ຕອນເຊົ້າວັນທີ 3 ມິຖຸນາ 2022 ນີ້, ຢູ່ທີ່ສະໂມສອນສະພາປະຊາຊົນແຂວງ ເຊກອງ ໄດ້ມີກອງປະຊຸມຜ່ານຮ່າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ ໃຫ້ກຽດເຂົ້າຮ່ວມເປັນປະທານຂອງທ່ານ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ ສພຂ ແລະ ທ່ານ ໃຈເພັດ ພັນທະວົງ ເລຂາໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ, ມີບັນດາທ່ານຄະນະພັກ-ຄະນະນໍາຂັ້ນເທິງ, ຄະນະໜ່ວຍພັກອ້ອມຂ້າງ ພ້ອມດ້ວຍສະມາຊິກພັກສົມບູນ-ສໍາຮອງພາຍໃນໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ ເຂົ້າຮ່ວມ.
       ໃນພິທີ ສະຫາຍ ດາສີ ສາຍວິໄລສັກ ຮອງເລຂາໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ ໄດ້ຂຶ້ນຜ່ານບົດສະຫຼຸບ ປະຈໍາເດືອນ 4-5 ປີ 2022 ແລະ ທິດທາງແຜນການ ປະຈໍາເດືອນ 6 ປີ 2022 ຂອງໜ່ວຍພັກ ແລະ ຜ່ານແຜນການເຄື່ອນໄຫວວຽກງານ 5 ປີ (2021-2025) ແລະ ທິດທາງ ປີ 2023 ຂອງຄະນະກໍາມະການຍຸຕິທໍາ ແລະ ປກຊ-ປກສ.
ຈາກນັ້ນ, ກໍໄດ້ຮັບຟັງການຜ່ານແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022   ຂອງໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ ຈາກສະຫາຍ ລໍາໄພ ທອງສາວົງ ຫົວໜ້າຈຸພັກ ເຊິ່ງໄດ້ຍົກໃຫ້ເຫັນວ່າ: ໃນການເຄື່ອນໄຫວຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນປະຈໍາປີ 2022 ໃນແຕ່ລະດ້ານຈະສູ້ຊົນໃຫ້ບັນລຸຕາມລະດັບຄາດໝາຍ ເຊິ່ງໃນນັ້ນ, ຈະສູ້ຊົນດ້ານຄຸນທາດການເມືອງໃຫ້ບັນລຸ 2 ຄະແນນ, ດ້ານແນວຄິດ 1,5 ຄະແນນ, ດ້ານການຈັດຕັ້ງ 1,5 ຄະແນນ ແລະ ດ້ານແບບແຜນວິທີນໍາພາ 2 ຄະແນນ ລວມທັງໝົດ 4 ດ້ານໃຫ້ໄດ້ 9 ຄະແນນຂຶ້ນໄປ. ຈາກນັ້ນ, ບັນດາຜູ້ແທນກອງປະຊຸມກໍໄດ້ພ້ອມກັນປະກອບຄໍາຄິດຄໍາເຫັນໃສ່ຮ່າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງມີຈຸດສຸມ.
             ເພື່ອເຮັດໃຫ້ແຜນການດັ່ງກ່າວມີຄວາມສົມບູນ ແລະ ສາມາດຍາດໄດ້ຜົນສໍາເລັດດັ່ງກ່າວນັ້ນ ສະຫາຍ ນາງ ຄໍາເສັງ ທຸມມະວົງສາ ກໍໄດ້ໃຫ້ກຽດໂອ້ລົມຕໍ່ກອງປະຊຸມ ເຊິ່ງສະຫາຍ ໄດ້ຮຽກຮ້ອງໃຫ້ຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນ ຕ້ອງຄົ້ນຄ້ວາ, ເຊື່ອມຊຶມກໍາແໜ້ນຄໍາສັ່ງຂອງກົມການເມືອງສູນກາງພັກ, ບັນດາແຈ້ງການແນະນໍາຂອງຄະນະຈັດຕັ້ງສູນກາງພັກ ແລະ ມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ເລິກເຊິງເຖິງຖອງ ແລະ ເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງຄະນະໜ່ວຍພັກ, ສະມາຊິກພັກສູງກ່ວາເກົ່າ, ທຸກສະຫາຍ ຕ້ອງເປັນເຈົ້າການເຊື່ອມຊຶມ, ຈັດຕັ້ງປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ເກີດດອກອອກຜົນຕົວຈິງ, ສະມາຊິກພັກຕ້ອງຍົກສູງຄວາມຮັບຜິດຊອບ ໃນການຝືກຝົນຫຼໍ່ຫຼອມຕົນເອງ ເພື່ອກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນພາຍໃນໜ່ວຍພັກໃຫ້ໄດ້ຮັບຄຸນນະພາບ.
ທັງນີ້, ກໍເພື່ອແນໃສ່ເຮັດໃຫ້ສະມາຊິກພັກ, ພະນັກງານ-ລັດຖະກອນ ຂອງໜ່ວຍພັກຄະນະກໍາມະການຍຸຕິທໍາ ແລະ ປກຊ-ປກສ ມີຄວາມຮັບຜິດຊອບສູງຕໍ່ໜ້າທີ່ວຽກງານ ແລະ ໄດ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022. ພິທີໄດ້ດໍາເນີນເປັນເວລາ 1 ຄາບ ແລະ ໄດ້ອັດລົງດ້ວຍຜົນສໍາເລັດຢ່າງຈົບງາມ.
#ໂດຍ:ນັກຂ່າວເຂດທີ 16.