ໃນຕອນບ່າຍຂອງວັນທີ 27 ພຶດສະພາ 2022 ຜ່ານມານີ້, ທີ່ຫ້ອງປະຊຸມສະພາປະຊາຊົນແຂວງ, ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງຈໍາປາສັກ ໄດ້ເປີດກອງປະຊຸມ ຕິດຕາມກວດກາການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19 ຂອງທ້ອງຖິ່ນ ຮ່ວມກັບພະແນການທີ່ກ່ຽວຂ້ອງ ໂດຍການເປັນປະທານຂອງ ທ່ານ ມະນີວົງ ແສນລາດ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ເຂົ້າຮ່ວມມີ ທ່ານ ນາງ ບຸນສຸວັນ ໂພໄຊຊະນະສັກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ, ມີບັນດາທ່ານຕາງໜ້າຈາກພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ພະແນກສາທາລະນະສຸກ, ບັນດາທ່ານຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ຫົວໜ້າຂະແໜງ, ຮອງຂະແໜງ ແລະ ພະນັກງານວິຊາການທີ່ກ່ຽວຂ້ອງຂອງສະພາປະຊາຊົນແຂວງເຂົ້າຮ່ວມທັງໝົດ 9 ທ່ານ,​ ຍິງ 3​ ທ່ານ.

ໃນກອງປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19 ພາຍໃນແຂວງຈໍາປາສັກ ໃນໄລຍະຜ່ານມາ ຈາກພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ພະແນກສາທາລະນະສຸກແຂວງ  ເຊິ່ງໄດ້ຍົກໃຫ້ເຫັນໝາກຜົນຜົນງານ, ຜົນສໍາເລັດໃນຫຼາຍດ້ານທີ່ສາມາດຈັດຕັ້ງປະຕິບັດໄດ້ ໂດຍສະເພາະການສຸມໃສ່ມາດຕະການປ້ອງກັນພະຍາດໂຄວິດ-19 ໂດຍຖືເອົາການສັກວັກຊິນເປັນບັນຫາຕົ້ນຕໍ ເຊິ່ງແຂວງຈໍາປາສັກສາມາດບັນລຸໄດ້ 80% ຂອງຈໍານວນປະຊາກອນ, ການໃຫ້ຄວາມຮູ້ແກ່ຊຸມຊົນໃນການປ້ອງກັນພະຍາດໂຄວິດ-19 ແລະ ການປະຕິບັດມາດຕະການອື່ນໆຢ່າງຮອບດ້ານ, ສ່ວນວຽກງານທ່ອງທ່ຽວ ປະຈຸບັນໄດ້ມີການປັບປຸງຄືນບາງແຫຼ່ງທ່ອງທ່ຽວ ແລະ ມີການຮັບຮອງບັນຊີແຫຼງທ່ອງທ່ຽວພາຍໃນແຂວງຄືນໃໝ່ ແລະບັນຫາອື່ນໆ ຄຽງຄູ່ກັບຜົນສໍາເລັດກໍ່ຍັງມີດ້ານອ່ອນ ແລະ ບາງຂໍ້ຄົງຄ້າງທີ່ຈະຕ້ອງໄດ້ສຸມໃສ່ແກ້ໄຂໃນຕໍ່ໜ້າ ໂດຍສະເພາະບັນຫາກ່ຽວກັບການກະກຽມຄວາມພ້ອມໃນການບໍລິການໃຫ້ແກ່ນັກທ່ອງທ່ຽວ ເພື່ອເຮັດໃຫ້ການປະຕິບັດແຜນການທ່ອງທ່ຽວສີຂຽວສາມາດຈັ້ງຕັ້ງປະຕິບັດໄດ້ຕາມຄາດໝາຍ.

ພາບ-ຂ່າວ: ສົມພອນ ໄຊປັນຍາ