ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ປ່ອຍປາລົງສູ່ທຳມະຊາດເພື່ອຕ້ອນຮັບວັນອະນຸລັກສັດນ້ຳສັດປ່າແຫ່ງຊາດ ຕອນເຊົ້າວັນທີ 1 ມິຖຸນາ 2022 ນີ້, ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມຄະນະ ໄດ້ເຂົ້າຮ່ວມພິທີປູກຕົ້ນໄມ້ ແລະ ປ່ອຍປາລົງສູ່ທຳມະຊາດ ທີ່ວັງສະຫງວນຕາດແຝກ ເຊິ່ງຈັດໂດຍຫ້ອງການກະສິກໍາ ແລະ ປ່າໄມ້ ເມືອງລະມາມໂດຍມີ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີທ່ານ ວົງເດືອນ ຈັນທະບຸດຊຽງ ເຈົ້າເມືອງໆລະມາມ, ພ້ອມດວ້ຍການນຳຂັ້ນແຂວງ-ຂັ້ນເມືອງ ແລະ ອົງການປົກຄອງບ້ານໃກ້ຄຽງເຂົ້າຮວ່ມ.
          ທ່ານ ສະໜອງ ສິມມາວັດ ວ່າການຫົວໜ້າຫ້ອງການກະສິກຳແລະປ່າໄມ້ເມືອງລະມາມກ່າວວ່າ: ພັກ-ລັດຖະບານຍາມໃດກໍ່ຖືສຳຄັນແລະເປັນຫວ່ງເປັນໄຍຕໍ່ວຽກງານຄຸ້ມຄອງຊັບພະຍາກອນປ່າໄມ້ແລະວຽກງານອະນຸລັກສັດນ້ຳ-ສັດປ່າເວົ້າລວມ,ເວົ້າສະເພາະແມ່ນຄະນະນຳເມືອງລະມາມ. ປະຈຸບັນເມືອງລະມາມມີເນື້ອທີ່ປ່າໄມ້ປົກຫຸ້ມ 139.589 ເຮັກຕາ ແລະມີວັງສະຫງວນທົ່ວເມືອງ 31 ວັງ ເຊິ່ງໃນນີ້ການຜະລິດຂອງປະຊາຊົນສ່ວນໜຶ່ງຖືເອົາການຖາງປ່າ ເຮັດສວນເປັນອາຊີບ,ດ້ວຍເຫດນັ້ນຈຶ່ງເຮັດໃຫ້ເນື້ອທີ່ປ່າໄມ້ຖືກທຳລາຍໄປໃນແຕ່ລະປີປະມານ 200 ກ່ວາເຮັກຕາ ແລະ ອີກບັນຫາໜຶ່ງພາຍໃນເທດສະບານແຂວງກໍ່ຄືເມືອງລະມາມ ກໍ່ໄດ້ມີການພັດທະນາພື້ນຖານໂຄງລ່າງຫຼາຍຂຶ້ນ.ຈຳນວນໜື່ງກໍ່ມີການລັກລອບຂຸດຄົ້ນຊື້ຂາຍໄມ້ຜິດກົດໝາຍ, ການຊອກຢູ່ຫາກິນຂອງປະຊາຊົນບາງສວ່ນມີລັກສະນະແບບດັບສູນ ສະນັ້ນຈິ່ງເຮັດໃຫ້ສະພາບຄວາມອຸດົມສົມບູນຂອງປ່າໄມ້ ກໍ່ຄືສັດນ້ຳ-ສັດປ່າ ຄອ່ຍຫລຸດນອ້ຍຖອຍລົງ .ບັນຫາດັ່ງກ່າວ,ຄະນະນຳຂັ້ນແຂວງ ,ຂັ້ນເມືອງ ຈຶ່ງໄດ້ເອົາໃຈໃສ່ປຸກລະດົມອົງການຈັດຕັ້ງຂັ້ນຕ່າງໆ ຕະຫຼອດຮອດພໍ່ແມ່ປະຊາຊົນບັນດາເຜົ່າ ຕອ້ງໄດ້ປູກຕົ້ນໄມ້ເພື່ອທົດແທນຄືນປ່າໄມ້ທີ່ຖືກທຳລາຍໄປ, ຕອ້ງໄດ້ ປອ່ຍປາໃສ່ວັງຫງວນຕ່າງໆ ເພື່ອເປັນການຂະຫຍາຍພັນປາ ເພື່ອແນ່ໃສ່ການສ້າງເງື່ອນໄຂທາງທຳມະຊາດໃຫ້ມີຄວາມອຸດົມສົມ ບູນຄືໄລຍະຜ່ານມາ, ຍ້ອນຄວາມສຳຄັນດັ່ງທີ່ກ່າວມານັ້ນ ພັກແລະລັດຖະບານເຮົາ ຈຶ່ງໄດ້ກຳນົດເອົາວັນທີ 1ມິຖຸນາ ຂອງທຸກໆ ປີເປັນວັນປູກຕົ້ນໄມ້ແຫ່ງຊາດ ,ສະເພາະປີນີ້ໄດ້ນຳເອົາເບ້ຍໄມ້ປະເພດໄມ້ຍາງ,ໄມ້ຂະຍູງແລະໄມ້ດູ່ມາປູກເພື່ອເປັນພິທີໃນເນື້ອທີ່ປ່າສະຫງວນຕາດແຝກຈຳນວນ2ເຮັກຕາ ແລະ ປອ່ຍປາປາກລົງສູ່ທຳມະຊາດຈຳນວນ 4500 ໂຕ ເພື່ອສ້າງຄວາມອຸດົມສົມບູນໃຫ້ກັບສິ່ງແວດລ້ອມ ແລະ ເພື່ອບັນລຸເປົ້າໝາຍພັດທະນາວຽກງານກະສິກຳແລະປ່າໄມ້ຂອງເມືອງລະມາມ .
          ໂອກາດດັ່ງກ່າວ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງກໍ່ໄດ້ໃຫ້ທັດສະນະວ່າ: ການຈັດພິທີປູກໄມ້ ແລະ ປ່ອຍປາຄັ້ງນີ້ເປັນພຽງສ່ວນໜຶ່ງ ເພື່ອການປຸກລະດົມ, ຊວນເຊື່ອໃຫ້ພະນັກງານ,ທະຫານ,ຕຳຫລວດຕະຫລອດຮອດປະຊາຊົນບັນດາເຜົ່າຮັບຮູ້ໄດ້ເຖິງຄວາມໝາຍຄວາມສໍາຄັນ ແລະ ປູກຈິດສຳນຶກໃຫ້ເດັກນ້ອຍຮູ້ຮັກສິ່ງແວດລ້ອມ.
ອີກດ້ານໜຶ່ງກໍເພື່ອເປັນການເພີ່ມເນື້ອທີ່ປົກຄຸມຂອງປ່າໄມ້ທີ່ເປັນຕົ້ນກໍາເນີດຂອງເເຫລ່ງນໍ້າ, ເປັນບ່ອນເພາະພັນທີ່ຢູ່ອາໄສຂອງສັດນໍ້າ ທັງເປັນການຮັກສາຄວາມສົມດູນຂອງລະບົບນິເວດ ການປູກໄມ້ ແລະ ການປ່ອຍປາບໍ່ໄດ້ຈຳກັດສະເພາະແຕ່ມື້ດຽວມື້ນີ້, ພວກເຮົາສາມາດປະຕິບັດໄດ້ຕະຫລອດໄລຍະ ໂດຍອີງໃສ່ຄວາມສາມາດ ແລະ ເງື່ອນໄຂຕົວຈິງຂອງແຕ່ລະບ່ອນ. ສະນັ້ນ, ຮຽກ ຮອງເຖິງອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ຜູ້ປະກອບການຕະຫຼອດ ຮອດປະຊາຊົນບັນດາເຜົ່າ ຈົ່ງພ້ອມກັນປູກໄມ້ໃຫ້ເປັນປ່າ,ປົກປັກຮັກສາຟື້ນຟູປ່າໄມ້ ແລະ ອະນຸລັກຮັກສາ ສັດປ່າ, ສັດນໍ້າ ໃຫ້ມີຄວາມຍືນຍົງຄົງຕົວຕະຫລອດໄປ.
#ໂດຍ:ນັກຂ່າວເຂດທີ16.