ໃນລະຫວ່າງວັນທີ 27-28 ມິຖຸນາ 2022 ນີ້, ຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ (ຄວສຜ) ແຂວງ ເຊກອງ ເຊິ່ງນໍາໂດຍ ທ່ານ ນາງ ຄໍາເສັງ ທຸມມະວົງສາ ກໍາມະການພັກແຂວງ, ຮອງປະທານສະພາປະຊາຊົນແຂວງ, ທ່ານ ນາງ ລັດດາວຽງ ສສຂ, ຮອງປະທານ ຄວສຜ ພ້ອມດ້ວຍພະນັກງານວິຊາການທີ່ກ່ຽວຂ້ອງ ໄດ້ລົງເຄື່ອນໄຫວຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ ໃນຂົງເຂດວັດທະນະທໍາສັງຄົມ ແລະ ບັນດາເຜົ່າ ຢູ່ເມືອງ ດາກຈຶງ ໂດຍການຕ້ອນຮັບຂອງທ່ານ ອຸ່ນຄໍາ ຫຼ້າພະຈັກ ຮອງເລຂາພັກເມືອງ, ປະທານແນວລາວສ້າງຊາດເມືອງ ດາກຈຶງ, ມີບັນດາທ່ານ ຫົວໜ້າ-ຮອງຫ້ອງການໃນຂົງເຂດວັດທະນະທໍາ-ສັງຄົມ, ປະທານ-ຮອງປະທານ 3 ອົງການຈັດຕັ້ງມະຫາຊົນ ພ້ອມດ້ວຍຂະແໜງການທີ່ກ່ຽວຂ້ອງເຂົ້າຮ່ວມ.                    ການລົງເຄື່ອນໄຫວເຮັດວຽກໃນຄັ້ງນີ້, ແມ່ນໄດ້ຮັບຟັງກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດບັນດາຄາດໝາຍໃນຂົງເຂດວັດທະນະທໍາ-ສັງຄົມ, ບັນດາຕົວຊີ້ວັດ, ແຜນງົບປະມານ, ຂໍ້ສະດວກ-ຂໍ້ຫຍຸ້ງຍາກ ແລະ ມາດຕະການຕ່າງໆ ໃນການຈັດຕັ້ງປະຕິບັດວຽກງານ ຈາກບັນດາຂະແໜງການທີ່ກ່ຽວຂ້ອງຂອງເມືຶອງ ເປັນຕົ້ນ: ໃນຂົງເຂດວຽກງານສຶກສາ ແລະ ກິລາ, ຂົງເຂດສາທາລະນະສຸກ, ຂົງເຂດຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ຂົງເຂດແຮງງານ ແລະ ສະຫວັດດິການ-ສັງຄົມ, ຂົງເຂດວຽກງານພັດທະນາຊົນນະບົດ ແລະ ລົບລ້າງຄວາມທຸກຍາກ, ວຽກງານພາຍໃນ ແລະ ບັນດາອົງການຈັດຕັ້ງມະຫາຊົນ.

            ຈາກນັ້ນ, ກໍໄດ້ລົງເຄືີ່ອນໄຫວຕິດຕາມເບິ່ງສະຖານທ່ອງທ່ຽວທາງທໍາມະຊາດ ທົ່ງນຶມ ແລະ ສະຖານທີ່ສ້າງຕັ້ງວັດ ຂອງເມືອງດັ່ງກ່າວນໍາອີກ.        ທັງນີ້, ກໍເພື່ອຮັບປະກັນໃຫ້ແກ່ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ເຊກອງ ໃນການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ ຕາມມະຕິຮັບຮອງຂອງກອງປະຊຸມສະໄໝສາມັນເທື່ອທີ 2 ຂອງສະພາ 2 ຂັ້ນ ໃຫ້ໄດ້ຮັບຜົນສໍາເລັດຕາມຄາດ ໝາຍທີ່ວາງໄວ້, ພ້ອມທັງເປັນການຊຸກຍູ້ ແລະ ເກັບກໍາຂໍ້ມູນບັນດາປະກົດການຫຍໍ້ທໍ້ ແລະ ບັນຫາຫາງສຽງສັງຄົມທີ່ເກີດຂຶ້ນຢູ່ເມືອງ ດາກຈຶງ ເພື່ອເປັນຂໍ້ມູນນໍາໄປລາຍງານຕໍ່ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ  ທີ່ຈະໄດ້ໄຂຂຶ້ນໃນຕໍ່ໜ້ານີ້.

#ໂດຍ: ນັກຂ່າວ ສພຂ ເຊກອງ.