(ສພຊ) ໃນຕອນເຊົ້າວັນ​ພຸດທີ 24 ມິ​ຖຸ​ນາ 2020 ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີ​ພິ​ທີ​ເປີດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ (ສພຊ) ຊຸດທີ VIII ຢ່າງເປັນທາງການ ​ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ; ເຂົ້າຮ່ວມມີທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ; ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີີ​ການ​ນຳ​ພັກ-ລັດ,​ ສະມາຊິກສະພາແຫ່ງຊາດ (ສ​ສ​ຊ), ຕາງໜ້າຈາກອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ ພ້ອມ​ດ້ວຍຜູ້ຕາງໜ້າຈາກພາກສ່ວນຕ່າງໆ ​ແລະ ແຂກຖືກເຊີນ.ໃນ​ພິ​ທີ, ທ່ານ ນາງ ປານີ ຢາທໍ່ຕູ້ ໄດ້ກ່າວສູນທອນພົດ ​ເພື່ອໄຂກອງປະຊຸມຢ່າງເປັນທາງການ; ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ຈະໄດ້ສຸມໃສ່ ພິຈາລະນາ ບາງບັນຫາສຳຄັນຈໍານວນໜຶ່່ງ ດັ່ງນີ້:

(1) ພິຈາລະນາ ແລະ ຮັບຮອງເອົາ ບົດລາຍງານຂອງລັດຖະບານ ກ່ຽວກັບ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ແຫ່ງລັດ, ແຜນເງິນຕາ 5 ເດືອນຕົ້ນປີ, ຄາດຄະເນ 6 ເດືອນຕົ້ນປີ 2020 ແລະ ທິດທາງວຽກງານຈຸດ ສຸມ 6 ເດືອນທ້າຍປີ 2020;

(2) ຮັບຟັງການຕອບຄໍາຊັກຖາມ ຈາກ 4 ກະຊວງ ຄື: ກະຊວງແຜນການ ແລະ ການລົງທຶນ, ກະຊວງການເງິນ, ກະຊວງກະສິກໍາ ແລະ ປ່າໄມ້, ກະຊວງແຮງງານ ແລະ ສະຫວັດດີການສັງຄົມ ກ່ຽວກັບ ການກໍານົດ ແລະ ຈັດຕັ້ງປະຕິບັດ ບັນດານະໂຍບາຍ ແລະ ມາດຕະການ ເຂົ້າໃນແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນທ້າຍປີ 2020 ໃນຄວາມຮັບຜິດຊອບຂອງຂະແໜງການຕົນ;

(3) ພິຈາລະນາ ແລະ ຮັບຮອງເອົາການປັບປຸງກົດໝາຍ ຈໍານວນ 5 ສະບັບ, ໃນຂົງເຂດສະພາແຫ່ງຊາດ 3 ສະບັບ ແລະ ຂົງເຂດເສດຖະກິດ 2 ສະບັບ.

(4) ພິຈາລະນາ ແລະ ຮັບຮອງເອົາ ບົດລາຍງານຜົນການຕິດຕາມກວດກາຂອງຄະນະປະຈໍາສະພາແຫ່ງຊາດ ກ່ຽວກັບການຄຸ້ມຄອງ, ການສໍາຫລວດ ແລະ ການຂຸດຄົ້ນແຮ່ທາດ, ຫີນແຮ່ ແລະ ຫີນຜາ.

(5) ຮັບຟັງການລາຍງານການເຄື່ອນໄຫວວຽກງານ 6 ເດືອນຕົ້ນປີ, ທິດທາງແຜນການ 6 ເດືອນທ້າຍປີ 2020 ຂອງຄະນະປະຈໍາສະພາແຫ່ງຊາດ.

(6) ພິຈາລະນາການເລືອກຕັ້ງກໍາມະການຄະນະຄະຈໍາສະພາແຫ່ງຊາດ, ປະທານກໍາມາທິການແຜນການ ການເງິນ ແລະ ການກວດສອບ.

ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ຈະສ​ືບ​ຕໍ່ດຳເນີນໄປຈົນເຖິງວັນທີ 2 ກໍ​ລະ​ກົດ 2020 ເຊິ່ງໄລຍະດໍາເນີນກອງປະຊຸມດັ່ງກ່າວ ສພຊ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເປີດຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກທົ່ວສັງຄົມໃນ​ໂມງ​ລັດ​ຖະ​ການ ດ້ວຍໂທລະສັບໝາຍເລກ 156 ໂດຍບໍ່ໄດ້ເສຍຄ່າ, ໂທລະສານໝາຍເລກ 021 413528 ຫລື ສົ່ງເປັນຈົດໝາຍທາງໄປສະນີ ຕູ້ ປນ. 662 ແລະ ສົ່ງ​ອີ​ເມວ [email protected].