ໃນວັນທີ 26-27 ພຶດສະພາ 2022 ນີ້ ສະພາປະຊາຊົນແຂວງຫຼວງພະບາງ ໄດ້ຈັດກອງປະຊຸມ ສ້າງ ແຜນກຳນົດພະນັກງານນໍາພາ-ຄຸ້ມຄອງ ແຕ່ປີ 2021–2025 ຂຶ້ນ ໂດຍການເປັນປະທານຮ່ວມຂອງ ທ່ານ ປອ ຄໍາຄ່ອງ ພົມມະປັນຍາ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ ແລະ ທ່ານ ສິງຕັນ ໄຊລືຊົ່ງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ມີຄະນະຮັບຜິດຊອບຂັ້ນແຂວງ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມທັງໝົດ 48 ສະຫາຍ, ຍິງ 17 ສະຫາຍ.
ໃນໄລຍະ 01 ປີ ຜ່ານມາ ຄະນະພັກສະພາປະຊາຊົນແຂວງ ເປັນໝ່ວຍພັກເອກະລາດ ປະກອບມີ ເລຂາ, ຮອງເລຂາ, ປະທານກວດກາ ແລະ ຄະນະພັກ 02 ສະຫາຍ, ຍິງ 01 ສະຫາຍ. ໃນນັ້ນ, ມີສະມາຊິກພັກສົມບູນ 27 ສະຫາຍ, ຍິງ 08 ສະຫາຍ ແລະ ສະມາຊິກພັກສໍາຮອງ 03 ສະຫາຍ, ຍິງ 01 ສະຫາຍ. ປະຈຸບັນມີພະນັກງານທັງໝົດ 50 ທ່ານ, ຍິງ 17 ທ່ານ. ຜ່ານການຈັດຕັ້ງປະຕິບັດວຽກງານ ໃນໄລຍະຜ່ານມາຄະນະພັກ ໄດ້ເອົາໃຈໃສ່ປັບປຸງ, ກໍ່ສ້າງພັກຢ່າງຮອບດ້ານໂດຍຢຶດໝັ້ນຫຼັກການ, ທິດນໍາ ທີ່ໄດ້ກຳນົດໄວ້ໃນກົດລະບຽບພັກ, ເຮັດໃຫ້ ຄະນະພັກ, ສະມາຊິກພັກສ່ວນຫຼາຍມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຈົ່ງຮັກພັກດີຕໍ່ອຸດົມການ ຂອງພັກ, ຮັກສາໄດ້ຄວາມສາມັກຄີພາຍໃນພັກ ແລະ ໄດ້ຮັບການສະໜັບສະໜູນຈາກມະຫາຊົນ ແລະ ມີຜົນສຳເລັດເປັນຢ່າງດີ. ພ້ອມນັ້ນ, ຍັງໄດ້ເຊື່ອມຊຶມ ມະຕິ ຂອງກົມການເມືອງສູນກາງພັກ ສະບັບເລກທີ 030/ກມສພ ວ່າດ້ວຍມາດຕະຖານ ຂອງພະນັກງານນໍາພາ-ຄຸ້ມຄອງ, ມະຕິ ສະບັບເລກທີ 032/ກມສພ ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ຄຳແນະນຳ ຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ ກ່ຽວກັບການຈັດຕັ້ງປະຕິບັດມະຕິ ຂອງກົມການເມືອງສູນກາງພັກ ວ່າດ້ວຍມາດຕະຖານ ຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ. ຈາກນັ້ນ, ກໍ່ໄດ້ມີການລົງຄະແນນທາບທາມ ເລືອກເອົາພະນັກງານນຳພາ-ຄຸ້ມຄອງ ໂດຍໄດ້ເຮັດເປັນສອງຮອບຄື: ຮອບທີ 1 ເປົ້າໝາຍເຂົ້າຮ່ວມລົງຄະນະແນນທາບທາມ ແມ່ນພະນັກງານ-ລັດຖະກອນ ທັງໝົດພາຍໃນສະພາປະຊາຊົນແຂວງ ແລະ ຮອບທີ 2 ແມ່ນເລືອກເອົາ ຜູ້ທີ່ມີມາດຕະຖານ-ເງືອນໄຂຄົບຖ້ວນ ທີ່ໄດ້ຄັດມາຈາກ ຮອບທີ 1 ລົງທາບທາມ ເຊິ່ງຜູ້ທີ່ມີເປົ້າໝາຍລົງຄະນະສຽງໃນຮອບທີ 2 ມີຄະນະພັກ, ຄະນະກໍາມະການ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ແລະ ສະມາຊິກພັກສົມບູນ.
ສຸດທ້າຍນີ້ ປະທານກອງປະຊຸມຍັງໄດ້ເນັ້ນໜັກ ໃຫ້ເອົາໃຈໃສ່ຕິດຕາມກວດກາ ການປະຕິບັດກົດລະບຽບ ຂອງພັກ, ກົດໝາຍ ຂອງລັດ, ຕິດຕາມກວດກາການສ້າງແຜນກໍານົດພະນັກງານຢ່າງຕໍ່ເນື່ອງ,ຕິລາຄາການປະເມີນແຜນກໍານົດໃຫ້ເປັນປົກກະຕິ ແລະ ປັບປຸງດ້ານໂຄງປະກອບກົງຈັກ, ບຸກຄະລາກອນ ໃຫ້ມີຄຸນນະພາບ ແລະ ເອົາໃຈໃສ່ຕິດຕາມເປົ້າໝາຍ ຢູ່ໃນແຜນກໍານົດພະນັກງານ ຂອງບັນດາຄະນະກໍາມະການ ແລະ ຄະ ນະເລຂາທິການ ໃຫ້ເປັນປົກກະຕິຕໍ່ເນື່ອງ. ເພື່ອຍົກສູງຄວາມສາມາດນໍາພາ ແລະ ຄວາມເປັນແບບໜ້າ ຂອງພະນັກງານນໍາພາ-ຄຸ້ມຄອງ ທີ່ມີຄຸນນະພາບຢ່າງແທ້ຈິງ.
ຂ່າວ ແລະ ພາບ ນາງ ຄໍາຫຼ້າ ພອນພິລາ