ຕອນເຊົ້າວັນທີ 13 ມິຖຸນາ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດພິທີມອບ-ຮັບ ໜ້າທີ່ລະຫວ່າງຜູ້ຮັບຜິດຊອບຊີ້ນໍາວຽກງານ ບໍລິຫານ-ການເງິນ (ຜູ້ເກົ່າ-ຜູ້ໃໝ່) ແລະ ວຽກ ງານຂໍ້ມູນຂ່າວສານ, ຫໍສະໝຸດ (ຜູ້ເກົ່າ-ຜູ້ໃໝ່) ໂດຍການເປັນປະທານ ຂອງທ່ານ ຫຸມເພັງ ຈອມວິສານ ຮອງປະທານຄະນະປະຈໍາສະພາປະຊາຊົນແຂວງ (ຄປຈຂ), ມີ ປະທານ, ຮອງປະທານຄະນະກໍາມະການ, ເລຂາທິການ, ຮອງເລຂາທິການ ສພຂ (ຄລຂ) ແລະ ພ້ອມດ້ວຍ ພະນັກງານ-ລັດຖະກອນພາຍໃນ ສພຂ ເຂົ້າຮ່ວມ.

ທີ່ກອງປະຊຸມໄດ້ຮັບຟັງທ່ານ ຄໍາຕຸ່ນ ວົງສາ ຮອງ ຄລຂ (ຜູ້ຊີ້ນໍາວຽກງານຈັດຕັ້ງ-ກວດກາ) ຂຶ້ນຜ່ານ ຂໍ້ຕົກລົງ ວ່າດ້ວຍການແບ່ງໜ້າທີ່ ແລະ ຄວາມຮັບຜິດຊອບ ຂອງ ເລຂາທິການ, ຮອງເລຂາທິການ ສພຂ ສະບັບເລກທີ 161/ຄລຂ, ລົງວັນທີ 18 ມີນາ 2022; ໄດ້ຮັບຟັງທ່ານ ນາງ ວຽງຄໍາ ວໍລະຈິດ ຮອງ ຄລຂ (ຜູ້ຊີ້ນໍາວຽກບໍລິຫານ-ການເງິນຜູ້ເກົ່າ) ຂຶ້ນຜ່ານ ບົດບັນທຶກມອບ-ຮັບ ໜ້າທີ່ລະຫວ່າງຜູ້ຮັບຜິດຊອບຊີ້ນໍາວຽກງານ ບໍລິຫານ-ການເງິນ ແລະ ຮັບຟັງທ່ານ ຄໍາມາ ສຸລິວົງ ຮອງ ຄລຂ (ຜູ້ຊີ້ນໍາວຽກງານຂໍ້ມູນຂ່າວສານ, ຫໍສະໝຸດຜູ້ເກົ່າ) ຂຶ້ນຜ່ານ ບົດບັນທຶກມອບ-ຮັບ ໜ້າທີ່ລະຫວ່າງຜູ້ຮັບຜິດຊອບຊີ້ນໍາວຽກງານຂໍ້ມູນຂ່າວສານ, ຫໍສະໝຸດ; ຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ແລກປ່ຽນ, ປະກອບຄໍາເຫັນຮ່າງບົດບັນທຶກດັ່ງກ່າວຢ່າງກົງໄປກົງມາເພື່ອເປັນຂໍ້ມູນໃຫ້ໃນການປັບປຸງເນື້ອໃນບົດບັນທຶກໃຫ້ມີຄວາມອຸດົມສົມບຸນ. ພ້ອມກັນນັ້ນ, ໄດ້ເຊັນ ບົດບັນທຶກ ມອບ-ຮັບ ໜ້າທີ່ລະຫວ່າງ ທ່ານ ວຽງຄໍາ ວໍລະຈິດ ຜູ້ຮັບຜິດຊອບຊີ້ນໍາວຽກງານ ບໍລິຫານ-ການເງິນ ຜູ້ເກົ່າ ແລະ ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ, ຮັບຜິດຊອບຊີ້ນໍາວຽກງານ ບໍລິຫານ-ການເງິນ ຜູ້ໃໝ່; ໄດ້ເຊັນ ບົດບັນທຶກ ມອບ-ຮັບ ໜ້າທີ່ລະຫວ່າງ ທ່ານ ຄໍາມາ ສຸລິວົງ ຜູ້ຮັບຜິດຊອບຊີ້ນໍາ ວຽກງານຂໍ້ມູນຂ່າວສານ, ຫໍສະໝຸດ ຜູ້ເກົ່າ ແລະ ທ່ານ ນາງ ວຽງຄໍາ ວໍລະຈິດ ຜູ້ຮັບຜິດຊອບຊີ້ນໍາ ວຽກງານຂໍ້ມູນຂ່າວສານ, ຫໍສະໝຸດ  ຜູ້ໃໝ່.

ຕອນທ້າຍຂອງກອງປະຊຸມ ທ່ານ ຫຸມເພັງ ຈອມວິສານ ຍັງໄດ້ໃຫ້ກຽດ ໂອລົມຕໍ່ພິທີດັ່ງກ່າວ ຊິ່ງກ່ອນອື່ນທ່ານກໍໄດ້ຊົມຕໍ່ຄະນະຮັບຜິດຊອບກະກຽມພິທິມອບ-ຮັບໃນຄັ້ງນີ້ ແລະ ທ່ານຍັງເໜັ້ນບາງບັນຫາທີ່ສໍາຄັນ ມີບາງຕອນທ່ານໄດ້ກ່າວວ່າ: “ເອົາໃຈໃສ່ປະຕິບັດພາລະບົດບາດການເປັນເສນາທິການ ຕາມມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະເລຂາທິການສະພາປະຊາຊົນແຂວງ, ເປັນຕົ້ນແມ່ນ: ການຄົ້ນຄ້ວາ-ສັງລວມເນື້ອໃນວຽກງານຮອບດ້ານ, ວຽກງານຄຸ້ມຄອງບໍລິຫານ, ວຽກງານຈັດຕັ້ງ-ພະນັກງານ ແລະ ວຽກງານອື່ນໆ, ເພື່ອອໍານວຍຄວາມສະດວກໃຫ້ແກ່ການເຄື່ອນໄຫວຂອງສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ; ເອົາໃຈໃສ່ເພີ່ມທະວີການສຶກສາອົບຮົມການເມືອງແນວຄິດ, ການຈັດຕັ້ງ ແລະ ການຄຸ້ມຄອງພະນັກງານ-ລັດຖະກອນ ຕາມພາລະບົດບາດ, ຕາມກົດໝາຍວ່າດ້ວຍພະນັກງານ-ລັດຖະກອນ; ເອົາໃຈໃສ່ຍົກສູງຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບການມອບໝາຍ; ເອົາໃຈໃສ່ໃນປະສານສົມທົບກັບພາກສ່ວນຕ່າງໆ ພາຍໃນ ແລະ ພາຍນອກ ເພື່ອອໍານວຍຄວາມສະດວກດ້ານບໍລິຫານ–ພິທິການ ໃຫ້ແກ່ການເຄື່ອນໄຫວວຽກງານຕ່າງໆຂອງສະພາປະຊາຊົນແຂວງ; ເປັນໃຈກາງໃນການເກັບກໍາຂໍ້ມູນ–ຂ່າວສານ, ຄົ້ນຄວ້າໄຈ້ແຍກ ແລະ ສະໜອງຂໍ້ມູນ ໃຫ້ທຸກພາກສ່ວນ ທີ່ພົວພັນເຖິງການຈັດຕັ້ງປະຕິບັດວຽກງານຂອງສະພາປະຊາຊົນແຂວງ; ເອົາໃຈໃສ່ສ້າງ ແລະ ປັບປຸງຫ້ອງສະໝຸດ ຂອງສະພາປະຊາຊົນແຂວງ (ແມ່ນເປັນວຽກໃໝ່) ແນໃສ່ສ້າງສິ່ງອໍານວຍຄວາມສະດວກ ໃນການເຂົ້າເຖິງຂໍ້ມູນ-ຂ່າວສານຂອງສະພາປະຊາຊົນແຂວງ”.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ.