ວັນທີ 21 ກໍລະກົດ 2022 ນີ້ ທາ່ນ ຄໍາຟອງ ອິນມານີ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ ຜູ້ຊີ້ນໍາຂົງເຂດຕຸລາການ ໄດ້ລົງຕິດຕາມຊູກຍູ້ວຽກງານຂອງສານປະຊາຊົນແຂວງຫລວງນໍ້າທາ ໂດຍມີທ່ານ ທອງແດງ ສິດທິສົນ ປະທານສານປະຊາຊົນແຂວງ ພ້ອມດ້ວຍຄະນະ, ພະນັກງານພາຍໃນສານປະຊາຊົນແຂວງ ເຂົ້າຮ່ວມຢ່າງພ້ອມພຽງ

.

ໃນນີ້ ໄດ້ຮັບຟັງການລາຍງານສະພາບການເຄື່ອນໄຫວວຽກງານຂອງສານປະຊາຊົນແຂວງ ໃນໄລຍະຜ່ານມາໂດຍຫຍໍ້ດັ່ງນີ້: ຄະນະນຳສານປະຊາຊົນແຂວງຖຶເອົາການສຶກສາອົບຮົມການເມືອງ-ແນວຄິດ, ໃຫ້ພະນັກງານມີຄວາມອຸ່ນອ່ຽງທຸນທ່ຽງ, ເຊື່ອໝັ້ນຕໍ່ການນຳພາ ຢ່າງໜັກແໜ້ນ ມີຄວາມຮັບຜິດຊອບສູງ ປະຕິບັດໜ້າທີ່ມີຜົນສຳເລັດເປັນກ້າວໆ,

ໃນ 6 ເດືອນ ຕົ້ນປີ 2022 ໄດ້ຮັບຄະດີທັງໝົດ 440 ເລື່ອງ, ແກ້ໄຂແລ້ວ 367 ເລື່ອງ ພວມສືບຕໍ່ແກ້ໄຂ 69 ເລື່ອງ, ແຜນການໃນຕໍ່ໜ້ານີ້ ຈະສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນ ເປັນປົກກະຕິ, ກໍ່ສ້າງພັກ-ພະນັກງານໃຫ້ມີຄວາມປອດໃສເຂັ້ມແຂງໜັກແໜ້ນ, ຍົກລະດັບຄວາມຮູ້, ຄວາມສາມາດທາງດ້ານວິຊາການ, ປະຕິບັດການບໍລິຫານສານ, ການບໍລິຫານຄະດີ ໃຫ້ມີປະສິດທິພາບສູງ, ມີຄວາມວ່ອງໄວ, ຮັບປະກັນຄວາມຍຸຕິທຳ, ຖຶກຕ້ອງຕາມກົດໝາຍ, ກະກຽມສະເຫລີມສະຫລອງວັນສ້າງຕັ້ງສານປະຊາຊົນຄົບຮອບ 40 ປີ ໃຫ້ມີເນື້ອໃນ ແລະ ຂະບວນການຟົດຟື້ນ ພ້ອມດຽວກັນ ໄດ້ມີການແລກປ່ຽນຄຳຄິດເຫັນ ເພື່ອຕີລາຄາຄືນຜົນງານຂອງສານປະຊາຊົນໃນ 6 ເດືອນຕົ້ນປີ 2022 ແລະ 6 ເດືອນທ້າຍປີ 2022.

ໃນໂອກາດນີ້ ຍັງໄດ້ຈັດພິທີມອບໃບຂອບໃຈຂອງປະທານສານປະຊາຊົນແຂວງ ໃຫ້ເເກ່ບໍລິສັດອິນເຕີລາວກົງ ຈຳກັດ, ບໍລິສັດພັດທະນາສາມລ່ຽມເສດຖະກິດຄົບວົງຈອນ ແລະ ທ່ານທີ່ໄດ້ປະກອບສ່ວນຊື້ອຸປະກອນຮັບໃຊ້ໃຫ້ແກ່ວຽກງານສານປະຊາຊົນແຂວງຫລວງນ້ຳທາທີ່ມີມູນຄ່າແຕ່ 5 ລ້ານກີບຂຶ້ນໄປ ເພື່ອຈາລຶກບຸນຄຸນໄວ້ໃນປື້ມບັນທຶກຂອງສານປະຊາຊົນແຂວງຫລວງນ້ຳທາ;

ຕອນທ້າຍພິທີ ທ່ານ ຄຳຟອງ ອິນມານີ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ຜູ້ຊີ້ນຳຂົງເຂດວຽກງານຕຸລາການ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຊົມເຊີຍຕໍ່ຜົນສຳເລັດໃນໄລຍະຜ່ານມາ, ເປັນເອກະພາບໃນທິດທາງແຜນການໃນຕໍ່ໜ້າ ທັງໄດ້ເໜັ້ນໜັກໃຫ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ມີຄວາມໜັກແໜ້ນດ້ານວິຊາສະເພາະ, ວິຊາການໃຫ້ລະອຽດພາວະວິໄສ, ຖຶກຕ້ອງຕາມກົດໝາຍ, ພະນັກງານຫລັກແຫລ່ງໃຫ້ມີຄວາມເປັນແບບຢ່າງນໍາໜ້າ, ປອດໃສ ມີຄວາມເປັນເອກະພາບໃນໝູ່ຄະນະໃນການຈັດຕັ້ງປະຕິບັດວຽກງານ, ການພົວພັນປະສານງານໃຫ້ດີ, ການບໍລິຫານວຽກງານຕ່າງໆ ລວມເຖິງການນຳໃຊ້ງົບປະມານ ຫັນເປັນການປະຫຍັດມັດທະຍັດ, ຖຶກຕ້ອງຕາມວາລະແຫ່ງຊາດ.

ພາບ ແລະ ຂ່າວ ນາງ ອາເມີງ ວີແຄລູ