ຕອນບ່າຍຂອງວັນທີ 5 ກໍລະກົດ 2022. ຄະນະກຳມະການຍຸຕິທໍາ ແລະ ປກຊ-ປກສ (ຄຍປປ) ສະພາປະຊາຊົນແຂວງ ອັດຕະປື ໄດ້ລົງເຄື່ອນໄຫວ ຕິດຕາມກວດກາ ແລະ ເກັບກໍາຂໍ້ມູນ ການຈັດຕັ້ງປະຕິບັດວຽກງານໃນໄລຍຜ່ານມາ ຢູ່ກອງບັນຊາການ ປກສ ເມືອງສາມັກຄີໄຊ, ນໍາໂດຍ ທ່ານ ນາງ ຈັນທະລີ ສີສຸວົງ ປະທານ ຄຍປປ ພ້ອມດ້ວຍຄະນະ ເຂົ້າຮ່ວມມີທ່ານ ພັທ ຕິກຄໍາ ນາມແສນວົງ ຮອງຫົວໜ້າກອງບັນຊາການ ປກສ ເມືອງ ຜູ້ຊີ້ນໍາວຽກງານສໍາມະໂນຄົວ ແລະ ທ່ານ ພັທ ແກ້ວອຸດອນ ວໍລະບຸດ ຮອງຫົວໜ້າກອງບັນຊາການ ປກສ ເມືອງ ຜູ້ຊີ້ນໍາວຽກງານຕໍາຫລວດ ມີບັນດາທ່ານ ຄະນະກອງບັນຊາການ ຕະຫລອດຮອດ ນາຍ ແລະ ພົນຕໍາຫລວດພາຍໃນເມືອງເຂົ້າຮ່ວມ.
ໂອກາດນີ້, ທ່ານ ພັທ ແກ້ວອຸດອນ ວໍລະບຸດ ຮອງຫົວໜ້າກອງບັນຊາການ ປກສ ເມືອງ ຜູ້ຊີ້ນໍາວຽກງານຕໍາຫລວດໄດ້ລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານ ໃນໄລຍະ 6 ເດືອນຕົ້ນປີ 2022 ຜ່ານມາວ່າ: ວຽກງານສະກັດກັ້ນ ແລະ ຕ້ານຢາເສບຕິດຂອງກອງບັນຊາການ ປກສ ເມືອງ ແມ່ນເປັນວຽກໜຶ່ງທີ່ສໍາຄັນ ແລະ ເປັນວຽກງານບູລິມະສິດທິ 1 ໃນການແກ້ໄຂ ໂດຍໄດ້ເຄື່ອນໄຫວຕາມແຜນການແກ້ໄຂວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ຜ່ານການຈັດຕັ້ງປະຕິບັດການແກ້ໄຂບັນຫາ ຄ້າ-ຂາຍ ຢາເສບຕິດຕາມແຜນວາລະແຫ່ງຊາດ ກອງບັນຊາການ ປກສ ເມືອງ ສາມາດຈັດຕັ້ງປະຕິບັດໄດ້ 17 ເລື່ອງ, ກັກຕົວຖືກຫາ ໄດ້ 21 ຄົນ,ຍິງ 3 ຄົນ, ຍຶດຂອງກາງຢາເສບຕິດປະເພດຢາບ້າ 10,776 ເມັດ, ໂທລະສັບ 16 ໜ່ວຍ, ເງີນສົດ 2,022,00 ກີບ, ສືກສາອົບຮົມຜູ້ຖືກເຄາະຮ້າຍຈາກຢາເສບຕິດມີ 9 ຄັ້ງ, 9 ຄົນ, ວຽກງານຄຸມຂັງ ການເໜັງຕີງຂອງຜູ້ຖືກຫາ ແລະ ຜູ້ຖືກດັດສ້າງ ທັງເມືອງ ແລະ ແຂວງ ມີທັງໝົດ 80 ຄົນ,ຍິງ 7 ຄົນ ໃນນັ້ນໄດ້ປ່ອຍຕົວຍົກຍ້າຍໄປສູນດັດສ້າງ ແລະ ຄ້າຍຄຸມຂັງສະເພົາທອງ ມີທັງໝົດ 66 ຄົນ,ຍິງ 7 ຄົນ, ປັດຈຸບັນຖືກຫາ ແລະ ດັດສ້າງທີ່ຢູ່ໃນຄວາມຮັບຜິດຊອບຂອງຄຸມຂັງເມືອງມີ 14 ຄົນ, ມີນັກໂທດ 2 ຄົນ,ຜູ້ຖືກຫາ 10 ຄົນ ແລະ ຄອບຄົວຝາກດັດສ້າງມີໃບມອບສິດ 2 ຄົນ.
ຈາກນັ້ນ, ກໍໄດ້ແລກປ່ຽນຄໍາຄິດຄໍາເຫັນ ຂໍ້ສະດວກ, ຂໍ້ຫຍຸ້ງຍາກ, ວິທີການ ແລະ ມາດຕະການແກ້ໄຂ ໃນການຈັດຕັ້ງປະຕິບັດວຽກງານຂອງກອງບັນຊາການ ປກສ ເມືອງ ແລະ ເພື່ອເປັນຂໍ້ມຸນພື້ນຖານໃຫ້ແກ່ ຄຍປປ ລາຍງານຂັ້ນເທິງຕາມຂັ້ນຕອນ, ພ້ອມກັນນີ້ທ່ານ ນາງ ຈັນທະລີ ສີສຸວົງ ປະທານ ຄຍປປ ຍັງໄດ້ໂອ້ລົມ ເຊິ່ງທ່ານໄດ້ສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ຄຽງຄູ່ກັນນັ້ນຍັງມີສິ່ງທ້າທາຍຫລາຍຢ່າງຈະຕ້ອງພ້ອມກັນເອົາໃຈໃສ່ເປັນຕົ້ນ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ບັນລຸເກີນຄາດໝາຍທີ່ວາງໄວ້, ຮັກສາສະຖຽນລະພາບກົມກອງ, ກໍາແໜ້ນຫລັກການເປົ້າໝາຍ, ແຍກໄດ້ມິດ ແລະ ສັດຕູ ເຄື່ອນໄຫວຖືກຕ້ອງຕາມການມອບໝາຍ, ເອົາໃຈໃສ່ຄຸ້ມຄອງຄົນຕ່າງດ້າວທີ່ດໍາລົງຊິວີດໃນຂອງເຂດຄວາມຮັບຜິດຊອບຂອງຕົນໃຫ້ຖືກຕ້ອງຕາມລະບຽບກົດໝາຍ ແລະ ເພີ່ມທະວີ ເອົາໃຈໃສ່ວຽກງານປ້ອງກັນຄວາມສະຫງົບ ທາງດ້ານການເມືອງ, ຄວາມເປັນລະບຽບຮຽບຮ້ອບທາງສັງຄົມ, ປັບປຸງ, ກໍ່ສ້າງກໍາລັງປ້ອງກັນຄວາມສະຫງົບ ປະຊາຊົນ ໃຫ້ປອດໃສ, ເຂັ້ມແຂງ ແລະ ມີແບບແຜນທີ່ທັນສະໄໝຂຶ້ນຕື່ມ ເພື່ອເຮັດໃຫ້ວຽກງານ ປ້ອງກັນຄວາມສະຫງົບ ພາຍໃນເມືອງສາມັກຄີໄຊ ໃຫ້ໄດ້ຮັບການພັດທະນາທີ່ດີຂຶ້ນເລື່ອງໆ.
(ພາບ-ຂ່າວ:ວິນັດ ສພຂ)