ໃນວັນທີ 15 ກໍລະກົດ 2022.ທີ່ຫ້ອງປະຊຸມໃຫ່ຍ (ສພຂ) ອັດຕະປື ໄດ້ຈັດກອງປະຊຸມທາບທາມບຸກຄະລາກອນປະກອບເຂົ້າຄະນະໜ່ວຍພັກພາຍໃນ ສພຂ, ໂດຍພາຍໃຕ້ການເປັນປະທານຂອງ ສະຫາຍ ນາງ ພອນມະນີ ຂຽນໄຊຍະວົງ ກໍາມະການພັກແຂວງ, ຮອງປະທານ ສພຂ, ເຂົ້້້າຮ່ວມມີ ສະຫາຍ ຈິດປະສົງ ສີງສະຫວັດ ກໍາມະການພັກແຂວງ, ຮອງປະທານກວດກາພັກ-ລັດແຂວງ, ມີຕາງໜ້າຄະນະຈັດຕັ້ງແຂວງ, ສະມາຊິກພັກສົມບູນ ແລະ ສໍາຮອງ ພາຍໃນ ສພຂ ເຂົ້າຮ່ວມ.

ຄະນະຈັດຕັ້ງກອງປະຊຸມໄດ້ຂື້ນກ່າວຈຸດປະສົງວ່າ: ອີງຕາມ ກົດລະບຽບພັກປະຊາຊົນ ປະຕິວັດລາວ ສະໄໝທີ XI ໝວດທີ VI ມາດຕາ 30 ທີ່ຕັ້ງ ແລະ ຫລັກການຈັດຕັ້ງຮາກຖານພັກ ທີ່ໄດ້ລະບຸໄວ້ໃນຂໍ້ທີ 4 ວ່າດ້ວຍການຈັດຕັ້ງຮາກຖານພັກໃດ ມີຈໍານວນສະມາຊິກພັກສົມບູນ 30 ສະຫາຍຂຶ້ນໄປ ຖ້າຈໍາເປັນໃຫ້ສ້າງຕັ້ງເປັນຄະນະພັກຮາກຖານໜຶ່ງ ແລະ ແບ່ງເປັນຫລາຍໜ່ວຍພັກຂຶ້ນກັບ, ຖ້າບໍ່ຈໍາເປັນໃຫ້ຮັກສາເປັນຮາກຖານພັກໄວ້ຄືເກົ່າ ແຕ່ໃຫ້ແບ່ງເປັນຫລາຍຈຸພັກຂຶ້ນກັບ, ການແຕ່ງຕັ້ງຈຸພັກ ແມ່ນເລຂາຮາກຖານພັກນັ້ນເປັນຜູ້ແຕ່ງຕັ້ງ, ສະນັ້ນ ໜ່ວຍພັກ ສພຂ ເຫັນວ່າມີຄວາມຈໍາເປັນ ຈຶ່ງໄດ້ສະເໜີ ຕາມຂັ້ນຕອນ ເພື່ອຂໍອະນຸມັດມະຕິຕົກລົງເຫັນດີໃຫ້ສ້າງຕັ້ງເປັນຫລາຍໜ່ວຍພັກຂຶ້ນ ຕາມລະບຽບພັກວາງອອກ.

ດ້ວຍເຫດຜົນດັ່ງກ່າວ ກອງປະຊຸມຄັ້ງນີ້ ໄດ້ຜ່ານມາດຖານ, ເງື່ອນໄຂ ຂອງຄະນະໜ່ວຍພັກ ແລະ ຜ່ານມະຕິຕົກລົງ ວ່າດ້ວຍການອະນຸມັດລາຍຊື່ບຸກຄະລາກອນອອກທາບທາມ ຄະນະໜ່ວຍພັກ ຢູ່ ສພຂ, ເຊີ່ງໃນນັ້ນປະກອບມີ 4 ໜ່ວຍພັກຄື: ໜ່ວຍພັກຄະນະເລຂາທິການ, ໜ່ວຍພັກຄະນະກໍາມະການເສດຖະກິດ,ແຜນການ ແລະ ການເງີນ, ໜ່ວຍພັກຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ,​ ຈາກນັ້ນ, ສະມາຊິກພັກສົມບູນ​ ໄດ້ປ່ອຍບັດທາບທາມບຸກຄະລາກອນປະກອບເຂົ້າໃສ່ 4​ ໜ່ວຍພັກ.​

(ພາບ-ຂ່າວ: ວິນັດ ສພຂ)