(ສພຊ) ລະຫວ່າງວັນທີ 22-24 ກໍລະກົດ 2020 ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ), ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງ (ສພຂ) ສະຫວັນນະເຂດ ຊຸດທີ I ທີ່ຫໍວັດ ທະນະທໍາໄກສອນພົມວິຫານ ໂດຍການເປັນປະທານຂອງທ່ານ ຄໍາເຜີຍ ຜັນທະຈອນ ປະທານ ສພຂ ສະຫວັນນະເຂດ, ມີບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງສະຫວັນນະເຂດ, ເຈົ້າແຂວງໆສະຫວັນນະເຂດ, ບັນດາທ່ານການນໍາພັກ–ລັດແຂວງ ແລະ ເມືອງ ອະດີດການນໍາ ແລະ ອະດີດສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13, ບັນດາແຂກຖືກເຊີນຈາກພາກສ່ວນຕ່າງໆເຂົ້າຮ່ວມ.
ພິທີໄຂກອງປະຊຸມ ທ່ານ ຄໍາເຜີຍ ຜັນທະຈອນ ໄດ້ກ່າວວ່າ: ກອງປະຊຸມສະໄໝສາມັນເທື່ອທີ 9 ຂອງສພຂ ສະຫວັນນະເຂດ ຊຸດທີ I ໄຂຂຶ້ນຢ່າງເປັນທາງການໃນທ່າມກາງທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດເວົ້າລວມ, ເວົ້າສະເພາະກໍຄືປະຊາຊົນຊາວແຂວງສະຫວັນນະເຂດ ກໍາລັງສືບຕໍ່ປະຕິບັດມາດຕະການ ຜ່ອນຜັນ, ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມ ຄັ້ງທີ VIII ຂອງອົງຄະນະພັກແຂວງສະຫວັນນະເຂດ, ແຜນພັດທະນາເສດຖະກິດ–ສັງຄົມ, ແຜນງົບປະມານແຫ່ງລັດ 5 ປີ ຄັ້ງທີ VIII (2016-2020) ຂອງລັດຖະບານ ແລະ ຂອງແຂວງ ດ້ວຍຄວາມເປັນເຈົ້າການ ແລະ ຄວາມຮັບຜິດຊອບສູງ ແລະ ໃນທ່າມກາງວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ຄືວັນທີ 20 ກໍລະກົດ ເຊິ່ງກອງປະຊຸມ ຈະໄດ້ພິຈາລະນາ ແລະ ຕົກລົງບັນຫາສໍາຄັນຂອງແຂວງດັ່ງນີ້: ພິຈາລະນາ ແລະ ຮັບຮອງເອົາການລາຍງານຂອງທ່ານເຈົ້າແຂວງໆສະຫວັນນະເຂດ ກ່ຽວກັບສະພາບການພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2020 ຂອງແຂວງສະຫວັນນະເຂດ; ຮັບຟັງການລາຍງານຈາກທ່ານຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2020; ຮັບຟັງການລາຍງານຈາກທ່ານ ຜູ້ວ່າການຫົວໜ້າພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2020; ຮັບຟັງການລາຍງານຈາກທ່ານຜູ້ຮັກສາການຫົວໜ້າອົງການໄອຍະການປະຊາຊົນແຂວງ ກ່ຽວກັບການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນ ກ່ຽວກັບການກວດຄົ້ນເຄຫະສະຖານ, ການກັກຕົວ, ການຈັບຕົວ, ການກັກຂັງພາງ ແລະ ການປ່ອຍຕົວພາງຜູ້ຖືກຫາ ຂອງອົງການໄອຍະການປະຊາຊົນແຂວງ; ຮັບຟັງການລາຍງານຈາກທ່ານປະທານສານປະຊາຊົນແຂວງ ກ່ຽວກັບການພິຈາລະນາຕັດສິນຄະດີຢາເສບຕິດຢູ່ສານຂັ້ນຕົ້ນ ແລະ ຂັ້ນອຸທອນ; ຮັບຟັງການລາຍງານກ່ຽວກັບການເຄື່ອນໄຫວວຽກງານຂອງຄະນະປະຈໍາສະພາປະຊາຊົນແຂວງ ໃນໄລຍະສອງກອງປະຊຸມ; ພິຈາລະນາ ແລະ ຮັບຮອງເອົາຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການຄຸ້ມຄອງຮ້ານອາຫານ, ຮ້ານກິນດື່ມ ແລະ ຮ້ານບັນເທີງພາຍໃນແຂວງສະຫວັນນະເຂດ ແລະ ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການກໍານົດເຂດປະເມີນລາຄາທີ່ດິນ ແລະ ສິ່ງປຸກສ້າງ ໃນທົ່ວແຂວງສະຫວັນນະເຂດ ສະບັບປັບປຸງ ແລະ ພິຈາລະນາ ແລະ ຮັບຮອງເອົາການສະເໜີຂອງທ່ານເຈົ້າແຂວງໆສະຫວັນນະເຂດ ກ່ຽວກັບການຮັບຮອງເອົາການແຕ່ງຕັ້ງຫົວໜ້າພະແນກການ, ກົມກອງຂອງອົງການ ປົກຄອງແຂວງ.
ນອກນັ້ນ, ກອງປະຊຸມຍັງໄດ້ຮັບຟັງການລາຍງານ ແລະ ການຊີ້ແຈງຈາກບັນດາພະແນກການຈໍານວນໜຶ່ງຂອງອົງການປົກຄອງແຂວງ ຫລື ໃນປະເດັນທີ່ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ມີຄວາມສົນໃຈ.