(ສພຊ) ວັນທີ 23 ພະຈິກ 2020 ທີ່ຫ້ອງປະຊຸມຫ້ອງວ່າການສູນກາງພັກ (ຫລັກ 6) ນະຄອນຫລວງວຽງຈັນ ໄດ້ມີກອງປະຊຸມທາງໄກ (Video Conference) ລະຫວ່າງສະຫາຍ ນາງ ປານີ ຢ່າທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ແລະ ສະຫາຍ ຫລີ ຈ້ານຊູ ກຳມະການຄະນະປະຈຳກົມການເມືອງສູນກາງພັກກອມມູນິດຈີນ, ປະທານສະພາຜູ້ແທນປະຊາຊົນທົ່ວປະເທດຈີນ ໂດຍຜ່ານສະຖານເອກອັກຄະລັດຖະທູດຈີນ ປະຈໍາ ສປປລາວ ເພື່ອເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອອັນດີງາມ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ບົນພື້ນຖານການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານຕາມທິດ 4 ດີ ແລະ ການຈັດຕັ້ງຜັນຂະຫຍາຍເນື້ອໃນຈິດໃຈແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາລາວ-ຈີນ ເຂົ້າສູ່ພາກປະຕິບັດຕົວຈິງ ໂດຍສະເພາະເພື່ອເປັນການສືບຕໍ່ເພີ່ມທະວີການຮ່ວມມື ລະຫວ່າງສອງອົງການນິຕິບັນຍັດ ໃຫ້ມີປະສິດທິຜົນ ແລະ ເປັນຮູບປະທໍາຍິ່ງໆຂຶ້ນ; ຕີລາຄາຄືນການຮ່ວມມືສອງຝ່າຍ ລະຫວ່າງສອງອົງການນິບັນຍັດ ແລະ ປຶກສາຫາລືກັນທິດທາງໃນຕໍ່ໜ້າໃນຊ່ວງໄລຍະການແຜ່ລະບາດຂອງພະຍາດໂຄວິດ-19 ແລະ ເພື່ອສົນທະນາແລກປ່ຽນທັດສະນະນໍາກັນກ່ຽວກັບທິດສະດີ ແລະ ພຶດຕິກໍາຂອງສອງພັກກໍາອໍານາດ. ຝ່າຍຈີນແຈ້ງສະພາບການເນື້ອໃນສໍາຄັນຂອງກອງປະຊຸມຄົບຄະນະ ຄັ້ງທີ 5 ຂອງພັກກອມມູນິດຈີນ ສະໄໝທີ XIX (ຂໍ້ສະເໜີຂອງສູນກາງພັກວ່າດ້ວຍການສ້າງແຜນ 5 ປີ ຄັ້ງທີ 14 ແລະ ວິໄສທັດແຕ່ນີ້ຮອດປີ 2035) ແລະ ຝ່າຍລາວສະເໜີຜົນສໍາເລັດຂອງກອງປະຊຸມຄົບຄະນະບໍລິຫານງານສູນກາງພັກປະຊາຊົນ ປະຕິວັດລາວ ຄັ້ງທີ 10 ຂອງສະໄໝທີ X.
ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ກ່າວສະແດງຄວາມປິຕິຍິນດີ ແລະ ຮູ້ສຶກເປັນກຽດຢ່າງສູງ ທີ່ໄດ້ພົບປະກັບສະຫາຍ ລີ້ ຈ້ານຊູ ຜ່ານລະບົບວີດີໂອແບບທາງໄກ ເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການເສີມຂະຫຍາຍການພົວພັນ ແລະ ການຮ່ວມມື ລະຫວ່າງສອງພັກ, ລັດ ແລະ ສອງອົງການນິຕິຍັນຍັດຂອງສອງປະເທດ ໃນສະພາບການທີ່ພວມມີການແຜ່ລະບາດຢ່າງຮ້າຍແຮງ ຂອງພະຍາດໂຄວິດ-19 ໃນພາກພື້ນ ແລະ ໃນໂລກ; ພ້ອມນັ້ນ, ຍັງໄດ້ນຳເອົາຄວາມຢື້ຢາມຖາມຂ່າວ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປລາວ ໄປຍັງສະຫາຍ ສີ ຈິ້ນຜິງ, ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ ແຫ່ງ ສປຈີນ ແລະ ຕີລາຄາຄືນກ່ຽວກັບການຮ່ວມມືລະຫວ່າງສອງອົງການນິຕິບັນຍັດ ແລະ ປຶກສາຫາລືທິດທາງໃນການພົວພັນຮ່ວມມືຂອງສອງສະພາແຫ່ງຊາດ ໃນໄລຍະການແຜ່ລະບາດຂອງພະຍາດໂຄວິດ-19 ພ້ອມທັງແຈ້ງສະພາບການພັດທະນາເສດຖະກິດ-ສັງຄົມ ຂອງ ສປປລາວ ໂດຍຫຍໍ້ໃນເງື່ອນໄຂການເຝົ້າລະວັງ, ສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໄປຄວບຄູ່ກັບການຟື້ນຟູເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນ ໃນສະພາບການດໍາລົງຊີວິດແບບໃໝ່ໃນປີ 2020 ແລະ ຜົນສໍາເລັດຂອງກອງປະຊຸມຄົບຄະນະບໍລິຫານງານສູນກາງພັກປະຊາຊົນປະຕິວັດລາວ ຄັ້ງທີ 10 ສະໄໝທີ X ແລະ ກອງປະຊຸມສະໄໝສາມັນເທືອທີ 10 ຂອງ ສພຊ ຊຸດທີ VIII ທີ່ດໍາເນີນໃນລະຫວ່າງວັນທີ 27 ຕຸລາຫາ 17 ພະຈິກ 2020 ໃຫ້ຊາບ. ພ້ອມດຽວກັນນັ້ນ, ຍັງໄດ້ສະເໜີໃຫ້ຝ່າຍຈີນສືບຕໍ່ກົນໄກການແລກປ່ຽນຢ້ຽມຢາມ ແລະ ໄປມາຫາສູ່ກັນ ລະຫວ່າງຄະນະຜູ້ແທນຂັ້ນສູງຂອງ 2 ສະພາແຫ່ງຊາດ, ສອງອົງການນິຕິບັນຍັດນໍາກັນຢ່າງເປັນປົກກະຕິ; ສືບຕໍ່ຮັກສາການແລກປ່ຽນຄະນະຜູ້ແທນຂອງສະພາຂັ້ນສູນກາງ, ຂັ້ນທ້ອງຖິ່ນ ແລະ ບັນດາແຂວງ ທີ່ມີຊາຍແດນຕິດຈອດກັນ ດ້ວຍການຈັດສຳມະນາ ແລະ ແລກປ່ຽນບົດຮຽນທີ່ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງລາວ, ໂດຍສະເໜີລົງເລິກປິ່ນອ້ອມຫົວຂໍ້: ການຄຸ້ມຄອງ ແລະ ນຳໃຊ້ຊັບພະຍາກອນທີ່ດິນ, ການກໍານົດນິຕິກໍາດ້ານອະສັງຫາລິມະຊັບ, ນະໂຍບາຍສະຫວັດດີການສັງຄົມໃນດ້ານການສ້າງທີ່ຢູ່ອາໄສ, ການຄຸ້ມຄອງ ແລະ ສ້າງກົດໝາຍອາກອນ ທີ່ກ່ຽວຂ້ອງກັບການນໍາໃຊ້ຊັບພະຍາກອນທຳມະຊາດ, ການສ້າງຖານການຜະລິດເພື່ອເປັນລາຍຮັບໃໝ່, ການຕິດຕາມກວດກາຊຸກຍູ້ບັນດາໂຄງການພັດທະນາຂະໜາດໃຫຍ່, ການແກ້ໄຂຄໍາສະເໜີຂອງປະຊາຊົນຕໍ່ການບໍລິຫານລັດ, ວຽກງານການກວດສອບ-ກວດກາລັດ, ການອອກນິຕິກໍາຂອງທ້ອງຖິ່ນ, ການແກ້ໄຂຄວາມທຸກຍາກ ແລະ ຫົວຂໍ້ອື່ນໆ ທີ່ຝ່າຍຈີນມີບົດຮຽນອັນອຸດົມສົມບູນມາແລ້ວ ແລະ ໃນສະພາບການແຜ່ລະບາດຂອງພະຍາດໂຄວິດ-19 ສະເໜີໃຫ້ສອງຝ່າຍສືບຕໍ່ນໍາໃຊ້ຮູບແບບການຈັດກອງປະຊຸມສຳມະນາ, ກອງປະຊຸມແລກປ່ຽນບົດຮຽນນໍາກັນ ໂດຍຜ່ານລະບົບວິດີໂອທາງໄກ ລະຫວ່າງຄະນະກຳມາທິການຕ່າງໆ, ເລຂາທິການສະພາ ກໍຄືບັນດາເປົ້າ ໝາຍສະມາຊິກສະພາແຫ່ງຊາດຊຸດທີ IX, ສະມາຊິກສະພາປະຊາຊົນແຂວງ ຊຸດທີ II (ຊຸດໃໝ່) ແລະ ວິຊາການທີ່ເປັນເສນາທິການພາຍຫລັງທີ່ສິ້ນສຸດການເລືອກຕັ້ງສະມາຊິກສະພາແຫ່ງຊາດ ແລະ ສະມາ ຊິກສະພາປະຊາຊົນຂັ້ນແຂວງ ໃນຕົ້ນປີ 2021; ໃຫ້ສອງຝ່າຍສືບຕໍ່ສະໜັບສະໜູນ ແລະ ຊຸກຍູ້ໃຫ້ລັດຖະບານຂອງສອງປະເທດຈັດຕັ້ງປະຕິບັດບັນດາຂໍ້ຕົກລົງ, ສົນທິສັນຍາ, ສັນຍາ, ບັນດາໂຄງການຮ່ວມມື ແລະ ການຊ່ວຍເຫລືອທີ່ດຳເນີນຢູ່ໃນປະຈຸບັນ ເປັນຕົ້ນແມ່ນການແກ້ໄຂບັນຫາຄວາມຫຍຸ້ງ ຍາກໃນການກໍ່ສ້າງເສັ້ນທາງລົດໄຟລາວ-ຈີນ ເພື່ອຮັບປະກັນໃຫ້ໂຄງການສໍາເລັດຕາມກຳນົດເວລາ, ໂຄງການລຶບລ້າງຄວາມທຸກຍາກ ແລະ ອື່ນໆ; ສືບຕໍ່ຊຸກຍູ້ສົ່ງເສີມໃຫ້ນັກລົງທຶນຂອງຈີນເຂົ້າມາລົງທຶນຢູ່ລາວໃຫ້ຫລາຍຂຶ້ນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປລາວ ແລະ ສະເໜີໃຫ້ມີການຮ່ວມມືເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.
ສະຫາຍ ຫລີ ຈ້ານຊູ ໄດ້ກ່າວສະແດງຄວາມຂອບໃຈຕໍ່ກັບການແລກປ່ຽນຄໍາຄິດຄໍາເຫັນ ແລະ ກ່ຽວກັບສະພາບການພັດທະນາເສດຖະກິດ-ສັງຄົມ; ຜົນສໍາເລັດຂອງປະຊຸມຄົບຄະນະບໍລິຫານງານສູນກາງພັກປະຊາຊົນປະຕິວັດລາວ ຄັ້ງທີ 10 ຂອງສະໄໝທີ X ແລະ ກອງປະຊຸມສະໄໝສາມັນເທືອທີ 10 ຂອງ ສພຊ ຊຸດທີ VIII ໃຫ້ຊາບໃນຄັ້ງນີ້ ພ້ອມທັງໄດ້ນໍາເອົາຄວາມຢື້ຢາມຖາມຂ່າວຈາກ ສະຫາຍ ສີ ຈິ້ນ ຜິງ ມາຍັງສະຫາຍ ບຸນຍັງ ວໍລະຈິດ ແລະ ໄດ້ລາຍງານໃຫ້ຮູ້ກ່ຽວກັບສະພາບການເນື້ອໃນສໍາຄັນຂອງກອງປະຊຸມຄົບຄະນະ ຄັ້ງທີ 5 ຂອງພັກກອມມູນິດຈີນ ສະໄໝທີ XIX (ຂໍ້ສະເໜີຂອງສູນກາງພັກ ວ່າດ້ວຍການສ້າງແຜນ 5 ປີ ຄັ້ງທີ 14 ແລະ ວິໄສທັດແຕ່ນີ້ຮອດປີ 2035) ແລະ ຝ່າຍລາວສະເໜີຜົນສໍາເລັດຂອງກອງປະຊຸມຄົບຄະນະບໍລິຫານງານສູນກາງພັກປະຊາຊົນ ປະຕິວັດລາວ ຄັ້ງທີ 10 ຂອງສະໄໝທີ X ແລະ ສະພາບການພາຍໃຕ້ການຊີ້ນໍາ-ນຳພາຂອງສະຫາຍ ສີ ຈິ້ນ ຜິງ ໃນການຄວບຄຸມການແຜ່ລະບາດຂອງພະຍາດໂຄວິດ-19 ເຊິ່ງໃຊ້ເວລາພຽງສາມເດືອນປາຍກໍສາມາດຄວບຄຸມໄດ້; ພ້ອມນັ້ນ, ຍັງໄດ້ກ່າວເຫັນດີນໍາຂໍ້ສະເໜີຂອງສະຫາຍປະທານສະພາແຫ່ງຊາດລາວ.
ແຫຼ່ງຂ່າວທີ່ມາ: ສະພາແຫ່ງຊາດ