(ສພຊ) ໃນວັນທີ 24 ມິຖຸນາຜ່ານມາ, ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ອໍາໄພ ຈິດມານົນ ຮອງປະທານກຳມາທິການກົດໝາຍ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສະພາທີ່ປຶກສາຂອງໄອປາ ກ່ຽວກັບໄພອັນຕະລາຍຂອງຢາເສບຕິດ (The 5th Meeting of the AIPA Advisory Council on Dangerous Drug-AIPACODD) ຄັ້ງທີ 5 (ໃນຮູບແບບກອງປະຊຸມທາງໄກ) ເຊິ່ງຈັດໂດຍ ສະພາແຫ່ງຊາດ ແຫ່ງ ຣາຊະອານາ ຈັກກໍາປູເຈຍ ໃນຖານະເປັນປະທານສະມັດຊາລັດຖະສະພາລະຫວ່າງຊາດອາຊຽນ ໂດຍການເຂົ້າຮ່ວມຂອງບັນດາສະມາ ຊິກສະພາແຫ່ງຊາດຈາກປະເທດສະມາຊິກອາຊຽນ AIPA, ຜູ້ຕາງໜ້າຈາກອົງການສະຫະປະຊາຊາດປະຈໍາພາກພື້ນກ່ຽວກັບຢາເສບຕິດ ແລະ ອາດຊະຍາກໍາ (UNODC), ຜູ້ຕາງໜ້າຈາກເຈົ້າໜ້າທີ່ອາວຸໂສອາຊຽນ ກ່ຽວກັບຢາເສບຕິດ ASOD, ເລຂາທິການໃຫຍ່ໄອປາ ແລະ ກອງເລຂາໄອປາ.

ຄະນະຜູ້ແທນກອງປະຊຸມ ໄດ້ຮ່ວມກັນປຶກສາຫາລື ແລະ ແລກປຽນຂໍ້ມູນ-ຂ່າວສານ ກ່ຽວກັບມາດຕະການໃນການຄວບຄຸມຢາເສບຕິດພາຍໃນປະເທດຂອງຕົນ, ສິ່ງທ້າທາຍທີ່ເກີດຂຶ້ນຈາກການດຳເນີນຄະດີ, ການຢຶດຢາເສບຕິດ ແລະ ການນຳໃຊ້ມາດຕະການໃນໄລຍະການແຜ່ລະບາດພະຍາດ Covid-19 ເຊິ່ງໄດ້ສົ່ງຜົນກະທົບອັນໜັກໜ່ວງຕໍ່ພາກພື້ນ ແລະ ສາກົນ ໄດ້ແລກປ່ຽນແນວທາງ, ວິທີການໃນການເພີ່ມທະວີການຮ່ວມມືກັນເພື່ອຕ້ານໄພຂົ່ມຂູ່ຈາກຢາເສບຕິດ.

ກອງປະຊຸມຄັ້ງນີ້, ຍັງໄດ້ຮັບຮອງເອົາ ມະຕິວ່າດ້ວຍການຄວບຄຸມ ແລະ ຮັບມືກັບສິ່ງທ້າທາຍໃນປັດຈຸບັນ ເພື່ອກ້າວໄປສູ່ປະຊາຄົມອາຊຽນທີ່ປອດຢາເສບຕິດ ໂດຍການສົ່ງເສີມການຮ່ວມມືສອງຝ່າຍ, ການຮ່ວມມືພາກພື້ນ ແລະ ສາກົນ ຜ່ານການແລກປ່ຽນຂໍ້ມູນ-ຂ່າວສານ, ການຮ່ວມມືຜ່ານແດນ, ການຈັດຕັ້ງປະຕິບັດບັນດາໂຄງການ ແລະ ແຜນງານຕ່າງໆ ຕາມທີ່ໄດ້​ລະບຸ​ໄວ້ໃນ​ແຜນ​ປະຊາ​ຄົມ​ການ​ເມືອງ-ຄວາມ​ໝັ້ນຄົງອາ​ຊຽນ 2025 ເພື່ອ​ແນ​ໃສ່​ຕ້ານ​ການ​ຄ້າ​ຢາ​ເສບ​ຕິດ ​ແລະ ອາ​ຊະ​ຍາ​ກໍາ​ທີ່​ກ່ຽວ​ຂ້ອງ​ ໂດຍ​ການ​ເສີມ​ຂະ​ຫຍາຍ​ບົດ​ບາດ​ຂອງ​ຂະ​ແໜງ​ການ​ອາ​ຊຽນ, ການຊ່ວຍເຫລືອທາງດ້ານເຕັກນິກ ແລະ ປັບປຸງນິຕິກໍາຕ່າງໆທີ່ກ່ຽວຂ້ອງກັບການຄວບຄຸມຢາເສບຕິດໃນພາກພື້ນ ແລະ ໃນໂລກ ໃຫ້ມີປະສິດທິຜົນກວ່າເກົ່າ ໂດຍສະເພາະໄລຍະການແຜ່ລະບາດຂອງພະຍາດ Covid-19. ມະຕິສະບັບດັ່ງກ່າວ ຈະໄດ້ນໍາໄປສະ ເໜີຕໍ່ກອງປະຊຸມໃຫຍ່ AIPA ຄັ້ງທີ 43 ທີ່ຣາຊະອານາຈັກກໍາປູເຈຍ ໃນທ້າຍປີ 2022 ນີ້.

(ພາບ ແລະ ຂ່າວ: ກົງທະນູຄຳ ພິພັດເສລີ)