ຕອນເຊົ້າວັນທີ 03 ສິງຫາ 2022 ນີ້, ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ການຈັດຕັ້ງປະຕິບັດວຽກງານຂອງສະພາປະຊາຊົນແຂວງ ເຊກອງ ໂດຍການຕ້ອນຮັບຢ່າງອົບອຸ່ນຂອງທ່ານ ດົງເພັດ ພະຍົນ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16, ປະທານສະພາປະຊາຊົນແຂວງ ເຊກອງ, ມີບັນດາທ່ານ ຄະນະພັກ-ຄະນະນໍາສະພາປະຊາຊົນແຂວງ, ຄະນະ ສສຊ-ສສຂ, ຄະນະກໍາມະການ, ຂະແໜງການ ແລະ ພະນັກງານ-ລັດຖະກອນ ສພຂ ເຂົ້າຮ່ວມ. ໂອກາດດັ່ງກ່າວ, ທ່ານ ນາງ ຄໍາເສັງ ທຸມມະວົງສາ ຮອງປະທານ ສພຂ ໄດ້ລາຍງານໂດຍຫຍໍ້ກ່ຽວກັບສະພາບການຈັດຕັ້ງປະຕິບັດວຽກງານຂອງຄະນະ ສສຊ ປະຈໍາເຂດເລືອກຕັ້ງ ແລະ ສະພາປະຊາຊົນແຂວງ ໃນໄລຍະຜ່ານມາ ເຊິ່ງທ່ານໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະໄດ້ພ້ອມກັນສືບຕໍ່ປັບປຸງແກ້ໄຂ. ໂດຍໄລຍະຜ່ານມາແມ່ນໄດ້ເອົາໃຈໃສ່ໃນການປະຕິບັດ 3 ພາລະບົດບາດຂອງຕົນ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ຢ່າງແຂງແຮງ ພ້ອມທັງຍົກສູງຄວາມຮັບຜິດຊອບປະສານສົມທົບກັບອົງການປົກຄອງທ້ອງຖິ່ນ ແລະ ບັນດາຂະແໜງການທີ່ກ່ຽວຂ້ອງໃນການຄົ້ນຄວ້າ ແລະ ແກ້ໄຂບັນຫາສໍາຄັນຕ່າງໆໄດ້ຢ່າງທ່ວງທັນ.
ພາຍຫຼັງຮັບຟັງການລາຍງານຈາກທ່ານ ຮອງປະທານ ສພຂ ແລ້ວ ນະໂອກາດດັ່ງກ່າວ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ກໍໄດ້ໃຫ້ກຽດໂອ້ລົມ ໂດຍທ່ານໄດ້ເນັ້ນຫຼາຍບັນຫາທີ່ສຳຄັນ ຕໍ່ບັນດາສະມາຊິກສະພາແຫ່ງຊາດ ປະຈໍາເຂດເລືອກ ຕັ້ງທີ 16 ກໍຄືສະມາຊິກສະພາປະຊາຊົນຂັ້ນແຂວງ ແລະ ພະນັກງານຫຼັກແຫຼ່ງຂອງສະພາປະຊາຊົນແຂວງ ໃຫ້ສືບຕໍ່ເອົາໃຈໃສ່ຢ່າງຕັ້ງໜ້າ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຢ່າງແຂງແຮງ, ມີຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ໃນການຄົ້ນຄວ້າ ແລະ ພິຈາລະນາບັນຫາສຳຄັນຂອງທ້ອງຖິ່ນ, ນໍາເອົາເນື້ອໃນຕ່າງໆ ທີ່ກອງປະຊຸມໄດ້ຮັບຮອງເອົາ ແລະ ນໍາໄປເຜີຍແຜ່, ເຊື່ອມຊຶມ ໃຫ້ພໍ່ແມ່ປະຊາຊົນໄດ້ຮັບຮູ້ເຂົ້າໃຈ ຢ່າງເລິກເຊິ່ງ ແລະ ກ້ວາງຂວາງ.
ໃນຕອນບ່າຍຂອງວັນດຽວກັນ ຄະນະນໍາ ສພຂ ຍັງໄດ້ນໍາພາທ່ານ ຮອງປະທານສະພາແຫ່ງຊາດ ພ້ອມຄະນະເດີນທາງໄປທ່ຽວຊົມທໍາມະຊາດແຫຼ່ງທ່ອງທ່ຽວສີຂຽວ ນໍ້າຕົກຕາດແຝກ ” ນ້ຳຕົກຕາດແຝກ ” ຕັ້ງຢູ່ບໍລິເວນເຂດບ້ານດ່ານ, ເມືອງລະມາມ ແຂວງ ເຊກອງ ເຊິ່ງຫ່າງຈາກເທດສະບານແຂວງ ໄປທາງທິດໃຕ້ 18 km ແລະ ຫ່າງຈາກເສັ້ນທາງເລກທີ 16 B ໄປຫາຕາດ 2 km, ສູງປະມານ 10-15 m ແລະ ກວ້າງ 250 m, ມີຄວາມສວຍສົດງົດງາມ ແລະ ອຸດົມສົມບູນໄປດ້ວຍປ່າໄມ້ສີຂຽວ, ມີອາກາດປອດໂປ່ງແຈ່ມໄສ ແລະ ມີນ້ຳໄຫຼຕະຫຼອດລະດູການ ເຊິ່ງສາມາດໄປພັກຜ່ອນຢ່ອນໃຈ ແລະ ຜ່ອນຄາຍຄວາມອິດເມື່ອຍຈາກການເຮັດວຽກ.#ໂດຍ: ນາລີວັນ.