(ສພຊ) ວັນທີ 9 ສິງຫາ 2022 ທີ່ສະພາແຫ່ງຊາດ ນະຄອນຫຼວງວຽງຈັນ, ທ່ານ ນາງ ປິ່ງຄຳ ລາຊະສິມມາ ກຳມະການຄະນະປະຈຳ, ເລຂາທິການສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ດຣ. ນາງ ເພຍ ເຣເບລໂລ ບີຣໂຕ ຜູ້ຕາງໜ້າອົງການຢູນິເຊັບ ປະຈຳ ສປປລາວ ເພື່ອປຶກສາຫາລືກ່ຽວກັບການຮ່ວມມືລະຫວ່າງ ອົງການຢູນິເຊັບ ເເລະ ສະພາແຫ່ງຊາດ ເພື່ອສົ່ງເສີມສິດທິ ແລະ ສະຫວັດດີການຂອງເດັກນ້ອຍ ແລະ ແມ່ຍິງໃນ ສປປລາວ.

ໃນການເຂົ້າຢ້ຽມຂໍ່ານັບຄັ້ງນີ້, ທັງສອງຝ່າຍໄດ້ປຶກສາຫາລືກັນກ່ຽວກັບການສະໜັບສະໜູນ ເເລະ ປະ ກອບສ່ວນຂອງອົງການຢູນິເຊັບ ເຂົ້າໃນວຽກງານພັດທະນາສັງຄົມຕ່າງໆ ເຊິ່ງກວມເອົາການຕອບໂຕ້ກັບພະຍາດໂຄວິດ-19, ການສຶກສາ, ສາທາລະນະສຸກ ແລະ ໂພຊະນາການ, ພ້ອມນັ້ນ ໄດ້ປຶກສາຫາລືກ່ຽວກັບຜົນການຄົ້ນຄວ້າທີ່ໄດ້ຮັບຈາກການສະໜັບສະໜູນຂອງອົງການຢູນິເຊັບ ຈະສາມາດເສີມຂະຫຍາຍຄວາມສາມາດຂອງສະພາແຫ່ງຊາດ ໃນການຕິດຕາມ ແລະ ກວດກາການປະຕິບັດ ນິຕິບັນຍັດ ແລະ ນະໂຍບາຍຕ່າງໆ; ນອກນັ້ນ, ທັງສອງຝ່າຍຍັງໄດ້ປຶກສາຫາລືກັນກ່ຽວກັບໂຄງການໃຫ້ເງິນສົດອຸດໜູນແກ່ແມ່ຍິງຖືພາ ແລະ ເດັກກ່ອນໄວຮຽນ (Mother and Early Childhood Grant) ເຊິ່ງເປັນໂຄງການຊ່ວຍເຫຼືອເງິນສົດໂດຍບໍ່ມີເງື່ອນໄຂ ທີ່ແນໃສ່ການສົ່ງເສີມສຸຂະພາບທີ່ດີສຳລັບແມ່ຍິງ ແລະ ເດັກ ໃນບັນດາເມືອງທີ່ທຸກຍາກທີ່ສຸດໃນແຂວງສະຫວັນນະເຂດ ແລະ ອັດຕະປື. ພ້ອມດຽວກັນ, ກໍໄດ້ແລກປ່ຽນຂໍ້ມູນກ່ຽວກັບບັນດາງານຕ່າງໆທີ່ອົງການຢູນິເຊັບ ແລະ ສະພາແຫ່ງຊາດ ຈະໄດ້ດຳເນີນການຮ່ວມໃນປີ 2022 ເຊັ່ນ: ການເຝິກອົບຮົມໃຫ້ແກ່ສະມາຊິກສະພາແຫ່ງຊາດ ເເລະ ສະພາປະຊາຊົນແຂວງຈາກບັນດາແຂວງພາກເໜືອ ແລະ ພາກໃຕ້ ກ່ຽວກັບການປົກປ້ອງດ້ານສັງຄົມ ເເລະ ການວາງງົບປະມານທີ່ຕອບສະໜອງຕໍ່ຄວາມຕ້ອງການຂອງເດັກນ້ອຍ.

ທ່ານ ນາງ ປິ່ງຄຳ ລາຊະສິມມາ ໄດ້ສະແດງຄວາມຂອບໃຈຕໍ່ອົງການຢູນິເຊັບ ສຳລັບການສະໜັບສະໜູນຢ່າງຕໍ່ເນື່ອງເເກ່ບັນດາເດັກນ້ອຍ ແລະ ແມ່ຍິງ ໃນ ສປປລາວ ເເລະ ສະພາແຫ່ງຊາດ ແຫ່ງ ສປປລາວ ຫວັງວ່າຈະສາມາດສືບຕໍ່ຜັນຂະຫຍາຍການຮ່ວມມືກັບ ອົງການຢູນິເຊັບ ໃນອາະນາຄົດໄດ້.

ທ່ານ ດຣ. ນາງ ເພຍເຣເບລໂລ ບີຣໂຕ ໄດ້ກ່າວວ່າ: ອົງການຢູນິເຊັບ ພ້ອມທີ່ຈະສືບຕໍ່ໃຫ້ການສະໜັບສະໜູນເເກ່ລັດຖະບານ ເເຫ່ງ ສປປລາວ ໃນການບັນລຸເປົ້າໝາຍທີ່ໄດ້ກຳນົດໄວ້ໃນແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ເເລະ ເປົ້າໝາຍການພັດທະນາແບບຍືນຍົງ ແລະ ຫວັງເປັນຢ່າງຍິ່ງວ່າ ຈະສາມາດສືບຕໍ່ເຮັດວຽກຢ່າງໃກ້ຊິດກັບລັດຖະບານ ແຫ່ງ ສປປລາວ ພາຍໃຕ້ແຜນງານການຮ່ວມມື ລະຫວ່າງ ລັດຖະບານ ແຫ່ງ ສປປລາວ ແລະ ອົງການຢູນິເຊັບ ສົກປີ 2022-2026.

(ພາບ ແລະ ຂ່າວ: ສົມນຶກ ແກ້ວໄຊຍະຈັກ)