ໃນວັນທີ 14 ມິຖຸນາ 2022 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໄດ້ຈັດຕັ້ງເຊື່ອມຊຶມເຜີຍແຜ່ມະຕິກອງປະຊຸມເປີດກ້ວາງຄົບຄະນະບໍລິຫານງານພັກແຂວງຄໍາມ່ວນຄັ້ງທີ 6 ສະໄໝທີ X ໃຫ້ກຽດເຜີຍແຜ່ໂດຍ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ເຂົ້າຮ່ວມມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງຕະຫຼອດຮອດພະນັກງານພາຍໃນສະພາປະຊາຊົນແຂວງເຂົ້າຮ່ວມ.

ຈຸດປະສົງໃນການຈັດເຊື່ອມຊຶມຄັ້ງນີ້ກໍ່ເພື່ອແນໃສ່ໃຫ້ບັນດາ ສະມາຊິກພັກ – ພະນັກງານ ມີຄວາມຮັບຮູ້ເຂົ້າໃຈຢ່າງເລິກເຊິ່ງ ແລະ ເພື່ອຄວາມເປັນເອກະພາບ, ເປັນບ່ອນອີງກ່ຽວກັບເນື້ອໃນຈິດໃຈມະຕິກອງປະຊຸມ ໄດ້ຈັດຕັ້ງຜັນຂະຫຍາຍ, ຫັນປ່ຽນເປັນແຜນງານ, ໂຄງການລະອຽດ, ແທດເໝາະ, ຖືກຕ້ອງ, ສອດຄ່ອງກັບທ່າແຮງ, ຄວາມສາມາດຕົວຈິງຂອງຂະແໜງການຕົນ ໂດຍສະເພາະບັນດາຄາດໝາຍສູ້ຊົນທີ່ໄດ້ກຳໄວ້ໃຫ້ບັນລຸຜົນເປັນຈິງ, ແນໃສ່ສ້າງການຫັນປ່ຽນທີ່ແຂງແຮງ ເລິກເຊິ່ງ ຮອບດ້ານໃນທຸກຂົງເຂດວຽກງານໄດ້ຮັບການຈັດຕັ້ງປະຕິບັດເຂົ້າສູ່ວຽກງານຕົວຈິງຢ່າງມີປະສິດພາບສູງ.

ເຊິ່ງກອງປະຊຸມເປີດກວ້າງຄົບຄະນະບໍລິຫານງານພັກແຂວງຄຳມ່ວນ ຄັ້ງທີ 6 ສະໄໝທີ X ໄດ້ ຈັດຂຶ້ນໃນລະຫວ່າງ ໃນວັນທີ 11 – 12 ພຶດສະພາ 2022 ທີ່ເຮືອນຮັບແຂກເລກ 01 ຂອງແຂວງ ໂດຍພາຍໃຕ້ການເປັນ ປະທານຂອງ ສະຫາຍ ວັນໄຊ ພອງສະຫວັນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ມີບັນດາສະຫາຍຄະນະປະຈຳພັກແຂວງ, ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເລຂາຄະນະພັກຮາກຖານພະແນກການ, ອົງການທຽບເທົ່າ ແລະ ລັດວິສາຫະກິດອ້ອມຂ້າງແຂວງເຂົ້າຮ່ວມ.

ໃນວາລະດຳເນີນກອງປະຊຸມ ແມ່ນໄດ້ຮັບຟັງການຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດ ມະຕິກອງ ປະຊຸມເປີດກວ້າງ ຄົບຄະນະບໍລິຫານງານພັກແຂວງ ຄັ້ງທີ 5 ສະໄໝທີ X, ຮ່າງບົດສະຫຼຸບແຜນພັດທະນາ ເສດຖະກິດ-ສັງຄົມ ຂອງແຂວງໄລຍະ 4 ເດືອນ ແລະ ທິດທາງແຜນການ 8 ເດືອນໃນຕໍ່ໜ້າ, ນອກນີ້ຍັງໄດ້ຜ່ານຮ່າງບົດລາຍງານກ່ຽວກັບ ວຽກງານສ້າງ ແລະ ພັດທະນາຊັບພະຍາກອນມະນຸດໃຫ້ມີຄຸນນະພາບ, ຮ່າງບົດສະຫລຸບຕີລາຄາການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາ ຢາເສບຕິດໄລຍະຜ່ານມາ.

ໂດຍ: ເອື້ອ ມະໂນສິງ