ຂປລ. ກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ທີ່ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 22 ມີນາ 2021 ບັນດາຜູ້ແທນກອງປະຊຸມ ໄດ້ພິຈາລະນາ ແລະ ລົງຄະແນນສຽງເລືອກຕັ້ງເອົາ ທ່ານ ໄຊສົມພອນ ພົມວິຫານ ເປັນປະທານສະພາແຫ່ງຊາດ ຊຸດທີ IX ແລະ ເລືອກຕັ້ງເອົາຮອງ ປະທານສະພາແຫ່ງຊາດ ຈຳນວນ 5 ທ່ານ ປະກອບມີ ທ່ານ ນາງ ສູນທອນ ໄຊຍະຈັກ, ທ່ານ ຈະເລີນ ເຢຍປາວເຮີ, ທ່ານ ສົມມາດ ພົນເສນາ, ທ່ານ ຄຳໃບ ດຳລັດ ແລະ ທ່ານ ພົນໂທ ສຸວອນ ເລືອງບຸນມີ. ພ້ອມນີ້, ຍັງໄດ້ເລືອກຕັ້ງກຳມະການ ຄະນະປະຈຳ ສະພາແຫ່ງຊາດ, ເລືອກຕັ້ງເອົາປະທານ, ເລຂາທິການ ແລະ ຮອງປະທານກຳມາທິການ ຂອງສະພາແຫ່ງຊາດ ຊຸດທີ IX.

ທ່ານ ໄຊສົມພອນ ພົມວິຫານ ໄດ້ກ່າວໃນໂອກາດຮັບໜ້າທີ່ຄັ້ງນີ້ວ່າ: ຂ້າພະເຈົ້າ, ຂໍສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງ ມາຍັງບັນດາ ທ່ານສະມາຊິກ ສະພາແຫ່ງຊາດ ທີ່ໄດ້ໃຫ້ຄວາມເຊື່ອໝັ້ນ, ຄວາມໄວ້ວາງໃຈເລືອກຕັ້ງໃຫ້ຂ້າພະເຈົ້າ ເປັນປະທານສະພາແຫ່ງຊາດ ຊຸດທີ IX. ດັ່ງທີ່ພວກເຮົາຮັບຮູ້ນໍາກັນແລ້ວວ່າ ສະພາແຫ່ງຊາດ ເປັນອົງການຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວ ບັນດາເຜົ່າ, ເປັນອົງການສູງສຸດ ແຫ່ງອຳນາດລັດ. ສະນັ້ນ, ການເຄື່ອນໄຫວ ວຽກງານຂອງສະພາແຫ່ງຊາດ ແມ່ນການເຄື່ອນໄຫວ ຂອງອົງການຕົວແທນ ຂອງປະຊາຊົນ, ເປັນການເຄື່ອນໄຫວ ຂອງອົງການ ສູງສຸດແຫ່ງລັດ, ການທີ່ຂ້າພະເຈົ້າ ໄດ້ຮັບເລືອກຕັ້ງເປັນ ປະທານສະພາແຫ່ງຊາດ ຊຸດທີ IX ໃນຄັ້ງນີ້, ຈຶ່ງເປັນການມອບໝາຍ ພາລະໜ້າທີ່ອັນໃຫຍ່ຫລວງ, ໜັກໜ່ວງ ແລະ ມີກຽດ ທີ່ພັກ-ລັດ ແລະ ປະຊາຊົນມອບໝາຍໃຫ້. ເພື່ອເຮັດຫລ້ອນ ໜ້າທີ່ດັ່ງກ່າວ, ຂ້າພະເຈົ້າ ຂໍໃຫ້ຄໍາໝັ້ນສັນຍາວ່າ: ຈະຊື່ສັດບໍລິສຸດ ຕໍ່ຜົນປະໂຫຍດຂອງຊາດ ແລະ ປະຊາຊົນ, ຈະສຸມສະຕິປັນຍາ, ເຫື່ອແຮງ, ຄວາມຮູ້, ຄວາມສາມາດທີ່ມີ ຮ່ວມກັບໝູ່ຄະນະ ກໍຄື ສະມາຊິກສະພາແຫ່ງຊາດ ຈັດຕັ້ງຜັນຂະຫຍາຍແນວທາງ ນະໂຍບາຍຂອງພັກ ໂດຍສະເພາະ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມສະພາແຫ່ງຊາດ ເຂົ້າໃນການປະຕິບັດສິດ ແລະ ໜ້າທີ່ ຂອງສະພາ ແຫ່ງຊາດ ຊຸດທີ IX ຕາມທີ່ກໍານົດ ໃນລັດຖະທໍາມະນູນ ແລະ ກົດໝາຍ ໃຫ້ມີໝາກຜົນຕົວຈິງ; ຍົກສູງບົດບາດການເຄື່ອນໄຫວ ວຽກງານຂອງບັນດາ ກົງຈັກ ເສນາທິການ ໃຫ້ມີຄວາມໜັກແໜ້ນເຂັ້ມແຂງ, ປັບປຸງການເຄື່ອນໄຫວວຽກງານ ຂອງຄະນະສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງ ໃຫ້ກົມກຽວກັບການ ເຄື່ອນໄຫວວຽກງານ ຂອງສະພາປະຊາຊົນແຂວງ, ນະຄອນຫລວງ ເພື່ອຮັບປະກັນການ ຈັດຕັ້ງປະຕິບັດກົດໝາຍ, ມະຕິກອງປະຊຸມ ສະພາແຫ່ງຊາດ ຢູ່ທ້ອງຖິ່ນ ໃຫ້ໄດ້ຮັບຜົນດີຂຶ້ນ; ຈະເພີ່ມທະວີຄວາມ ເອົາໃຈໃສ່ໃນການ ຈັດຕັ້ງປະຕິບັດ ພາລະບົດບາດ ດ້ານນິຕິບັນຍັດ, ການຕິດຕາມກວດກາ, ການຕົກລົງບັນຫາສໍາຄັນພື້ນ ຖານຂອງປະເທດຊາດ ສອດຄ່ອງ ກັບແນວທາງ ນະໂຍບາຍຂອງພັກ, ລັດຖະທໍາມະນູນ, ກົດໝາຍ ແລະ ຕອບສະໜອງຄວາມ ມຸ່ງມາດປາຖະໜາ ຂອງປະຊາຊົນລາວບັນດາເຜົ່າ. ທັງນັ້ນ, ກໍເພື່ອເພື່ອແນໃສ່ ສ້າງລັດ ປະຊາທິປະໄຕປະຊາຊົນ ໃຫ້ກາຍເປັນລັດ ທີ່ປົກຄອງດ້ວຍກົດໝາຍ ທີ່ມາຈາກປະຊາຊົນ ໂດຍປະຊາຊົນ ແລະ ເພື່ອປະຊາຊົນ ແລະ ປະກອບ ສ່ວນສ້າງ ປະເທດຊາດໃຫ້ມັ່ງຄັ່ງ, ເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສາມັກຄີ ເປັນປຶກແຜ່ນ, ມີປະຊາທິປະໄຕ, ຍຸຕິທຳ ແລະ ສີວິໄລ.

ໃນໂອກາດທີ່ສໍາຄັນນີ້, ທ່ານໄດ້ຮຽກຮ້ອງມາຍັງ ບັນດາທ່ານສະມາຊິກ ສະພາແຫ່ງຊາດ, ບັນດາອົງການ ຈັດຕັ້ງພັກ-ລັດທຸກຂັ້ນ ກໍຄື ປະຊາຊົນລາວບັນດາເຜົ່າ ຈົ່ງໃຫ້ການຮ່ວມມື, ໃຫ້ການສະໜັບສະໜູນ ແລະ ຊ່ວຍເຫລືອສະພາແຫ່ງຊາດ ເພື່ອເຮັດຫລ້ອນໜ້າທີ່ ອັນມີກຽດສະຫງ່າ ທີ່ພັກ ແລະ ປະຊາ ຊົນມອບໝາຍໃຫ້.

ແຫຼ່ງຂ່າວທີ່ມາ: ຂ່າວສານປະເທດລາວ