊົມການຜະລິດ ຂອງບໍລິສັດ ລ້ານຊ້າງມິໄນໂຣນ ເມືອງວິລະບູລີ, ເຂົ້າຮ່ວມພິທີອັນເຊີນຮູບຫລໍ່ປະທານ ໄກສອນ ພົມວິຫານ ຂຶ້ນປະດິດສະຖານຢູ່ອະນຸສອນສະຖານ ເມືອງວິລະບູລີ, ຢ້ຽມຊົມໂຄງການພັດທະນາຊົນນະບົດ ແລະ ແກ້ໄຂຄວາມທຸກຍາກ ໂຄງການຮ່ວມໃຈສາຍໄຍໂລມາຄໍາ ຈຸດສຸມຕັງອາໄລ ເມືອງນອງ; ວັນທີ 16 ມິຖຸນາ 2021 ຢ້ຽມຊົມການກໍ່ສ້າງໂຄງການຊົນບະກະເສດ ແລະ ພັດທະນາຊົນນະບົດຮອບດ້ານ ບ້ານລະຫະນໍ້າ ເມືອງສອງຄອນ, ຢ້ຽມຊົມຟາມລ້ຽງງົວ ບ້ານຫົວຫາດ, ບ້ານທ່າໂພ ເມືອງໄຊພູທອງ ແລະ ຢ້ຽມຊົມ ຜາສາດຫີນ ເມືອງໄຊພູທອງ.

ແຫຼ່ງຂ່າວທີ່ມາ: ສະພາແຫ່ງຊາດ