ໂດຍປະຕິບັດຕາມ ແຜນການເຄື່ອນໄຫວວຽກງານ ຕິດຕາມກວດກາ ປະຈຳ 6 ເດືອນຕົ້ນປີ 2022 ຂອງຄະນະປະປະຈຳສະພາປະຊາຊົນແຂວງ, ສະບັບ ເລກທີ 31/ຄປຈ, ລົງວັນທີ 6 ພຶດສະພາ 2022.
ໃນບໍ່ດົນມານີ້ ທ່ານ ສິງຕັນ ໄຊລືຊົ່ງ ກຳມະການຄະນະປະຈຳພັກແຂວງ, ຮອງປະທານ ຄະນະປະຈຳ ສະພາປະຊາຊົນແຂວງ ພ້ອມດ້ວຍຄະນະ ຈຳນວນ 03 ທ່ານ ໄດ້ລົງເຄື່ອນໄຫວເຮັດວຽກຢູ່ສຳນັກງານເມືອງຊຽງເງິນ, ແຂວງຫຼວງພະບາງ. ຈຸດປະສົງການລົງເຮັດວຽກໃນຄັ້ງນີ້ແມ່ນເພື່ອເປັນການຊຸກຍູ້, ຕິດຕາມກວດກາ ການຈັດຕັ້ງປະຕິບັດ ລັດຖະທຳມະນູນ, ກົດໝາຍ, ມະຕິກອງປະຊຸມສະພາປະຊາຊົນແຂວງ, ມະຕິຄະນະປະຈຳສະພາປະຊາຊົນແຂວງ, ແຜນພັດທະນາເສດຖະກິດ–ສັງຄົມ ແລະ ແຜນງົບປະມານ ຂອງທ້ອງຖິ່ນຕິດພັນກັບ 2 ວາລະແຫ່ງຊາດ.
ກອງປະຊຸມໄດ້ໃຫ້ກຽດເປັນປະທານໂດຍ ທ່ານ ສິງຕັນ ໄຊລືຊົ່ງ ກຳມະການຄະນະປະຈຳພັກແຂວງ, ຮອງປະທານ ຄະນະປະຈຳ ສະພາປະຊາຊົນແຂວງ, ມີບັນດາສະຫາຍຄະນະພັກ-ຄະນະນຳຂອງເມືອງ, ບັນດາທ່ານທີ່ຕາງໜ້າຈາກຫ້ອງການ ແລະ ພະນັກງານທີ່ກຽ່ວຂ້ອງພາຍໃນເມືອງເຂົ້າຮ່ວມຢ່າງພ້ອມພຽງ. ກອງປະຊຸມໄດ້ຮັບຟັງການມີຄຳເຫັນ ແລະ ໃຫ້ທິດຊີ້ນຳ ໃນການດຳເນີນກອງປະຊຸມ ຈາກປະທານກອງປະຊຸມ, ຈາກນັ້ນໄດ້ຮັບຟັງການລາຍງານ ສະພາບການຈັດຕັ້ງປະຕິບັດວຽກງານຮອບດ້ານຂອງເມືອງ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຈາກທ່ານເຈົ້າເມືອງ ແລະ ໄດ້ຮັບຟັງ ການຈັດຕັ້ງປະຕິບັດວຽກງານ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ແຕ່ລະຂົງເຂດວຽກງານຈາກຄະນະພັກ-ຄະນະນຳ ແລະ ບັນດາຫົວໜ້າຫ້ອງການຂອງເມືອງ ໂດຍສະເພາະແມ່ນ ສະພາບການເກັບລາຍຮັບ-ການຄຸ້ມຄອງລາຍຈ່າຍ ແລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ; ການແກ້ໄຂບັນຫາຍາເສບຕິດ ແລະ ການສ້າງບ້ານ ປກສ ດີ; ວຽກງານການຄຸ້ມຄອງລາຄາສິນຄ້າປະເພດຕ່າງໆ; ວຽກງານກໍ່ສ້າງສ້ອມແປງເສັ້ນທາງ ພາຍໃນເມືອງ; ວຽກງານການເຕົ້າໂຮມຄວາມສາມັກຄີ ປະຊາຊົນບັນດາເຜົ່າ ແລະ ການນຳພາອົງການຈັດຕັ້ງມະຫາຊົນ; ວຽກງານການສຶກສາ ແລະການຍົກສູງຄຸນນະພາບການຮຽນ-ການສອນ; ວຽກງານການສ້າງໂຮງຮຽນຕົວແບບ; ວຽກງານສາທາລະນະສຸກ-ການຍົກສູງຄຸນນະພາບການປິ່ນປົວຂອງໂຮງໝໍ ແລະ ສຸກສາລາ; ວຽກງານ ຖະແຫຼງຂ່າວ-ວັດທະນະທຳ-ການປົກປັກຮັກສາວັດທະນະທຳອັນດີງາມຂອງຊາດ ແລະ ຂອງເຜົ່າ; ວຽກງານແຮງງານ ແລະ ສະຫວັດດີການ-ສັງຄົມ– ການແກ້ໄຂໄພຫວ່າງງານ, ການແກ້ໄຂນະໂຍບາຍຕໍ່ຜູ້ມີຜົນງານຄວາມດີ ຕໍ່ປະເທດຊາດຜ່ານມາ; ວຽກງານການຄຸ້ມຄອງທີ່ດິນແຕ່ລະປະເພດ ແລະ ການອອກໃບຕາດິນ.
ນອກນີ້ ປະທານກອງປະຊຸມ ຍັງໄດ້ມີຄຳເຫັນເຈາະຈີ້ມຊັກຖາມບາງຈຸດທີ່ຍັງບໍ່ທັນຈະແຈ້ງ ແລະ ບັນດາທ່ານຜູ້ແທນກອງປະຊຸມ ທີ່ຕາງໜ້າຈາກພາກສ່ວນທີ່ກຽ່ວຂ້ອງ ກໍ່ໄດ້ອະທິບາຍຊີ້ແຈງຄຳເຫັນເຈາະຈີ້ມຊັກຖາມ ຢ່າງກົງໄປ-ກົງມາ.
ຕອນທ້າຍ ທ່ານ ປະທານກອງປະຊຸມ ໄດ້ເນັ້ນໜັກ ແລະ ຮຽກຮ້ອງໃຫ້ ຄະນະພັກ-ຄະນະນຳຂອງເມືອງ ຈົ່ງເອົາໃຈໃສ່ສືບຕໍ່ຍົກສູງຄວາມຮັບຜິດຊອບ ແລະ ໜ້າທີ່ການເມືອງຂອງຕົນທີ່ພັກ-ລັດ ແລະ ປະຊາຊົນມອບໝາຍໃຫ້ ກໍຄືການນຳພາ-ຊີ້ນຳ ວຽກງານຂອງຕົນໃນແຕ່ລະຂົງເຂດ ໃຫ້ສາມາດຈັດຕັ້ງປະຕິບັດ ບັນລຸຕາມແຜນການ ແລະ ຄາດໝາຍສູ້ຊົນທີ່ວາງໄວ້ ໃນໄລຍະ 6 ເດືອນທ້າຍປີ 2022 ເຮັດໃຫ້ເມືອງມີສະຖຽນລະພາບທາງດ້ານການເມືອງທີ່ໜັກແໜ້ນ, ເສດຖະກິດມີການຂະຫຍາຍຕົວ ຢ່າງຕໍ່ເນື່ອງ, ປົກປັກຮັກສາຮີດຄອງປະເພນີອັນດີງາມໃຫ້ມີຄວາມຢືນຍົງ ເຮັດໃຫ້ການຄຸ້ມຄອງລັດ–ຄຸ້ມຂອງສັງຄົມ ດ້ວຍກົດໝາຍ ນັບມື້ນັບມີຄວາມສັກສິດ ພ້ອມທັງເປັນສ່ວນໜຶ່ງໃນການປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນກ້າວໜ້າເປັນກ້າວໆ.
ພາບ ແລະຂ່າວ: ວິສະນຸ ເພັດສຸພັນ