(ສພຊ) ຄະນະຜູ້ສັງເກດການການເລືອກຕັ້ງ ຂອງສະພາແຫ່ງຊາດ ລາວ ນຳໂດຍທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານສະມາຊິກສະພາແຫ່ງຊາດ ໄດ້ເຂົ້າຮ່ວມສັງເກດການການເລືອກຕັ້ງຂັ້ນຕາແສງ ຢູ່ ຣາຊະອານາຈັກກໍາປູເຈຍ ລະຫວ່າງວັນທີ 2-6 ມິຖຸນາ 2022.
ໂອກາດດັ່ງກ່າວ ຄະນະຜູ້ສັງເກດການຂອງສະພາແຫ່ງຊາດລາວ ໄດ້ເຂົ້າຢ້ຽມຂໍ່ານັບທ່ານ ສົມເດັດ ຮຸນເຊັນ ນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ; ເຂົ້າຢ້ຽມຂໍ່ານັບທ່ານ ສຸກຮອນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ; ພົບປະກັບທ່ານ ຢາລາ ຫົວໜ້າຄະນະພົວພັນຕ່າງ ປະເທດ ຂອງພັກປະຊາຊົນກໍາປູເຈຍ ທັງເປັນປະທານກໍາມາທິການການຕ່າງປະເທດ ຂອງສະພາແຫ່ງຊາດກໍາປູເຈຍ, ເຂົ້າຮ່ວມກອງປະຊຸມພົບປະ ລະຫວ່າງຄະນະກຳມະການເລືອກຕັ້ງແຫ່ງຊາດ ກຳປູເຈຍ (NEC) ກັບບັນດາພັກການເມືອງ ທີ່ຈະລົງສະໝັກຮັບເລືອກຕັ້ງຄັ້ງນີ້ ເຊິ່ງມີ 17 ພັກ ເປັນຕົ້ນ ພັກປະຊາຊົນກຳປູເຈຍ, ພັກແສງທຽນ, ພັກຟຸງຊິນເປັກ (FUNCINPEC), ພັກຊາດກຳປູເຈຍ, ພັກປະຊາທິປະໄຕຮາກຖານ; ຜູ້ຕາງໜ້າ 5 ລັດຖະສະພາ ຈາກປະເທດອາຊຽນ ເຂົ້າຮ່ວມສັງເກດການຄື: ລາວ, ຫວຽດນາມ, ມາເລເຊຍ, ອິນໂດເນເຊຍ ແລະ ຟີລິບປິນ; ບັນດາລັດຖະສະພາຈາກປະເທດໃນເອີຣົບ, ອາເມລິກາ ແລະ ຂົງເຂດອື່ນໆ ເປັນຕົ້ນ ສະເປນ, ອາແຊັກ ໄບຊານ, ໂຄລົມເບຍ, ອາລັບເອມີເຣດ, ມັນດິບ, ຈີນ; ກຸ່ມພັກການເມືອງ ຂອງຕ່າງປະເທດເຂົ້າຮ່ວມສັງເກດການ; ຄະນະຜູ້ ແທນຂອງເວທີປຶກສາຫາລືການຮ່ວມມືທາງສັງຄົມ, ອົງການຈັດຕັ້ງທີ່ບໍ່ຂຶ້ນກັບລັດຖະບານ (NGOs), ບັນດາສະມາຄົມຊາວກໍາປູເຈຍ ຢູ່ ສ.ເກົາຫລີ, ນິວຊີແລນ, ອິນໂດເນເຊຍ ແລະ ອື່ນໆ ເຂົ້າຮ່ວມ.
ການເລືອກຕັ້ງຂັ້ນຕາແສງ ຂອງຣາຊາອານາຈັກກໍາປູເຈຍ ແມ່ນການເລືອກຕັ້ງເອົາຄະນະຕາແສງ ເພື່ອໄປເລືອກຕັ້ງເອົາສະມາຊິກສະພາສູງ ໃນຂັ້ນຕໍ່ໄປ, ການເລືອກຕັ້ງຄະນະຕາແສງ ໄດ້ດໍາເນີນມາ 5 ຄັ້ງແລ້ວ ເຊິ່ງການ ເລືອກຕັ້ງຄັ້ງທໍາອິດ ແມ່ນປີ 2002, ແຕ່ລະຄັ້ງມີອາຍຸການ 5 ປີ ໂດຍແມ່ນຄະນະກໍາມະການເລືອກຕັ້ງແຫ່ງຊາດ ກໍາປູເຈຍ ເປັນຜູ້ຮັບຜິດຊອບການເລືອກຕັ້ງຕາມກົດໝາຍ ວ່າດ້ວຍການເລືອກຕັ້ງຕາແສງ ສະບັບປີ 2001 ແລະ ຕາມລັດຖະທໍາມະນູນ ຂອງ ຣາຊະອານາຈັກກໍາປູເຈຍ.
ຜູ້ສະໝັກຮັບເລືອກຕັ້ງ ແມ່ນແຕ່ລະພັກເປັນຜູ້ສົ່ງລົງສະໝັກໃນແຕ່ລະເຂດເລືອກຕັ້ງ; ການເລືອກຕັ້ງຂັ້ນຕາແສງຄັ້ງນີ້, ມີປະຊາຊົນກໍາປູເຈຍ ອອກມາໃຊ້ສິດເລືອກຕັ້ງ 7,38 ລ້ານຄົນ ຈາກຜູ້ລົງ ລົງທະບຽນເລືອກຕັ້ງໄວ້ແລ້ວ 9,2 ລ້ານຄົນ ເທົ່າກັບ 78% ຂອງຜູ້ລົງທະບຽນ.
ຜົນການເລືອກຕັ້ງຂັ້ນຕາແສງ ແມ່ນພັກປະຊາຊົນກໍາປູເຈຍ ໄດ້ 1.648 ຕາແສງ, ພັກແສງທຽນ ໄດ້ 4 ຕາແສງ ສ່ວນພັກອື່ນໆ ແມ່ນບໍ່ໄດ້ຮັບເລືອກ. ໃນນັ້ນ, ຈໍານວນທັງໝົດຂອງກໍາປູເຈຍ ໃນຂອບເຂດທົ່ວປະເທດແມ່ນ 1.652 ຕາແສງ.